فلسطين بالنسبه لي دلوقتي ما بقتش بلد عربيه فيها ظروف معينه محتلة من يوم ما اتولدت انا وأبويا و أمي الموضوع بقى اكبر من كده بكتير فلسطين كانت وجع دايم، غصة في القلب راحة منقوصة، خوف وزعل وقلق دايمين، فلسطين اني بحس انها قريبتي عمتي خالتي الجميلة اللي حظها قليل من يوم ما طلعت على وش الدنيا
من كام سنه حكت صديقة ليا أنها بعد فقدانها والدها كانت وعلى نوبات بتضرب الارض برجليها.. لعل البئر اللي بالعة يتفجر و يطلع لها والدها فتنهل من حنانه لآخر العمر
النهاردة وكل ما يصادفني او أشوف حاجة من اللي بيحصل الاقي قلبي دبدب بعزم ما عنده وخصوصا أن إسرائيل الله يلعنهم مش مخليين سقف لأي حاجة، ماعدش فيه ارض حد يدبدب فيها، فتخرج النعم..الارض أصبحت مقبرة ممتدة للأحياء و الشهداء
