هل اكتشفت أمك اليوم!

ابتسم لقصصه السخيفة مع الفتايات، يقصها على الجميع ..اقرأها مثلما يفعلون ..يبتسمون له"لا"بل يهللون ..أبتسم معهم واضحك لو خرج مهزوما ثم أجدني ضقت، وألوم عليه،"من حقي"، فأنا لست أمه.

...

ادعو له كما اعتدت يوميا، احاول يوميا ان اتحسس في كلماته ما ينم عن استجابة او ما ينقصه لأن ادعو له به..ربما يكره دعواتي ويريدني ان أوقفها.."من حقه"، فأنا لست أمه.

...

لسنا شبيهين " انبهه" لست كما تحلم، اهرب، عليك ان تجري الآن قبل ان تحبني كما احبك فاصبح ورطتك، حينها لن تستطع الهروب .. تصدمني رغبتي تلك لراحته  ..فأبتعد كثيرا لتلك الأسباب..وهذا "ليس واجبي"، فأنا لست أمه.

...

أخشى عليه ان يتأذى في سفره، اخشى عليه من وسائل المواصلات تلك التي يستقلها، ماذا لو اخبرني فقط " مسافر دلوقتي" من باب "ال عايزة حاجة!" ، فأردد "سلامتك..طمنني اما توصل..لا إله إلا الله"..لا ألومه على عدم اخباري بسفره.. " ليس واجبه "،فأنا لست أمه.

يوم من الايام

من الحاجات المرعبة ال حصلت النهارده غير الهبوط اني شوفت فيلم قصير عن التحرش وسمعت اراء الناس فيه ..وال مع الاسف بينوا لي اني هفضل اهاتي وقت طويل ..ما علينا ..انا اقول لهم رأيي بنفسي احسن من هنا
..
لأول مرة أخشى الخذلان .. من شدة الضعف قررت الاستنجاد به ولكني خشيت ان لا يصر على ايصالي للمنزل
وانا كريمة في نصرة الضعفاء فلماذا أخشى ان يصبح بخيلا ويخذلني
الخوف حد البكاء 

عباءة متهورة ليس إلا

     تنبيه بسيط: *دي صورتي صحيح، بس وحياتكوا ما بكتب مذكراتي"

تصر عبائتي بنية اللون ان تصعد فوق قدميه أثناء مروري في الممر الضيق الذي يجلس في طرفه، اخشى انتباهته لفعلتها، فكيف أبرر له انها من تجرأت لتفعلها دونا عني وكم ستغضب حين أوبخها على فعلتها أمامه كأب يهذب ابنه على تحقيق أحلامه المتهورة المؤجلة..أضيق كلما تذكرت صوت خطواتي داخلها كانت تتصنع ان تظهر كم هي مشدودة عن آخرها  فتصدر فحيح  بصوتها المبحوح كآلة نفخ معدنية منهكة  وحينا اخر كانت تصدر صوتا يشبه لوترية عازف محترف لن تترهل اوتار آلته رغم ترحاله بها  بين المقامات ولحظها العاثر سقطت في يد طفلة قررت أن تجرب الأوتار وترا وتر ، انزعج من محاولاتي تضييق الخطوات لادخر متنفس لخطوات اقصر بينما توفر اتساعها من أجله لكني ابتسم حينما اتذكر "نجاة" تقول:
"حتى فساتيني التى أهملتها... فرحت به، رقصت على قدميه"

الخريف ❤

لا اتخيل العام بلا خريف ..قبل ايام كنت اتسائل هل ابتلع الصيف باقي العام ؟
الطقس الحار لا يؤذيني فانا استمتع بانتظار ما اعلم انه سيأتي .. لكني اتملل من الثانية الأولى من موعد الوصول المحدد.
سابقا كنت اشتاق للشتاء، اكره الربيع فلا يرضيني فيه سوى الوان الورود 
...
تصر زميلتي اليوم على انني لن أحيا طويلًا  .. ابتسم لها بلا ردود ولكنها تكررها باصرار من قرأت خط عمري بينما تغلظ القسم  ..اصمت واصمت وتدوم ابتسامتي، ابتسامة جديدة لم افهمها بعد.
" ربما لم اتنازل عن ابتسامتي لكوني واثقة بإن الأمر بسيط، فليست لدي كل هذه المخاوف مثلهم " 
...
"اعلم انني ظلمت لكني لن انتقم ! .. ربما لكوني لا ادري كيف انتقم".
...
اتذكر الجملة من الغنوة شريكتي الشتوية من كلمات سيد حجاب
وقلوب تدوب في قلوب ولا هي دارية 
...
"خالتو" سومة وبناتها و توقيتات القرب 
...
الشاعر الصامت يكتب لي  .. فاخذله  :-\  

...
اتضجر من صورة المرأة العارية فيتكشف ذراعي بينما أعلق الملابس المبللة فوق منشر الملابس .. اصمت قليلا لأفكر فيعاجلني عقلي برده : "النوايا"
لكن الوردة الصفراء مازالت تسرق الانفاس من انفي .
...
ربما سيفرض الغياب 
...
يعجبني محمد فوزي حينما اصر على كونه "عوام " "ياللي على بر الهوا "
...
يضابقني ضيفي الجديد الذي لا اعرفه ..اخشى من ملاحقاته .. واسئلته عن تفاصيل لا تخصه .
...
ان يغار عليكِ احدهم ..فلا تجدين ردة فعل مناسبة 
...
يستكمل محمد فوزي "ومهما طال يا جميل يا جميل " .. هذا المحمد فوزي جميل حقا 
...
عريس غريب 
...
اغنيات الاعدادية :-D 
فرشت رمل البحر ونامت وتغطت بالشمس
و
على ده الحال
و 
قربي ليا، مش قادر
و 
لما بتفتكرني 
....
حنين ما يفتشني كلما ذهبت إلى مدرستي .
...
لا مبالاة ما تجعل نفسي في الجدال اقصر "خربانة خربانة"
...
الخسوف سرقني مني ..  اتمنى لو فعلها القمر من قبل 
صرت أحبه اكثر  

...

