كل ده كان ليه"تحديدا"؟

 هو ليه الضحك من غير سبب قلة أدب؟

يا صباح الحاجات، وصباح دي عشان الحاجات مش عشان انا مثلا بكتب بعد الساعة واحدة ونص ولا حاجة ، هو ليه اصلا الساعة 12 بعد نص الليل بتعتبر صبح يوم جديد مع اننا والله لسه هننام، وليه الضحك من غير سبب قلة أدب، عموما كل ضحك له سبب بس مش لازم الأبلة تعرف اسباب، احنا مابنفشيش أسرارنا حتى لو اعتبرنا الناس بنضحك وخلاص، وبعدين انتوا سايبين انجاز اننا مازلنا بنضحك وسطكوا عادي ورغم كل ال احنا فيه  سبحان الله عملنا كده، ومركزين لنا ف الأدب وقلته؟

عموما ايه الازمة ف الوصف، كانت الكلمة دي بتتقال والعيال يا تضحك اكتر يا تضحك بنفس الكمية وبصراحة الكلمة تضحك ، تحسها قرار كده زي واحد قاعد فاضي قرر يقول ان الضحك بدون سبب حاجة على نفس الوزن قلة ادب مع ان ممكن يقول مدعاة للعجب، بيكشف الحجب، بينجح المنتخب ....إلخ
بس ما بنقدرش نقاوم النكد، الناس بتحب يحضرها روح ستنا طيبة الذكر فاطمة كشري ويقعدوا على جنب يسحوا ويعيبوا ف تربية العيال 
ياللا
عموما يعني  لو على الأدب ، ف إليكم...
وانا صغيرة كنت بسأل أسئلة ف غير وقتها بصراحة، زي مثلا :
 مين ده ال ماشي بينور مين ده؟ 
ده اعلان، اغنيه براحتي لكن أسأله للناس ليه لأ وكمان بستنى اجابة 😃

ملاحظة مهمة:الرسمة الأمورة دي رسمتي