ب اتخطف

  

_هو انت بنت د/ رجب عزام؟ 

 ايوه  .. وعلى شفايفي ابتسامة امتنان للكلام الحلو اللي دايما باسمعه بعد الجملة دي، ابوك ده راجل طيب، راجل محترم، مافيش منه، ماعداش علينا زيه، ده احسن مدير قابلناه، ده عمل لي كذا ، لولاه كان زماني كذا، هو السبب في كذا .

_الله يرحمه ويقولوا نفس الكلام اللي كنت متوقعاه من ثانية 

.....

ب اتخطف، وتقع جمرة جوة ضلوعي وحاجة تتكسف جوايا زي حد مد ايده للسلام ف حطيت كفك في ايد تانية، وافتكر واتخض واهز راسي بسرعة بآمين وانا بعالج الابتسامة اللي فاتت بابتسامة تانية ساترة تخفيها ف يبان ولو من بعيد اني ما اتأثرتش واني ف مكاني واني من الأول ناوية اقول آمين وماتوقعتش غيرها

وكل مرة بطرد الدموع من عيني وماحدش يلحق أبدا  يشوفها أبدا عشان ما اتقلش على الناس، ويخافوا يدعوا له قدامي.., انا احب طول الوقت يدعوا له 
 بس كل ما افتكر لوحدي  الخطفة دي اخدني على جنب وادي الفرصة لدموعي تجري زي دلوقتي 

البنات بيقولوا على أبهاتهم انهم ضهرهم وبابايا مش ضهري، بابايا ف قلبي وانا قلبي ما بيتكسرش أبدا، مهما حصل عندي يقين مخليه لين، ما بييبسش، وكل شيئ في الكون بفسره بانه ارادة ربنا، وهو اللي كاتب كده، ومتوقعة منه رغم كل شئ ان كل اللي جاي معجزات حتى لو مافيش اشارة واحدة، وكل حاجة حلوة حصلت كانت معجزة، و المعجزة ان تحصل لي انا حاجات حلوة وانا اصلا مااستحقش معجزات ف ده دليل ان المعجزات بتحصل