الغنوة دي ٢

التوهة ما بين التركي الحديث و العثماني

ليتها لا تقرأ

صديقتي 
انا لست بكل هذا الجمال الذي تعتقدينه عني .. أود اخبارك بكوني بشرية لست ذلك الملاك الذي احببته .
أشعر نحوك بالمسؤولية لذا فلست قادرة على الافصاح لك بإنني "أضعف" لا أدري إن كنت سأحطم صورتي حينها أم ان ضعفي هذا سيزدك ضعفا 
صديقتي، أنا جيدة لكني لست ممتازة لأن أُحب بهذا القدر ..أتدرين..أنا أيضا أفتقر إلى الصداقة ..خذلني الكثير من الأصدقاء أو خذلتهم لن يهم من ابتدأ الأهم النتيجة لم يتبق لدى سوى "شريفة" سأحكي لك عنها قريبا الأهم انني لا اريد خذلانك أنت أيضا ..انت هشة أكثر مني 
لماذا اخترتِني!
لا أدري هل كُنت سأصادقني إن كُنت أخرى أم لا؟
ربما كنت سأفعلها ..فأنا ساذجة مثلي 
أتعلق بالآخرون وأخبرهم ببساطة ذلك ..فهل سأهرب منك مثلما يهربون !
قلبي أضيق من سم الخياط يضيق بما لا يليق بقدسية مكان تسكنينه .
اتمنى لو أزحت عنك أوجاعك كلها واستبدلتها لك بفواكه وابتسامات ..أخشى عليك من اتكائك علىّ فانا كما لا تعرفين "قاربت على أن أكون عصى سليمان"
لكني أعدك سأهب نفسي "لموسى عليه السلام" وأضرب البحر لأحميك من كل فرعون ولكن دعي لي وقتي 
إلى لقاء

الغنوة دي

.                                                           😒

لكمة في الأنف

انا مش عايز يشوفك خالص ياخواجة

Listen to الخواجة عبدالقادر وزينب - حبيبي هو الامر الناهي by Haity Mehmet ッ #np on #SoundCloud https://soundcloud.com/haidy-mohammed-1/mdjlyvhdzxcz

القلب ثم القلب ثم الروح يارب

سلمت ولم يزل المسك في يدي

خلاصة الخلاصة

افتح الرابط : https://www.facebook.com/permalink.php?story_fbid=493784410776021&id=100004333991353&fref=nf&pnref=story

حواديت البنات ال ما بتخلصش

أيا لك نظرة أودت بقلبي

https://youtu.be/4ZM4tQUOglY

فقط منذ 3/8/1991 إلى ٣\٨\٢٠١٥

كل سنة وانا ...............

يارب 

موطني _يارب_ موطني

مااتفقناش!
هو احنا هنروح امتى؟
ماهو مافيش مرواح من غيري
موطني:لعمر كمال

انتوا تعرفوا بعض! الدنيا صغيرة جدا

* المهم بقى لي ييجي ٦شهور مستنية أشوف رؤية واحدة في المنام وما بيحصلش 
بركات رمضان بقى شوفت لطشة من المنام كلها شكرانية في "الجد" وانه كان راجل طيب اوي وشيخ بيتقي ربنا جدا 
وعلى الرغم من ان مش هو ده الحلم ال كنت مستنياه الا ان الغيث يبدأ بقطرة 
في انتظار باقي العيلة يمكن في حلم منهم الاقي ال بدور عليه وانا باسأل ببراءة 
انتوا تعرفوا بعض! يااه  الدنيا صغيرة جدا 

اللهم دبر الأمر

يارب ياودود

يارب ياودود

يارب ياودود

يارب ياودود

يارب ياودود

يارب ياودود

يارب ياودود

إلى زين الذي لم يُقبِّل الزجاج بيننا

عزيزي زين سأحدثك بهذا الاسم المستعار وسأستعير امامه اسما لي سيصبح وداد ..لننطلق خلف ستار من نور ارتضيناه لنا
عزيزي زين سأقص عليك أمرا حدث قبل عام الان لا ادري لماذا
تألمت وبكيت وعندما سألت عن موضع الالم قيل لي انها الزائدة .. حينها بكيت اكثر لا من الالم ولا من الخوف من الجراحة لكن  لخوفي من ان اتعرى امام رجل حتى وان كان الطبيب  بكيت حتى الصباح
في الصباح وخاصة على باب المصعد الذي سيقلني الى غرفة العمليات لم اخشى شيئ  فقط لم اخف لم اتمنى العودة إلى المنزل فقط كنت ارغب ان يمهلني الله وقت للدعاء .. كان هناك شكا بنسبة ٥٠ بالمائة ان لا عودة واستقبلت شكّي بابتسامة "خلينا نشوف " كان يشغلني اكثر شيئ اخر بماذا سأهذي هل سأردد اسم حبيب وقر في قلبي ام ان قلبي مازال فارغ ..كان يشغلني هذا الامر وانا اتخلص من منسوب المخدر في جسمي  لم انادي على احد غير حاضر
الان برغم غيابك عن واقعي واحلامي حتى واثقة ان المخدّر سيتسلل الى عقلي ويسرق اسمك لصالح لساني
ف أردده كما اردده سرا كل صلاة
زين زين زين
عزيزي زين اين انت الآن
وداد التي تنفث بخار ماء فوق الزجاج وتقشطها باصابعها  لترسم حبها ❤
مازالت تفكر فيك  اين ذهبت بعد الهروب ومازالت ترددها كما قالتها لك 
"لا تسألوا عن ما قالته له فمازالت الاسرار بيننهم أسرار "
إلى زين الذي لا يسألني عني :  ده انا ادرى واحدة بيا ولا انت مابتحسش وبتخدع نفسك! 
انت ليه جلدك تخين كده  ! 

