رقّاصة الفيس بوك

      

 تلك المرأة الشريفة"مبهمة التفاصيل" ترقص عارية القدمين بفستان أحمر 
الحقيقة رقاصة الفيس بوك بقت أساسية في كتير من تفاصيل حياتي ..لدرجة اني بفكر فيها ف وسط ما باتكلم مع أي حد حديث جاد جدا مختتمة ما أقول بيها وللعلم  والله الموضوع تخطى السف على الناس للقناعة التامة بإن "فاطمة مش عاجباني خالص يا ام فاطمة " بس هنعمل إيه 
* جانب من مواطن التماع رقاصة الفيس بوك في دماغي اليومين اللي فاتوا  دول:
١_في الشغل كان في تفصيلة صيانة بسيطة كده المفروض حد ييجي يعملها لنا عشان التكييف يبلي بلاءً أحسن..فطلعت على المكتب اعملها بنفسي بدل ما نستنى موظف الصيانة اللي يومه بسنة وأول ماطلعت فوق قعدت اتنطط فوق المكتب واقول "والشاب بيرقص ع الترابيزة والفلوس نازلة عليه وهيصة" 
٣مكاتب اطلع فوقيها و ينتابني هذا الشعور العجيب بالرغبة الملحة في التنطيط على الأغنية دي والمصيبة اني بنفذ في ساعتها ..طب اشمعنى الغنوة دي تحديدا وايه ال فكرني بيها ..ده انا ماعملتهاش ف بيتنا  ..الحقيقة زميلاتي _في تلك الغرفة المحرمة على الرجال_ تعاملوا مع الموقف بحكمة بالغة ضاربين كفا بكف بس في دماغهم 
وف دماغي رقاصة الفيس بوك 💃

٢_ من تلات ايام وانا بصلي صلاة استخارة  عشان ربنا يوجهني واعرف أوافق هيوفقني ولا لأ مع مثل هذا العريس يا ابوي  .. وبينما أنا منتظرة، رؤية و علامة، أو اشارة، أو تساهيل ..أو أو مما يجود به الله 
إذا بيّا بحلم بحد تاني غير أخينا ده ، يابني انا جبت سيرتك دلوقتي 
ده انا بقول فلااان الفلاي وبستخير ربنا بتطلع لي انت ليه دلوقتي 
الحقيقة انا وقفت صلاة استخارة وقلت بااس  كفاية كده  انا اروح عند امي لا تقول لي صلي ولا ما تصليش ننقعد سوا بالليل امسك العريس  واطلع مخاوفي  وتلك الحرمانيات الواجب تركها واللي هو متمسك بيها كشخص اتعاملت معاه من فترة وارفضه عن قناعة وبكده أكون رفضته بتلك العلامات الناتجة عن صلاة الاستخارة مش عن طريق الأحلام وطبعا في دماغي رقاصة الفيس بوك💃

٣_من كام اسبوع عملت لهم "سن بايتس" فينو مقطع شرايح ومعاه خلطة زبدة، توم، ملح و"زعتر أو جبنة أو شطة،أو سادة" وعملت الأنواع كلها ودخلتها الفرن واما طلعت عجبتهم وادوني كاس الاستحسان بتاع مش هنسيب فتفوتة حتىى لو محَرْوَقة شوية من الشواية وانبسطت انبسطت انبسطت والهنا والشفا والحمد لله..ثم بعدها بيومين ماما بتفتح درج التسريحة بتاع كتب الطبخ إذا بورقة دعايا سمنة ڤيرن عليها صورة شيف أمورة كده وفيها كام وصفة منها بالظبط ال"سن بايتس" لدرجة ان ماما افتكرت اني ممكن  اكون قرأتها  وناسية مش من دماغي ثم ابتسمت مشجعة  قائلة ده انت عبقرية اللي هو رقاصة الفيس بوك بقى💃

