في فهم الذات النفسية_مجرد بسبسة_

*أنا مش عشرية .. لما يكون بقالي 3 سنين في مكان القطط فيه موجودين من قبلي علاقتي بيهم آخرها مجرد بسبسة .. بسبس بسبس بس بس بس فييجوا ياكلوا او يطلعوا من البيت من غير ولا لمسة واحدة .. ابقى مش عشرية خالص

*انا مش اجتماعية.. كل الناس عندهم موبايلات في البداية كان عندي فرحانة بيه بالميموري والكاميرا وبرنامج الصوت وبعد شوية بقى ابعد الثانويات عن كياني يعني الرصيد دايما منتهي ثم مش باشحنه .. ثم مش باخده 

*انا مش بغني انا مش بقول .. ماتخدوش في بالكم دي غنوة لمريم صالح بنت بتصرخ في المايك وماحدش بيقول لها تلت التلاتة كام

* أنا مش جريئة.. ضميري صحيح بيشتغلني بس انا مبسوطة  احسن من ال ضمايرهم ع الرف لكن في حاجات كتيرة حرمت نفسي بخجلي منها زي اني اروح لفرقة الانشاد  ف المدرسة واقول لهم خدوني معاكم عشان خجلانة افرض نفسي عليهم واخجل اقول عايزة آداب قسم مسرح ف الجامعة  واكتفي بالحلم  اني هبقى يوسف شاهين النسخة الاسلامية المعدلة ال هتوصل لجايزة زي نوبل في السلام 

*أنا مش بشوف أصدق من القمر.. متعة تانية انك يكون الشباك ال فوق راسك وانت نايم باصص ع القمر .. تخيل كده حراسة طول الليل

*أنا مش هنسى15-شعبان .. كل يوم زي ده كل سنة  كنت باحيي الليلة تحت القمر قدام البحر واصحى اصوم  .. أيام الاحلام ماكانت بسيطة ..يارب رجع الاحلام بسيطة