الواوية الثالثة® حدوتة البنت والكلام الكتير

كان ياما كان

كان في بنت كبيرة بتستغرب الكلمات وبتقف قدامها كتير  لدرجة خلتها تنطق كلام اقل ..الكلام القليل ماكانش بيكفي الناس القليلين ال كانت عارفاهم فكانت قبل ما تخليهم يزعلوا دايما تمثل ان في سبب ورا انها تسيب الحوار في نصه زي مثلا تمثل ان جالها تليفون وتلحق ترد عليه او ان عندها معاد او انها بتشرق فتفضل تكح كتير فتهرب تجيب مية 

الحكاية ماكانتش عشان هي بتحب الكلام القليل .. لكن كانت الكلمات الكتيرة فيها تفاصيل بتعدي على الناس كلها ما تستاهلش انها تعدي بالبساطة دي  ..فمثلا من يومين جالها احتقان واعراض برد شديد  ولما حد سألها عندك ايه قالت "برد "لكن احباطها من الكلمة خلاها تتوجع وجع اشد من الاحتقان والتهابات الحلق ..وجع الهرتلة ال بييجي في الضمير .. فضلت تفكر ازاي يبقى اسمه برد والسبب فيه ان درجة الحرارة وصلت ل ٤٦ درجة .. يعني خدت" نص غلوة" يبقى فين البرد في كده ؟ 

الكلام الكتير كان بيجي لها ساعات في صورة سكوت لحد ما الناس ما تغيب عنها  واول ما يغيبوا ينادي  عليها فترفع شعرها من فوق ودنها فيدخل لها ويتمشى شوية في الطرقة اللي نورها بيخطف تخطيف وينط ف عقلها طوالي .. الكلام الكتير عمره ماحكى لها حواديت عشان لغة الحواديت دارجة وهو بيحب يكلمها بالفصحى ..فكان  بقى له سنين بيرسم عليها دور الملقن وهي بتمثل عليه دور التلميذ الانطوائي  دايما تسمعه من غير ماترد ..في مره قال لها جه دورك ..انا بعلمك من سنين ..علميني حاجة في المقابل 

ماعرفتش ليه كانت فرحانة اوي بالفكرة دي اتفقت معاه انها مش هتاخد رأيه في اختيار موضوع الدرس ..مااعترضش .. سحبت نفسها ودخلت المطبخ وخرجت خضار كتير من التلاجة وابتدت  تفكر فيه بالفصحى زي مالكلام الكتير كان بيعمل معاها ..الافكار كلها من سنين طويلة كانت بتطلع فصحى الكلام الكتير ما وقفهاش رغم دهشته من الافكار وخاصة لما قالت

 "انتف اوراق الملوخية كما انتفني من وسط هاؤلاء الذين لا يعرفون عن الطهى سوى انه خطوة من خطوات الشبع فأقف في المطبخ بلا قفازات استخرج من الافران معجون افكاري  .. لاتهمني السخونة بقدر همي ان لا تحترق داخلي .. لا اقطع جبات الفاصوليا بالسكين ..السكين لا يقتل خضرواتي يدي تداعبها  بلطف ف اربت على اطرافها ثم ابدأ   احيلها إلى مسبحة  ازيد بها رصيد فراقي ففي كل حبة اذكر سببا جدير للفراق احمد الله على معرفتي به  .. البازلاء صديقتي تلاطفني كثيرا تقف خلف سحاب اخضر اللون .. بمجرد شد السحّاب إلى اسفل تراوغني كما كانت تفعل مع اصدقائها ..تثبت ذراعها بردائها البارد ومع اول نداء تستسلم كعقد انفرط نحو الصحن ..حبات الطماطم الصفراء تعجبني اكثر ..صلبة اكثر مثل رأسي ..اكره الحمراء تستسلم لهاؤلاء الذين لا يهتمون الا بالمظهر فتندم وانا اكره الندم "

الكلام الكتير ساعتها عرف انها محتاجة حد يصلح لها اللمبة ال بتخطف تخطيف  محتاجة لانه يخرج ويغيب عنها ومحتاجة لحاجة تانىة غير الكلام حاجة التعبير عنها يبقى بالاشارة وهو خارج افتكر حاجةكانت بتفرحة جدا زمان من  لما كان كلام  قليل افتكر الطبطبة رجع جري على عقلها ووشوشه وقال له كل ما تحس انها في ورطة وهي بتكلم حد من الناس القليلين ال بتحبهم خليها تطبطب عليهم .. الطبطبة بتقصر المسافات عقلها سمع الكلام ومن يومها والبنت بتتعلق بناس اكتر وقلة كلامها بقت ميزة بتزود الناس حواليها واتحولت مشاكلها لحلول لكل الناس بتفرحهم وتريحها معاهم   وتوتة توتة فرغت الحدوتة 
#فاطمة_رجب

الى اسماء التي تعرف عني

عزيزتي اسماء من فترة بقول اني هكتب لك مع منى بس كده بتحايل على الكتابة..امهلت الموضوع الوقت الكافي جدا الوقت نفسه اللي خلاني   اكره الكتابة كليا للناس او عنهم  

مااعرفش اذا كنت اخترت ناس غلط اكتب لهم  او او نيتي نفسها كان فيها شبهة اي حاجة ولو حتى مش خاطرة لي على بال ..كل ال كتبت عنهم مشيوا "كلهم" الحمد لله يعني 

ورغم مشيهم مش حاسة بفقد  تخيلي !! 

كأنه عادي او طبيعي او حتى أحسن وسعوا لي حتة فاضية في الاوضة هفرش فيها مصلية وهسيب فيها مصحف وورد اذكار واعطرها  واصلي فيها وادعي مايرجعوش 

زمانك بتقولي وانا مالي ..مش عارفة كمان وانت مالك ..يجوز باكتب لك ده عشان لو بعدتي تبقي بردوا فاكراني او على الاقل تفكري ياترى انا  مستنياك ولا استعوضت ربنا فيك و وسعت مكان الخلوة وكبرت المصلية 

....

ماعلش اني صادمة !

ومااعلش اني بقول مااعلش مع ان الطبيعي اني مااقولهاش 

عزيزتي ام مراد علي يحي 

احنا من كتر الاحباط بقينا بنخلف لجوة .. في حين  إن لو آن الخروج من البلد دي ف الحمد لله اولادنا استقروا جوانا ف احساس الامومة الملح ده اقتنعت انه رغبة سيئة هدفها الفراق 

..يجوز هستسلم للشوق للحضن  لكن هقاوم لحد ما اقدر اخلي اولادي يدخلوا بسوستة طولي جوايا تاني بعد الحضن  ..حاجة كده شبه كيس الكانجارو  وهسيب عيونهم تشوف ال باشوفه عشان اما يكبروا ما يطلعوش زيي

عزيزتي

انا مش كارهة البلد دي  رغم انها تتكره بس بطلت احلم وبقيت بكره ال بيغطوا الواقع بورق حائط اسمه " ه " هيحصل ..هتشوفي ..هنبقى.. وصولا لهيرجع

الناس دول وحشين وبيغنوا علينا وبيزايدوا على همومنا هم الانتظار 

وبالرغم من ده انا اكتر حد عنده يقين ان الامنيات بتتحقق مرة واحدة عشان ربنا ماخلقناش عشان يشوقنا ويسيبنا 

..