٤_شديت شوية مع رقية عشان حاجة تافهة فاتصرفت معايا تصرف ماعجبنيش فصعب عليا منها وقعدت اعيط على جنب ..فجات ماما تراضيني و ف وسط الكلام قالت لي انت عارفة انها محتاجة لك ده انت اللي بيحتاج دايما بتسنديه الحقيقة في لحظة لقيتني لميت دموعي ف منديل وجهزت لسندتها وانا بفكر في اني فعلا بسند الناس اللي بيحتاجوني سواء طلبوا أو لأ حتى وإن لم يكونوا كلهم بيعملوا معايا الأمر نفسه بس مش حاسة بالضيق ولا حتى بفكر في ده وكأنها وظيفة مش هات وخد زي عادة البشر وهنا يحسب للست ماما  تلك الطبطبة العاقلة جدا، وال خلتني كمان شوية لما اشتغلت أغاني فرح في الشارع قعدت أغني معاهم مستحضرة الشاعر الرخيص اللي جوا كل مصري أصيل  أول مرة يسمع الأغاني دي  من جوايا فطلع معظم الكلام صح ف رقاصة الفيس بوك بقى💃 

                                 فتكات التي لا ترقص في الشات
                                        

ويحدث

و يحدث أن يرفرف قلبي وكانما للتو سلمت على الرسول

https://youtu.be/1c_ReGuCNTc

قصاقيص "١"

❤بيوت لا تفارقها السكينة والضياء ..وتتنزل عليها الملائكة.!

تلاوة كتاب الله عموما وسورة البقرة خصوصا في بيوتنا سبب لنزول البركة  ودنو الملائكة منها  ونزول السكينة والضياء والنور والعافية والطمأنينة على اَهلها .!

عن أُسيد بن حضير رضي الله عنه : 
بينما هو يقرأُ من الليلِ سورةَ البقرةِ، وفرسُه مربوطٌ عنده، إذ جالتِ الفرسُ، فسكتَ فسكتتْ، فقرأ فجالتِ الفرسُ، فسكتَ وسكتتِ الفرسُ، ثم قرأ فجالتِ الفرسُ، فانصرف، وكان ابنُه يحيى قريبًا منها، فأشفق أن تصيبَه، فلما اجترَّه رفع رأسَه إلى السماءِ حتى ما يراها، فلما أصبح حدث النبيَّ صلَّى اللهُ عليهِ وسلَّمَ فقال : 
( اقرأْ يا ابنَ حُضيرٍ، اقرأ يا ابنَ حُضَيرٍ ) . قال : فأشفقتُ يا رسولَ اللهِ أن تطأ يحيى، وكان منها قريبًا، فرفعتُ رأسي فانصرفتُ إليه، فرفعتُ رأسي إلى السماءِ، فإذا مثلُ الظُّلةِ فيها أمثالُ المصابيحِ، فخرجت حتى لا أراها، 
قال : ( وتدري ما ذاك ) . 
قال : لا، 
قال : ( تلك الملائكةُ دَنَتْ لصوتِك، ولو قرأتَ لأصبحَتْ 
ينظر الناسُ إليها، لا تتوارى منهم ) . 

صحيح البخاري 5018 

اللهم اجعلنا من أهل القرآن ومن أهل سورة البقرة
واجعلها لنا سكينة ونورا وشفاء ورفعا لكل بلاء وشفاء
من كل مرض وعلة وداء يَاذَا الجلال والاكرام

على الهامش: أبَى الله أن أغفو عيني دامعة فأرسل لي آياته التي يعلم أنها تطمئن قلبي ..فوثقت

• القصقوصة رقم واحد

#في_تلك_الغرفة_التي_أكره، نتشارك كل شئ، كلماتنا، ضحكاتنا، طعامنا، حتى لحوم الآخرين
 وان كنت أغلق فمي عنها إلا أن صوت أناتهم الأخيرة مازالت واقفة في آذاني، تركل طبلة أذني معلنة عن حرب وحدي أعرف خصميها

