happy birthday to you ❤

ممم يعني مش هاين عليا اقول ماعنديش وقت اكتب في المدونة او مستعجلة بس بما ان ده واقع حابة احكي عن ان
١_فات كمان عام من عمر الندوتة كل عام وهي حلوة ❤
٢_بخطط لقضاء وقت سعيد مع خواطر الشقيري واشوف كل مواسمه السنة دي ودي اول حلقة من اول موسم للي ناوي يبدأ معايا
٣_خدت موقف مع نفسي وربنا هيكرمني ومارجعتش فيه ومازلت مقررة اني مش هرجع 

فستان

كل فساتيني صيفي او خريفي، النهارده قررت اطلع فستان منهم واخرج واروح بيه الشغل سلبطة بقى فستان بيج في اسود وفيه ورد نبيتي صغير كتير 

ماعرفش ليه قررت البس فستان اصلا وانا رايحة الشغل، الشغل يعني عبايات تفصيل تقيلة وتستحمل و الوان سادة، يعني المسألة رسمية أكتر 

لكن النهارده انا عايزة الهوا يتنطط معايا من الفرحة ان الحلم العجيب ده خلص

امبارح حلمت لأول مرة في عمري اني لابسة فستان ابيض يشبه للون قوالب التلج فستان فرح وطرحة خفيف وواسع وطبقاته كتيرة فوق بعضها مافيش جيبونة تثبته ولا توقف روحه، حر بيجري معايا بحرية

في الحلم عريسي ماكانش مناسب، رغم انه مناسب جدا في مقاييس الناس ال بتتعامل بالمسطرة طب بالنسبة للميزان!!

مش الميزان ده، انا اقصد الميزان اياه ال ما بينفعش حد يُخْسِره 

ياللا سيبت الفرح و العريس والمعازيم بعد ما بدأ وطلعت ادوار عالية فيها ناس تانية ادور على مكان يساعدني على الراحة 

وخلص الحلم 

يبقى لازم احتفل بانتهاء الحلم ف الوقت المناسب قبل ما اتجوزه بحق وحقيقي و البس فستان خفيف صيفي مليان ورد في عز الشتا يجري ويتنطط معايا بحرية 

البنت المخلصة اياها

كنا بنتكلم عن الاخلاص وف وسط مااحنا بندردش قالت لي _وانا اقرب لها من اي حد تحكي قدامه بمثابة ال ظاهره السكوت وجواه صخب الكون_قالت والدموع مالية عيونها"من غير ماافهم بتدمّع ليه":
عارفة، الاخلاص هو الشئ الوحيد ال ما ينفعش يتسأل عليه بالرغم من انه اكتر حاجة بنتمنى تتعرف عننا بكل تفاصيلها ..لما سألتها ايه السبب وانا بساعدها في الرد قلت لها يمكن عشان صيغة السؤال بيبقى فيها تشكيك والثقة نُص الاخلاص !
ضحكت وقالت لي بالظبط كده لكن فيه حاجة تاني..سألتها قالت لي صبرك عليا..فاكرة آخر مرة اتحطينا ف موقف اخلاص مر الموقف من غير ما يفهم حد كل ال مرينا بيه عشان نقرر أكتر قرار صائب نفذناه، أخلصا ساعتها للمبدأ يمكن لو كنا شرحنا للناس او سيبنا فرصة حكي وكلام كانوا استقلوا او حتى اتهمونا بخيانة افكارهم اذا كان الكون ماشي في سكة مختلفة طبقا لما ورد في كتاب المصلحة الاعظم
عارفة!
_انا ممكن أخونني/نك "بالدفع نحو الهاوية" لو الحياة في استمراريتها أخلت بالمبدأ "كحياة مفتتحها لا اخلاص فيه وغيره،..." لكن،هحارب حتى الفشل لو كنت أثق في الفشل لو الأمر تخطانا لإنسان تاني سعيًا وراء الإنسانية.

ابتسمت ابتسامة خفيفة ومسحت دمعة هتهرب كن عينها وقالت لي دي مش دموع انا بس لما ببقى واثقة ف نفسي اوي عيوني بتتملي بدموع الاخلاق ال ممكن ارفض الكون كله واقفل عليّا بابي ولا ان مخلوق يشوفها وما يقدَّرش  معنى كل مللي منها