عزيزتي اسماء 

مش هنشر الرسالة لاصحابك 

بس مش هتبقى الاخيرة 

المجد لمين ياحمااام !

المجد للدعوات بلم الشمل الدعوات ال ما بييأسش أصحابها وبتتجدد مهما عفي عليها الزمن بسبب صورة او سطر او آية  ف تقول :
" اللهم يا جامع الناس في يوم لا ريب فيه اجمع بيني وبين ضالتي "

-

#

-

ساعات ساعات احب عمري واعشق الحاجات
.
الصراحة عمري مافهمت ايه هي الحاجات ..تقريبا هي مجرد كلمة اتزنق المؤلف فكتبها عشان يوزن  الكلمتين ال كتبهم .. ماعلينا ..كل واهد في هاله 
.
المجد للحاجات .. 
ده العنوان ال فوق صحيح ..
المجد للفصحى ال بتوجعنس جوايا كل ماابدي العامية  عليها واكتب عامية وتبتدي تفكرني بالايام ال كنت بفكر فيها بالفصحى . او كلمات الفصحى ال بتطلع مني ببساطة ف وسط اي قعدة ومابقصدش بيها فزلكة .او الاربع سنين في الجامعة لو التدوينات الاقرب لقلبي او أساتذة اللغة العربية في المدارس ال دخلتها ..او قصائد الفصحى لدرويش او اغنيات كاظم لنزار لو قصيدة وضاحة أو علي قنديل 
المجد لأفلام الكارتون ال خلتنا نحب الوحوش ونتعاطف مع الجنيات ونستحلى عيشة القرود واعيط لما نيمو عرف يعدي من الفلتر  واسخط على سندريلا  واكتب في الوحش قصيدة تطلعه طيب وبرئ وبيل هي ال متوحشة 
المجد للميكروباصات اقل مواصلة بتدوخني لو شغال الكاسيت باتشغل معاه ياما ساخطة على الاسفاف او وانا متسلطنة ولو مش شغال ف دماغي براح افكار بتسفرني مكان ماهروح بجسمي قبلها بكام لتر بنزين 
المجد للدباديب وللبلالين وللهدايا الطفولي ال شبهنا ولانشغالي بركن اللعب في محل الهدايا لدرجة ان واحد سمعته بيتكلم عني من غير ما يقصد يسمعني بوصفي "طفلة رضيعة" وانا عمالة ابوس واحضن اللعب وروحي سايباها ف وسطهم  
النجد للحنين المتجدد لعروسة قماش رجليها طويلة بطولي 
المجد للأحضان  للستات الجدعة للست ال روحت لبنتها قلتلها ممكن احضن مامتك قالت لي مش نتعرف الاول سلمت عليها وقلت لها فاطمة رجب وسبتها وحضنت امها .. للحضن بتاع الصبح بتاع صديقتي لحضن ونيس "الدبدوب الجديد " لحبة الاحضان ال بنحتاجها لما بنعيط ونشتاق ..للحضن الوحيد ال بنتمناه مرة واحدة وما بناخدهوش 
المجد للناس الطيبين ال ما بيتعمدوش يعملوا حاجأت توجعنا زي  بصة تضايق ولا كلمة تألم ولا استفسار مالوش لازمة المجد للناس ال بتسكت بدل ماتطبطب في الوقت ال ما بنبقاش قادرين نستحمل تقل كف فوق كتفنا 
 المجد للمشاوير ال لما بتحتاجها بتلاقيها ..للحاجات ال بتتعمل في الساعات  وللساعات لما بتتملي بحاجات مفيدة وبتفرّح زي انك تقف تزوق كيكة او تنفخ بلالين للدبدوب او تعجن بيتزا او تكتب قصيدة وتلقيها  او تقرأ كتاب لحد غيرك محتاج او تشتغل من غير ما تتكلم او ترسم  او تصور حد صور حلوة زي انك تكتشف مثلا ان لسة فيك ال يخليك عشمان .. زي ان وقتك ما يضيعش وانت قاعد تدور لحد على اعذار عشان يتسامح ..زي انك تبقى فخور انك بتكسب انسانيتك في الحياة وانت عارف كويس اوي ان الحياة تجربة مش كل الناس بتكسب فيها الانسانية وانا ف تجربتي ممكن ادفع معظم وقتي وكل الساعات  عشان اكسب  حاجة واحدة بس "انسانيتي" 

حدوتة الدبدوبة الجبانة

رضا ربنا عن المحلسة 😊

بسم الله الرحمن الرحيم 

أمل مقاس ٣٨

ورغم والمسافات الواسعة اوي ال شبه خطوة الفيل عندي امل مقاس ٣٨ ان المدونة بتتفتح وبيتبص فيها وان حد مهم جدا مااعرفش انه بيفتحها بيدور هنا ويستنى اي حرفين مالهمش معنى لاي حد غيره .. امل كل ما بزود خطوة برتاح وبيريحني وبيوسع معايا ف بيبقى ٣٩ وساعات اكتر ..عندي امل المدونة تكون في الحساب ..ان رغم السكك المتقفلة بيننا كلها حبة الحروف اللي بسيبهم هنا بيبقوا زي الندى فوق الورد حاجة تبل الجوف .. فيروز بتقول: أهواك بلا أمل ..في نفس الحظة المؤذن للفجر نادى بعلو صوته وقال الله أكبر :-D 
علامة يا مارد .. لاني أملي في ربنا اللي قادر جدا .. جَلَد..ايمان..قوة ده دوري حاجة قصادهم تبل الجوف بقى 

في فهم الذات المندمجة

"صباحك ورد"