 #في_تلك_الغرفة_التي_أكره،آكلي لحوم البشر هاؤولاء الذين ابتلاهم الله بي_"بشرية" لا تنصرف ليأكلوها_ولا تشاركهم الموائد ليعايرونها بما اطعموها .. وتخشاهم سرًا..أنتظر رصف الممرات نحو الأفق

 #في_تلك_الغرفة_التي_أكره تمتلئ معدتي برائحة لحوم الآخرين ..حتى وإن لم أتذوقها، 
أشفق على معدتي الفارغة من ذلك الشعور بالذنب الذي تأسد عليها ..ينهشها بلا رحمة فتتألم في صمت


 #في_تلك_الغرفة_التي_أكره، أتمنى أن ألفظ ما سمعت فكيف لي ان اعود إلى المدينة الفاضلة بينما أتوجه كل صباح نحو  كل هذا القبح والسوء 

 #تلك_الغرفة_التي_أكره،  سأذهب كل غدٍ مرغمة، سأتركهم نحوالحديقة التي هجرتها الفراشات أتصيد بأنفي رائحةالليمون المقاومة للقيئ، سأحيا كالجميع في المدينة المشوهة تلك الساعات مجبرة على مقاومة شعور الغثيان.. لن ألفظ هذا السوء ليتنفس ضرره برئ ولكني سأغير المنكر  بقلبي حتى يَحسُنُ التغيير.

فريكيكو

المدونة قلبت على مذكرات 💃💃💃
*٢٥سنة و ١٣يوم  وساعة و ٣٦ دقيقة يا مفتريين، فاضل لي اقل من خمس سنين على التلاتين ولسة ما عملتش الحاجات الحلوة ال عايزة أعملها 

*انا لسة بقاوم اني احكي عن جداول السنين ال فاتت وتفاوت انجازاتهم لذلك خليني اقرب الصفحة دي 

*بقى لي ايام بقاوم الكتابة عن رابعة، والحمد لله على اني قادرة مااكتبش
المهم
النهارده يوم لطيف، مخنوقة فيه من شغلي ونفسي اغيره، أسافر السعودية، والسويد، الهند، الامارات وقطر  و تركيا عشان اتكلم ال درسته في الجامعة،   عمان عشان صلالة، والمغرب والشوارع الزرقا ال تجنن وإيطاليا عشان البحر واللون الأبيض لوني المفضل  وبلاد الاندلس عشان ادحرج التماسي بإني أقول أشعار لسان الدين ابن الخطيب هناك، وأحود على فلسطين وأغني لها غرباء ولغير الله لا نحني الجباه، غرباء وارتضيناها شعارا في الحياة بصوتي 
  وبعدين لقيت اعلان ان كندا فاتحة دراعاتها للناس
ول يا ول
كان في موقع ظريف فتحته النهارده بيظهر رحلات الطيران في توقيت فتح الموقع، حاجة كده تغيظ وممكن من شدة الحقد  توقع لك كام طيارة
المهم اول ما حركت الخريطة لقيت ف وشي تركيا ..نعم دي لو خطة مدبرة عشان اتغاظ مش هتتظبط كده قعدت اتفرج عليهم وهم بيتحركوا ف السما واتمنيت الامنية اياها وقفلت عشان دي ارواح ناس ومايصحش كده

امبارح كان اليوم العالمي للناس اللطيفة اللي بيكتبوا بايديهم الشمال
عملوا لي يوم عالمي اهوه المهم في بوستات نشر الخبر منزلين ايد شمال و مكتوب عليها بالايد اليمين هههههههه طب  اديني عقلك طاه بس ما علينا الموضوع ده بس بيبسطني كل سنة ماعرفش ليه 

في البيت اتقال لي اني عبقرية عشان عملت وصفة من دماغي وبعدين فتحوا كتاب طبخ لقوها بالميللي 💃💃💃
موضوع الأكل ده تحديدا بيفرحني مش عارفة ليه مع اني مش فريكيكوا اوي يعني بس حاسة بالتقدم والله
🍕🍔🍗🍖🍟🍳🍲🍱🍘🍚🍛🍜🍝🍢🍡🍰🎂🍪🍩🍨🍧🍮🍹🍷🍯

