المجاعة

 بحكم الصيام ومن غير سحور جعانة جدا، كل شوية جسمي يسيب وانام وارفع رجليا لعل الدم يوصل للمخ و شعور الدوار يزول

انا وانا ما اكلتش ييجي من ١٢ساعة بالكتير و صايمة ب إرادتي ولله وباترجى بصيامي رضا ربنا واتاخد مع اللي هترفع أعمالهم وهم صايمين 

أهل غزة صايمين قسريا من اكتر من ١٠٠يوم وبيفطروا على الفتات، اعلاف الحيوانات، و الفضلات في علب القمامة، ورق الشجر، بيتحاربوا على اكياس الطحين

المجاعة بتاكل فيهم حتة حتة بتاكل في أرواحهم قد ما بتاكل في أجسادهم

انا ليا يد في المجاعة زيي زي اي حد كان يقدر يهد السور وما هدهوش 

وانا واحدة لما بنت سور عيرة كان من ورق و كنت واقفة وراه مستنية اسمع أي صوت رجل جاية عشان أهده و افتفته لمليون فتفوتة..وما سمعتش واحنا هنا سامعين وشايفين و وبنعلي وبنصم وداننا و بنعمي عيوننا عنهم بس 

 

انا عايزة ربنا يغفر لي  .. وينجيهم من المجاعة

من الكاذب؟

 تسألني مرآتي كل يوم هل هناك أحد أجمل مني، وقبل أن أجيب تخبرني بأن لا ..و تعقب أي وجه يفوق جمال وجهك.. تكاد أن تضع قبلة على خدي إلا أنني أرى الخجل في عينيها يحول دون اندفاعها

تقف كاميرا هاتفي ساخطة تردد أي قبح هذا الذي تمجده المرآة، تتسائل متعجبة من كذب المرايا..أسمعها تتم بعبارات مازحة، أقف أمامهما في دهشة..أيهما أصدق..وفي أي صورة يراني الناس؟

انا الوجه ذاته، القلب ذاته، و الروح ذاتها إلا أن الصور تختلف.

بالأنامل

 

 

الحلو

بابا كان مدير منطقة طبية في وقت من الأوقات، وبالتالي كان مديري لمدة سنتين مثلا

امبارح وبدون مقدمات واحدة جديدة بتشتغل معايا وبدون سابق معرفة عملت مقارنة وطلعت بيها أن بابا مافيش زيه من غير ما تعرف اني بنته .. بابا مافيش زيه فعلا يكفي الناس اللي بتشهد له دائما.. يكفي اني وف كل سكة اصادف حد ما يعرفنيش يتفتح حوار تقول الناس فيه كلهم أنه طيب

اه خسرت طيبته معايا لكن الاعمار بيد الله و إنا لله وإنا إليه راجعون

هين وبيهونها على الكل ..انا بحب بابا وهو في بالي كل لحظة صحيح دموعي بتسيب لما حد بيذكره بالخير لكن في المقابل قلبي بيبتسم و ده كفيل يراضيني

يوم مهم

 النهاردة عيد ميلاد بابا 

يوم مهم.. مش عارفه ليه حاسة اني عايزة أحتفل بعيد ميلاده

بلف حوالين نفسي عشان اعمل كده من غير ما اقول انا بحتفل بايه

وده مش جلد للذات

امبارح قلت لهم إن بكره عيد ميلاد بابا هم ما نسيوش بس انا دائما فاكرة التواريخ وشغالة ريمايندر ليه هو قبل الكل 

حطيت ايدي على خدي بعد ما قلت..افتكروني بعيط عشان افتكرته

لقيتني برد إني مابنساهوش عشان افتكره

حاسة أن مشاعري مااختلفتش تجاهه يعني منين ما نتقابل هنكمل زي ما كنا.. انا بس مقهورة على أهل غزة ونفسي لو يبقى لي صوت يسمع واغير حاجة بس اكيد لربنا حكمة 

ربنا يثبت على عقولنا

الاماكن كلها مشتاقه لك

 انا بكتشف كل يوم اللي حصل، اول ما حصل اللي حصل كنت بقول العسول ده يجرى له كده!

على اساس يعني أن اللي مش عساسيل زيه عادي، و العساسيل لأ ..تفرقة عنصرية وحاجة هباب.. النهاردة مثلا لقيت  واحدة زميلتي جايبة لي هدية سبحة مكتوب عليها اسمي من ساعتها و انا مفتقدة بابا لا لشيء سوى أن الهدية دي لمست حتة جوايا ما لمسهاش حد قد بابا ..مع اننا كبيت مش بتوع هدايا اوي ..بس ايه هدية اكتر من بابا و ماما و أهلي .. ولهذا السبب بحب حب الناس لأهلهم، و بأيده جدا جدا وأحث عليه كمان..مش لشئ سوى إن الحياة بتحلى بيهم 🤍🤍🤍

غير ذلك

 بكره مش الفالنتاين و انا الصراحة مبطلة اهتمام والحاجات دي بس غير ذلك فتح المدونة على تدوينة الفالنتاين وحيث إني مبطلة اهتمام عموما ف قلت يا بنت ما يجراش حاجة لو تساءلت عن ماهية ذاك الغير ذلك يمكن يقول ويطلع حد نعرفه ونخلص

وحيث إنه فنان وانا مو بفنانة ف عايزة أسأله هل يوجد في قلب فيصل حب لمدونتي لدرجة إصراره اليومي من شهور على فتح مدونتي و التنطيط من تدوينة لتدوينة ولا ده محض صدفة حيث إنني جذابة وكلامي ساحر واللي يقرأني ما يبطلش لآخر حرف فتفوت 

ما علينا ما علينا ..أحب اضيف إني اتصورت مع الحمام صورة أمورة

وكتبت عليها أبيات الشعر اللي فضلت أرددها طول ما كنت بشوفهم

 

يا الله

 *الواحد عايز يدبدب في الأرض أو يرفص ترفيص اعتراضا على كل شيء بيحصل، خصوصا مع انعدام وجود أي سقف للقبح ف سقف اللي بتعمل بقى أعلى من ما نتخيل أجمعين
*النهاردة الصبح سحبت رغيف عيش وأكلته حاف، عشان أجرب شعور أن الطحين اللي بيعملوا منه الخبز أصبح حلم مش سهل يتوفر يوميا.. صبرت نفسي للآخر ..شبعت آه لكن لو بكره و بعده و في الغدا و العشاء كان رغيف الخبز ده كان هو المقرر المكرر إلى ما شاء الله هحس بايه
*طبعا ضيقة صدر أقل حاجة ..الفكرة أن ده الطعام ..طب أدوات النظافة اليومية و الخاصة، طب بلاش.. فراش النوم والملابس والأغطية، طب المزاج و الحالة النفسية، طب الطمأنينة قصاد كل المخاوف اللي حواليهم طب الأمان، طب الأهل والصحاب، طب الدواء.. امبارح كانوا بيتقاتلوا بالأسلحة عشان شوال دقيق..الله المنتقم من السبب
*طب قصاد كل ده احنا بنعمل ايه..حدود جديدة..و حدود جوه الحدود، وزيادة في القبح بنشحت عليهم..ما حتى لو بعتنا لهم مال هيشتروا بيه منتجات لحد امتى إذا كان مافيش طريق يدخل لهم أي خير .. حقيقي الواحد هيتجنن..كل يوم باسأل نفسي انا عملت لهم إيه ووصل لهم منه إيه وبرجع خايبة خالية الوفاض ولله الأمر من قبل و من بعد.