وتلك هي الكلمة الحلوة ال بيقولها أ.اشرف لكل الناس كتر خيره 

المهم

اللي بيقفلها بتقفل ف وشه  ..دي الجملة اللي برددها لنفسي كتير علشان تبقى مسلكي يعني حاجة كده زي كتر التكرار بيعلم الشطار او مثلا مثلا  كتر الضحك بيعلم الفرح .. انا البنت اللي بتستنى الميكروباص المتأخر بابتسامة مستخبية ورا النقاب لأن الشمس ال فوق راسي مثلا في قصادها جنة جوا نفس الراس ..زي مثلا ان قصة محاكمة قاطع طريق اكتملت فكرتها كأول قصة اكتبها وانا مستنية المكروباص اللي اتأخر وضاع عليا المحاضرة الاولى ف الجامعة ..زي مثلا ان ممكن وانا ماشية افكر ف ناس وحشوني ف اتونس بيهم والطريق يبقى اقصر ..زي مثلا يوم التثبيت في الشغل الناس كلها اتخانقت في طابور الاجراءات ماعدا  انا لانها مش مستاهلة وان لما واحدة قالت لي ده دوري قلت لها انت عايزة تبقي قبلي قالت لي اه قلت لها ماشي وده عكس اتفاق البشر اللي اتفقوا عليه من غير قصد انهم ما يريحوش بعض ..زي مثلا ان لما رجلي اتكسرت فضلت ساعة ونص قاعدة ف العربية وانا باتعذب من الالم كنوع من ايثار حد لان الساعة ونص دول مدة فارقة بالنسبة له ..ساعات ناس تسميه اخلاق وناس تسميها طولة بال غيرهم بيقولوا عنها لا مبالاة ..الحقيقة مش فارق حيث اني مش باتسبب في ضرر لا لنفسي ولا لغيري يبقى ليه اعقد الامور وهي مش مستاهلة تتعقد  ف وشي  

حارب التسوس

يجب التنويه قبل انطلاق الرحلة ان الواقع هنا لا يمت للواقعيين بصلة ..ماتاخدوش الكلام عليكوا يرحمكم الله واخيرا ..ابقوا اسمعوا نصر الدين طوبار وانتوا شغالين ويستحسن يامن له في يثرب روضات
١_حاول بقى تقنع حد بان شفايفك الحمرا دي مش دموية وانك فعلا هبطان جدا ومسخسخ ! 
حاول كده وابقى قابلني لو اقتنع 
 #عكس_الناس0
#حارب_الموروث
#يادي_النعيم_اللي_انت_فيه_ياقلبي
٢_طنط اللي معتقدة ان الجواز نص الدين واللي مهتمة تقنعني اكتر من اهلي ..حضرتك اصلا النص الاولاني ما كملش ثم انه سلف ودين مش نص الدين خالص  
٣_ مبادئي في الحياة مش كلها صح بس بيس لو حد راجعني  لكن لما تزعل مش من حقك ترفض وجهات نظري حقيقي الشحنات الزعلانة جوايا من هتحترم لفتة سعادتك لكن هتعتبرها اساءة لكن لو بااسلوب تاني في الروقان اتقالت هتتقبل والله ده احنا بشر 
٤_اللي يخاف من العفريت يطلع له .. حاول تهدي وتستقبل الهم بتكبير دماغ ولا مبالاة ..كل شئ بيفوت لما بياخد وقته ثق انها هتفرج  ..الله عدل
٥_صالح نفسك اوي واحكي لك بس بلاش الصوت العالي ..مش كل الناس هتفهم ده صح :-D  
٦_الحب بييجي ف ثانية ومالوش وقت ومواعيد
٧_كل شوية افتح الصفحة دي واخبط عليها وانا بقول افتح بقى يا فلان.. افتح يا سمسم مع ملاحظة ان لما هيقرأ دي مش هيفتح عادي ..كل واحد يرتب لحياته زي مايحب ..الحياة تجربة واحدة مش كل الناس بتكسب الانسانية ..عادي عادي 

 ٨_عزيزتي البنت ست الحلوات شارو خان بس هو اللي استنى كاجول تتلفت وراها قبل ما تركب القطر عشان يتأكد انها بتحبه ..اوعي تتلفتي وراكي عشان هتتقهري زيادة لما تلاقيه اختفى من الطريق عادي وروح 
٩_العائد في هبته كالكلب .. ماتنسوش الضحكة والكلمة والود والاحسان والرحمة والأدب  هبات بلاش ترجعوا فيها والا هنغسل ارواحنا منكوا بالتراب ! 
١٠_الشاعر احمد فتحي قال :
انا لن أعود اليك مهما استرحمت دقات قلبي
انت الذي بدأ الملامة والصدود وخان حبي
فاذا دعوت اليوم قلبي للتصافي لن يلبي
 الابيات دي برددها وانا مش عرفة باقيها .. اللي حافظ يكمل ..سلام

صديقاتي

 !! 

أولا 

شريفة 

صديقتي الصدوقة  الاعقل مني !!

البنت اللي بسألها عن الحاجة قبل مااعملها ف تقول لي رأي عاقل جدا مش شبهي فمااعملهوش .. عادي 😂 

المهم بنبعد عن بعض وقت طويل ..باتضايق كتير لما اغيب عنها واحس انها ما حستش 

حقيقي ..مع اني انا اللي ببعد يعني الحق طبعا عليا 

مش باعرف اتدلع عليها 😈

شريفة قلبها فيه نور  ف اول ماارجع اكلمها ما بتستغربش هي بتتعامل معايا لانها فاهماني ان ده مش بعد مقصود هي بس ظروف 

شريفة أمورة 

وبحب حكاويها وتفاصيلها 

دايما بتقول لي  اني زيكو ..ده عشان انا ذكية زيادة بالنسبة لها 

اتصاحبنا من ٨ سنين .. لازم نحتفل بعيد الصداقة بعد سنتين ونعمل تورتة وحاجات

كنا بنمشي ف طرق كله شجر وكانت بتسمعني 

كنا نتلاقى من عشية نمرؤ على الجسر العتيق لفيروز 

شفني وجدي

الشوق والوجد و النجوى من المشقات فيقول الرجل شفني وجدي بمعنى اتعبني شوقي

في الفيلم الكوميدي ماقالوش لبعض الوداع لكن البطل قال لازم اروح ومهما اتقال له ماتروحش فضل مصر على رأيه ..والبطلة قالت له هتمشي ازاي وانا خلاص جبت الفرن اللي هخبز عليه العيش ال هيدفي ويفرح قلوب الخلق
...
في الفيلم الرومانسي البطل قال إلى اللقاء والبطلة قالت له خلي بالك من نفسك وفضلت تعيط لما قالت يا بس عيطت في سرها لدرجة انها لسة بتعيط وبتتعب من كتر ا الامل يرجعوا لكن هتفضل متمسكة بالامل
...
في الفيلم الاكشن باكتر اسلوب فظ قال ماشي يعني همشي  هي شتمته لانه مش قد الحب 
.....
في الفيلم الدرامي قال انه مش هيقول الوداع ودمعته على خده وهي بكل اسى شغلت ٣ تراكات اغاني الاول شنطة سفر لأنغام والتاني انت فين والحب فين للست والتالت عود لاحمد الحجار.. وقعدت تدعي له ما يتعذبش ف مشواره وقالت له التمائم كلها والادعية