اكتفي بهذا القدر من الكلام ال لا هيقدم ولا هيأخر عشان ورايا شغل
سلام عليكم 

قصاقيص٢

لما كنت بدرس كان في وسيلة من وسايل تضييع الوقت مشروعة أوي اسمه جدول المذاكرة، وهو عبارة عن جدول زمني بيحدد فيه الكتاب الكم و الكيف ووالمدة الزمنية القياسية، الهدف منه توفير الوقت لقضاءه في الوصول الهدف 

لكن الغريب ان الوقت كان بيضيع أغلبه في التنظيم وعمل الجدول، واللي كان دايما ما بيسعفنيش لأي سبب 

وفضلت كده لحد تانية جامعة، وساعتها فعلا  الموضوع اختلف لأني كنت بحقق ال مطلوب مني ف الجدول بنهم واذاكر بعده بحرية ..آه باكل الكتب أكل 

واما خلصت دراسة "وللعلم مافيش حاجة اسمها خلصت دراسة"

ابتديت اعمل جداول للحياة 
فيها كل ال اقدر اعمله وكل ال لازم اعمله ساعات كان بيبقى جدول سنوي زي ٢٠١٤   ماكانش فيه اهداف غير كام حاجة صغيرة و فجأة و ف نفس الورقة لقيته اتفرش انجازات اللي هو الله اكبر المحصول ربنا بارك فيه جدا و بردو في جدول زي جدول ٢٠١٥ اللي فشل تماما "أطلال" ثم جدول السنة دي اللي مش عارفة له موقع من الاعراب 
لكن بما ان كل يوم بداية جديدة
وهو أصل البني آدم العاقل ممكن يبدأ الصفحة الجديدة كل ما يحس انه محتاج صفحة نضيفة 
يعني مثلا السنة ممكن نبدأ من أول يناير ومن أول محرم ومن يوم عيد ميلادي ومن أول الأسبوع ومن أول مافتح عيوني..البدايات الجديدة مش عايزة غير ابتسامة وارادة 
ومادمت لسة بعرف ابعت اشارات من مخي لشفايفي ووجداني ف مافيش مستحيل
والنهارده بداية جديدة"اه و من نص الاسبوع" عادي
السنة دي الجدول اللي فات  كان اسبوعي  😃 عدد بسيط و متنوع من الاهداف لكن باسعى لهم يوميا 