 اللي تحفظه في سكته 

وانت بالصحة والسلامة

طبيعي انك لما تقول لحد انا تعبان يقول لك سلامتك ..سلامتك من الكلمات المنزهة عن الفيلينج والله ..يعني مافيش حد هيحب حد عشان قال له سلامتك ولا هيربط مستقبله بشخص عشان قال كلمة زي دي بالاضافة لان الحب بيكون بالافعال مش الاقوال يعني لو بحب حد عيان هزوره او هنزل اجيب له الدوا او هدعي له يخف او هفكره بميعاد ادويته او حاجات من النوع ده فيها شغف او اهتمام او حرص لكن كلمة سلامتك اللي ردها الله يسلمك مافيهاش احلام ولا فراشات وقلوب هتطرح محبة لو تتبدر في كلامنا حقيقي .. كل ما ببقى تعبانة وافتكر مثلا ان من اسباب تعبي ان مثلا ما اتقاليش الف سلامة عليكي او عندك ايه اقول اني غبية عشان بتأثر على حاجات حاسة مش متأكدة ان ليا يد فيها .. واتأكد كل ما افتكر الكلمة اللي ما اتقالتش ان ماليش يد يبقى بازعل ليه ويصعب عليا من نفسي !! 
تفاصيل كتيرة مش هتتقال نظرا لشعوري بالضيق الشديد النهارده حيث اني تعبانة وحزينة كمان وربنا قادر يفرج الكرب 
.
واعلم ان الامة لو اجتمعت على ان ينفعوك بشئ لن ينفعوك الا بشئ قد كتبه الله لك وان اجتمعت على ان يضروك بشئ لن يضروك الا بشئ قد كتبه الله عليك رفعت الاقلام وجفت الصحف
.
خير يارب 

محسن عنده ٣ عواميد وعايز يصب السقف

من كام سنة كان في فيلم اسمه التوربيني الفيلم ده كان حلو عشان اول حاجة اتكلمت عن التوحد ..

فيلم قصير عبيط

مثلا مثلا !

فستاني وشبكتي

انا البنت ال ما بتحلمش بفستان الفرح .. وانا صغيرة كنت باتكسف اقيس فستان امي ..بيتهيألي كل البنات ال لقوا الفرصة قاسوه ..يعني حتى على سبيل الهزار ..لما كبرت حبتين شوفتني ف حلم كده لابسة فساتين كتيرة زي بتاعة الخطوبة منهم واحد ابيض ..مااقدرش اقول اني كنت فرحانة اني لبست فستان قد ما فاكرة ان كان باسطني اصلا نقشات وتطريزات الفستان ..لما كنت صغيرة ما كنتش باحلم ف الافراح البس فستان ابيض زي العيال لكن كنت اتمنى الاقي فرصة اني امسك الشمع و اما بقيت ف الجامعة  ماوقفتش قدام محل بيبيع فساتين وانبهرت ..بمر من جنبهم من غير ما يلفتوا انتباهي ..كانت بتعجبني بدل العرسان ف ابص للبدلة ف الفاترينة واقول دي مقاس فلان ودي شبه الالوان ال بيلبسها علان ودي لو لبسها ترتان تبقى واسعة عليه ودي هيلوق جواها  والحق كنت اخد بالي من البدل الجديدة .. دلوقتي الفساتين بقت تاخد عيوني ..استنوا ..مش ليا لاصحابي المخطوبين وبقيت بدور لهم بالقوي على فستان شيك اوي يناسب بنت ما استهواهاش اي فستان .. الموضوع ده ينطبق عندي على الدهب بس لسة بدري على انه ياخد عيوني 

سؤال الاسك ال اتمسح

مؤجل  

اكتر بوست كتبته مالوش لازمة

السلام عليكم

عزيزي ابن الحلال : لتعلم أولا اننا قد /لن نتقابل حاليا حسبما أخبرت والديّا قبل أيام _ وهبت نفسي للشعر والأدب _ لك أن تتوقع حجم الاستفزاز الذي أوقعته على عاتقيهما الذائب في عرق المواجهة للعلم لم أسعى لشئ سوى الهروب بجملة من التلفاز تخيل نفسك آمرا ناهيا في بيت أسسته لنفسك قبل تأسيسه لحلم لك ، إن احسنت اختيار أثاثه ارتحت فيه وان أسأت فلنفسك لذلك ف الأمر معقد ومحاط بمخاوف ليست مادية انما مخاوف الحُكم و الاختيار ، يقولون (ساعة القدر يعمى البصر) _ ويقولون (أيضا مرايا الحب عمياء ) واتجاهنا نحو الأمثال ماهو إلا "تلاكيك" من أجل تهوين تلك العقد 
"
بص بقى يا سيدي : أولا عندك أمنيات عيب أوي في سنك ال هو فوق 22 سنة _عمري_ تبقى دايرة حوالين هجيب لها ايه عشان تتبسط أصل هيا أصلا لو بقى همها حبة الحاجات المادية دي بيبسطوها ف انبساطها هيفنى بفناء الحاجات دي / بلاش نتكلم عن النيش دلوقتي  مثلا هتتبسط لو جبت لها "من الدهب كفة وجبت لها من الياقوت كفة وجبت الوالي ف الزفة " طب آدي الوالي بيتغير كل كام شهر #متراقبين 
اختيار حضرتك مش هيوقف الاحلام بس هيديها وقتها لكن ان حضرتك توقف احلامي باستوب ووتش عطلانة ده مستحيل _عندي يقين مالهوش علاقة بساعة القدر والعمى بتاعها ان احلامنا هتبقى حلوة وماحدش فينا هيستغربها ف يعطلها #زي_البيت ال فوسط #الارض والزرع ان شا الله يكون متعرش ببوص بس الزرع ال فيه احنا ال زارعينه بادينا ممكن انا بحوش له من دلوقتي هو صحيح "ايدي اقصر كتير مني " #بس_عندي_حلم
ملاحظة مهمة ياابن الحلال : في يوم واحنا ماشيين سوا في السوق عيل هيتوه من امه مانعرفهوش لاهو ولا امه ياريت تتدرب ازاي هتساعدها من دلوقتي لأن انا مش هسيبها لو حصل ايه واتمرن لى انك تمسك أعصابك عشان هعيط كعادتي وانا بدور معاها 
أخيرا حاجة ماكنتش ناوية أقولها لك غير مفاجأة وقتية يعني بس هقولها كفضفضة مع الذات ويارب ال يعرف اخواتي مايقولش ليهم عشان يتفاجأوا هم كمان 
بص يا ابن الحلال من سنة كده نويت والنية خالصة لله اني مايبقاش ليا شبكة ولا مهر وقصادهم أجزاء أو سور من القرآن وتبقى أجدع مني انت كمان لو ساعدتني أكمل حفظ عشان أنا خايب اوي ووصلت في القرآن لجزء بسيط اوي وانا عارفة ان طلبي صعب بس كده وده طبعا من بعد اختيار حضراتنا لحضراتكم مش قبله يعني احفظ من بعد اختيارك براحتك وخد وقتك ولك منا جزيل الشكر وآسفين ع التطويل / ما اظنش ان انتهى كده
 . 
استعنت تحريفيا بقصيدة لأشرف توفيق
تاني مرة ال يعرف اخواتي مايقولش
"

عليا ريال

كنت صغيرة لما رحت لام اسامة وطلبت منها حاجة ف العيد ..حظ ..ايه بقى الحظ ده؟ هو رقم بشاور عليه فتشوف عندها قصاده ايه من الهدايا واخده واروح ..تقريبا ماكانش معايا فكة او جبت حاجات ودي منهم وكان فاضل لها ..المهم طنط ام اسامة ليها عندي ريال.. من سنين وانا مش عارفة ليه بافتكر الريال ده .رغم اني نسيت اقول لهم في البيت يرجعوه. الريال ده هو كل ديوني .. وانا ف ثانوي فكرت هرميه على باب دكانهم ال اتحوّل فجأة من بقال لنجار لما احمد اخو اسامة قرر يعمل مشروع ..ماعملتش ده مااعرفش ليه ..فمرة قلت لنفسي المفروض ارجعه لهم بالارباح طب ده انا مكسبي الوحيد كانوا شوية لب سوبر كسبتهم ف البخت ..ايه الارباح بقى افتح لهم مقلة !! 
ساعات كنت اقول لنفسي هروح اديها لها بس الخيبة لا تقول البت دي عبيطة 
طنط ام اسامة زي ما كنت بقول لها كانت ساعات تغلي علينا حاجات ربع او خمسين قرش زيادة زي كيلو الرز او السكر فكان شيطاني  يقول لي دي قصاد دي لينا عندها ياما ..واما ضميري يرجع باستغفر 
ام اسامة طلعت امورة اوي وعيونها عسلية وده بعد ماقابلتها على كبر الظاهر التعود بيقتل جمال الحاجات ..او انا ال فضلت سنين ماباخدش بالي .. بعد ما عزلنا قابلتني وندهت عليا وشوفتها فضلت تسلم بالجامد ، العملة صحيح مابقاش فيها ريالات وانا لسة شايلة لها الريال بتاعها ومش عارفة ارجعه لها ازاي ..لو كانت تعرف ان ليها عندي ريال ..كانت هتحضنني اوي كده !
نفسي ارجعه لها  اوي حتى لو هتروح مصدومة من العبيطة ال فاكرة الريال من اكتر من ١٥ سنة وانا وانا واثقة ان كل هتحكيله هيتتريق عليا ويغني لها معايا ريال معايا ريال

حدوتة البنت اللي بتهتم بالتفاصيل

هحكي لكوا حدوتة : كان ياما كان كان في بنت حلوة كل الناس تهتم تحكي لها حواديتهم  عشان واثقين ان السر ف بير وعشان بتقول كلام هي الوحيدة ال بتوصل له زي ما يكون كلام دنيا تانية   بس كان عندها مشكلة هي الوحيدة ال حاسة بيها وماكانتش بتعرف تفهمها لحد وهي انها مابتعرفش تتكلم مع الناس هي تعرف كل الكلمات بس مش بتعرف ترصهم جنب بعض فتطلع جملة مفيدة قصيرة .الجمل دايما طويلة . لما حد كان يسألها "ازيك" قبل ما تقول الحمد لله كانت تسأل نفسها الحمد ده رضا على النعمة ولا إيمان بالله ورضا بالمكروه ولا مجرد رد بيتقال فكانت تسكت شوية وتكتب كلام كتير شبه ال جواها بيقول معنى الحمد لله ..ماكانتش بتتعب لما تقوله لأنه حقيقي بس كان بيتعب ال بيقراه .. قرر واحد انه ينتقم منها لانها كانت بتجهده في فهم حاجات كتيرة ف الدنيا ليها نفس الاسم فكانت خطته انه ما يسألهاش الا بنفس طريقتها فصحيت فيوم الصبح لقته كاتب لها "إيه زيك" البنت سكتت كتير أوي قبل ما ترد سكتت ايام تدور فيها على تفاصيلها ال تتمثلها كلها وال يترد عليها بكلمة واحدة ماتكونش غرور فمش هتقول له زي العسل وماتكونش غنج فتقول له زي القمر وماتكونش وماتكونش وفجأة لقت نفسها ف وسط دوامة كبيرة جدا كلها تشبيهات منها ال مش شبهها وال مش مقاسها و ال مش ممكن تبقى  هي فقالت لنفسها طب ما اسأل الناس راحت تسأل اكتر ناس حكوا لها تفاصيل حياتهم وساعدتهم منهم ناس قالت كلام حلو مجامل ومنهم ال قال كلام عشان يخلص ومنهم واحد قال كلام عيونه كانت مدمعة وهو بيقوله  البنت رقت لحاله وسألته ماله فحكى لها عن مشكلته مابيعرش يجمع الكلام جنب بعضه فيطلع جملة مفيدة البنت نسيت السؤال والتدوير على اجابته واتشغلت في مشكلة الراجل ده وابتدت تدور له على حلول حلوة تساعده يتغلب على مشكلته
توتة توتة مافرغتش الحدوتة 
وحشة جدا الحدوتة
 البنت لساها جزء من دواير الناس هي الوصلة ال لو فكت الدواير هتفضل موجودة بس في حتة فاضية شبه عيوب الصناعة هتفضل فيهم  أما هي بقى لو فكت فالتأثير عليها اكبر لانها هتبقى وصلة واقعة على الارض او ضايعة سهل يبقى في غيرها عشان مالهاش دايرتها الخاصة بيها 
المشكلة الحقيقية ان البنت رافضة الاعتراف بأهمية وجود دايرتها الخاصة ..عشان لسة بدري أو عشان مش مهم او عشان انا بحب كده أو عشان بحب اشوف الدنيا فرحانة 
البنت دي ماحدش بيشوفها لانها شبه كل العيال الصغيرين ال ف الدنيا وف نفس مقاسهم وهي بتحب ده وده بيخلي حواليها بس الطيبين عشان كده بتتخدع ف اي حد ممكن يضحك ضحكة  طفولي وتصدق  كل ال بيتغزل في الايس كريم وال بيلعبوا مزيكا وبتتخض اوي من ال مش بيتكلموا 
البنت دي هييجي يوم وهتتعب وهتتعب اوي فمش هتعرف تقول لحد ولما هتسيب الدنيا كلها هتبص من شيش موارب ف السما مين بيحلم بيها ومين فاكرها ومين بيدمع ومين زعلان ومين عامل فيها زعلان وهتبص ف عيونهم كلهم وهتدور على مين لسة عنده مشاكل وال عيونه هتبقى مدمعه هتخلي ملايكة الاحلام يوصلوا له منها حلول تساعده ف حل كل المشكلات .. اما الناس ال تعرف تفاصيل ايامهم ف بتقول لهم ابقوا بصوا لفوق كل يوم مرة واحدة بس ودي شفرة فوق بتدي صوت الجرس  كل ما تقرروا تزودوا حاجة جديدة على التفاصيل 
البنت لسة موجودة ماطلعتش فوق  بس فعلا غرقانة ف كل التفاصيل ومش عارفة تطلع ولا عارفة تلاقي قارب مايحرمهاش من البحر بس مايغرقهاش