            قمر الدين ده جدول بتحب يعني لو بتعرفوا  تحبوا 😍

بِه فتحة بَا: بطّة

اعتراف
وعدت خوخة بنت خالتي "بنوتة صغيرة" اني ماحتفلش بعيد ميلاد لأنها قالت لي ان الأعياد فطر و أضحى بس واني ممكن اخرج مع صحابي واجيب حاجة حلوة بعد كده و بصراحة عجبني كلامها اللي  مش جديد عليا ووعدتها  لذلك قفلت الاكونت ليلة ومنعت اي احتفال 
امنية العام: اعيش في المدينة الفاضلة 
تنبيه مهم:
الرجاء ربط الأحزمة عشان هنتمنخل كمان شوية و نحب نلفت الانظار للعناوين.
١٩٩١/٨/٣
النهارده في الشغل المفروض كنت هكتب تاريخ النهاردة في عدد لابئس به من الصفحات في أربع دفاتر كل دفتر فيهم ٢٠٠صفحة، ولأن النهارده يوم مش عادي في نص الشغل لقيتني كاتبة تاريخ النهاردة ٣/٨/١٩٩١ اللي هو ما بقيتش عارفة أهلك من الضحك على العقلية ولا ادبدب في الأرض على شقى عمري اللي راح في التواريخ اللي هتتعاد من أولها.
لما روحت افتكرت ان الموضوع ليه أصول قديمة، زمان لما كنت في ابتدائي واعدادي كنا بنكتب التاريخ الهجري جنب الميلادي المهم ان عمري ما كتبت التاريخ صح في شهر رجب الا دايما غلط لاني دايما كنت أكتب عزام لا اراديا بعد رجب يعني: 
٢٧من شهر رجب عزام 😂 
_كنافة بالمانجة يا بطاطا
عيد ميلادي باظ، عيد ميلادي باظ 
انا ما شوفتش كائن متصالح مع نفسه قدي انا والولد اللي عيد ميلاده باظ في فيلم الدادة دودي
في رمضان تكاتف العالم على تضييع آخر ١٠ايام في الشهر عليا، بفرض المفروض عليا واللي انا رفضاه لمبدأ وهدف شايفاه أسمى ومهما اتكلمت عن صدي ورفضي الاخر الواقع ب الخناق و العقل والعياط و الشكوى مش هيكفيني و أخيرا ورجلي فوق رقبتي عملت اللي اتطلب مني على طول وجه و بينما أنا عمري بيضيع أذا بيا بقرر أعمل كنافة بالمانجة 
المشهد: 
انا واقفة في المطبخ في شقة في الدور التاني يعمل كاسات كنافة بالمانجة 
في نفس ذات الليلة العالم بيقوم بمراسم تبديد حلمي في نفس المبنى في شقة في الدور اللي تحته 
 الوقت بيجري في اتجاه ساعة صفر هتتخلط فيها الحاجات المسكرة بعرق الجري في اتجاه غير للنزول الدور اللي تحت 
المكان نقطة الجبر "الدور اللي تحت" 
ثم : بضغط على زر إيقاف 
ويطلع مانجاية لنفسي  بقشرها واقطعها واللي السكينة ماتوصلوش اسناني بتجيبه و في بولة المضرب الكهربا اللي فيها باقي الكريمة بحط شوية كنافة و حتت المانجة و بالاسباتيولا بفصل نفسي و اتمزج بطعم و شكل البولة في حضني و حتت المانجة سايحة على خدودي واما خلصت أكل حد ابن حلال شغل زرار استكمال و نزلت واجهت وضحكت ف وش المخاطر 

_سأصير يوما بطريقا سعيد
"من حقي أجري واتشاقى وارقص بعياقة واتشعبط والخبط و اشخبط يوماتي والاقي حياتي وابتدي بقى أعيش "
الفترة اللي فاتت كان في ألبوم  بنزل عليه صور لحبة المعالجات اليومية للحاجات الوحشة وانشرها والحقيقة الموضوع كان حلو وخصوصا ان في ناس قالت انها هتجرب الحلول دي 
انا بحكي ده ليه دلوقتي.. نسيت 
وهذه احدى آفاتي، انا بنسى فوق الوصف، من اسبوعين نسيت فرح صاحبتي و للأسف افتكرت بعد ما الفرح خلص ونزلوا الصور على الفيس بوك لكن مش لدرجة اني انسى انا كنت هتكلم على ايه بعد ما اكتب خمس سطور تمهيد الموضوع 
يانهار أبيض! 
دوري
بمناسبة النسيان زميلتي دايما بتقول لي اني هنسى يوم فرحي، انا طول الوقت بصلي على النبي عشان افتكر لذلك ف نص كلامي مع أي حد صلاة على النبي ❤ 
و النص التاني بحاول افتكر ترتيب الكلام كان ازاي لذلك يحمد ربنا على اني ما باشتغلش شغلانة فيها تفاعل مع للناس 
ساعات بحس ان دوري تشبه لي في موضوع النسيان ده وان المؤلف كان فاكر انها حاجة ماحصلش فمايعرفش اني انا موجودة
وعشان الساعة داخلة على ١٢و سندريللا لازم تروح هكمل في فضفضاية تانية أكون مشيت فيها شوية في ربع القرن 
*