ستو أم نور ١

الصورة دي شبه ورق حائط او لف هدايا شوفته ف البلد زمان

انا بكتب حواديت رغم اني مااتحكاش ليا حواديت كتيرة ..ف البيت كانوا بيلعبوا معايا على خمس حواديت ويخلوني البطلة بتاعتهم ويجودوا فيم يتناسب كليا معايا كطفلة عنيدة .. فكانوا بيحكوا لي حكاية الارنب ال بيعيط لما يتسرح له شعره .. ف امه تزعل منه ف الفيل يرفض يلعب معاه نط الحبل ..الحدوتة دي اسبيشيال ليا .. ألفوها خصيصا عشاني ..وحدوتة جميلة وبقرتها  والديك الاخضر  و حدوتة الزرافة اللي راحت عند خالتها في المشروع الامريكي "بيت خالتي"
حتى جدتي ماحكتليش الا حدوتة واحدة اول عن اخر ..كانت العنزة والديب ..ستوا ماكانتش بتحكي غيرها لدرجة كنا حافظينها ورغم كده كنا نضحك لما تيجي عند كلمة معينة .. لان تقريبا الكلمة دي هي الوحيدة ال بتضيفها على الحدوتة اللي كل الناس بتقولها ..ستو ام نور " اسمها بسيطة"حلو اوي الاسم ..دلوقتي هحكي عنها .. لان ببساطة الكام سنة ال عشتهم معاها كفيلين يخلوني بعرف احكي حواديت تفرح وتبكي ف نفس الوقت
كانت حلوة وعيونها ملونة حاجة كده شبه الرصاصي يعني مش اخضر ولا ازرق ولا عسلي ومش سودا ..جميلة شكلا ومضمونا .. لما كنا نعمل حاجة غلط كانت تحلق عليهم وتقول لهم "حد الله عليكوا " الكلمة كان ليها تأثير فكنا نعمل ال نعوزه ونجري عليها واحنا مش قلقانين  ..المرة ال اتعرفت فيها عليها بشكل مختلف كانت في يوم ف السقعة ..كنت نايمة جنبها ومتكلفته بيها باتدفى ولقينا واحدة كده طيبة! جابت ابنها صغير ينام جنب ستو وحطته بيني وبينها رغم انها كانت في حضني بحبة زعيق ونرفزة ..ستو ساعتها حست بالضعف وانا صعبانة عليها وهي مش عارفة تعمل حاجة سكتت ما قالتش حاجة بس قعدت تعيط .. قلة الحيلة والطيبة والخوف على خاطر الصغير قبل الكبير كان السبب في انها اتزرعت نبتة ريحان في قلوب الدنيا كلها ..
قرر تحب وتقلب في قلبك هتلاقي نسمة من الجنة حقك تتبسط بس اوعى تنسى ان السبب "ستو " 

الفلانتاين = يوم الفطام

طب هابي فلانتاين والله
المدونة ف اليوم ده بقى عندها سنتين ..ماكنتش اعرف اني عملتها يوم عيد الحب .. مااهتمتش بالحب اوي يعني فيها .. مع اني اصلا بكتب كل ال فيها بحب .. المدونة بتحبي وتزحف وتقزح وتقف وتمشي على مهلها .. المدونة كبرت وبقت بنوتة حلوة 
من فترة وانا بقول  ان القلب شبه الطفاية  هيشقق وهيطلع منه نبتة ريحان .. وبعدين افتكرت  الصورة دي .. 

انا قلبي هينبت ريحان .. واثقة

..............

والمدونة  لما مش هملك منها الا سر الباس وورد  كمان  في غيابي هتنبت معايا ريحان ..انا نجحت ف حاجات قليلة والمدونة واحدة منهم 

ممكن تدوينة زي دي تنبت في قلب مفتفت حاجة 

..

على هامش الدنيا : اعتذروا لبعض 

ده بيزيد الاحترام ..مش بيقل الكرامة

بس اوعوا بردوا ده ينسيكوا تعتذروا لربنا  

.

كل سنة وانت حاجة حلوة 

استغفر الله العظيم