#استغفار_قبل_النوم

أستغفر الله العظيم الذي لا إله إلا هو الحي القيوم وأتوب إليه 

هنستغفر لحد ما نروح في النوم

#استغفار_قبل_النوم

لم يكن وصلك إلا حلما... بالكرى

كان في عازف اوركورديون 

بيعزف تانجو للسواح 

امبارح كنت بقول لزميلتي واحنا بندردش عن الاجازات ان الموضوع مرتبط بالنوم، يعني لو صحيت هاخد اجازة ليه، ما كده اليوم اتضرب، فين الراحة وانا صاحية بدري 

"اول ما بفتح عيني باعرف ان اليوم اتضرب" قلتها لها كده 

فسابت كلامي وشرحي  ومسكت فيها 

اول ما بتفتحي عيونك اليوم بيتضرب!

قلت لها آه 

وسكتت شوية 

وفتحت لها البلاي ليست ال عندي عشان تسمع اغنية المنبه

الكلمة طلعت عفوية بس مظبوطة بشكل عجيب كده و خصوصا

ان اغنية المنبه ال باصحى عليها مش تضرب اليوم بس 

دي تولع فيه كمان 

حد يصحى على هبة طوجي وهي بتصرخ !

عشر شهور وانا باصحى على صوتها بتغني اغنية كلها ضرب وحبس ورقص حماسي مش حالم أبدًا 

يع يا شيخة 

لأ وكله كوم و الكوبليه بتاع : 

في حلوة ناطره اخبار

من عاشق راقص وصار

ده كوم تاني خالص، وخصوصا اني فضلت ٦ شهور منهم فاكراها بتقول : في حلوة ناطرة اخبار من عاشق لقى صرصار 😂 

هههههههههههههه

وافتح جوجل كل يوم الصبح ادور على كلمات الاغنية و مالقاش كلمة صرصار دي واجي تاني يوم مدغششة وناسية اني ما لقيتش صراصير ف الغنوة امال العاشق ده جاب الصرصار  منين!! 🐜
اوووووف
.....

حين لذ النوم شيئًا أو كما                                

                                   هجم الصبح هجوم الحرس 
لسان الدين بن الخطيب

لا أنام

من كام شهر ، دندنت بغنوة لنجاة بتقول فيها" انت تروح وتمشي و انا اسهر ماانامشي ياللي ما تسهرشي ليلة يا حبيبي " 

لكن المرة دي دققت شوية في الكلمات و استغربت اوي منها هو انا ازاي واحدة زيي بتقدَّر النوم  تفكر تدندن بغنوة زي دي 

لكن من ساعتها وانا بقلق بمعدلات ثابتة، 

وبالرغم من ذلك بانزل اروح مشاويري زي انسان آلي مبرمج رغم السهر والارهاق 

ياخوفي لاتطلع دي بوادر سرسبة الانسانية مني، ماهو ال مايحسش بنفسه قريب مش هيحس بحد، انا محتاجة فرصة تفتيش عن انسانيتي تطمنني، يارب فرصة سعيدة

سعد عبد الوهاب قال : 

ياما ناس بتتقابل من غير معاد يجمع بينهم 

احلام يقظة: 

هو انا ليه ماحدش بيجيب لي ورد من غير ما يكون عارفني، ٣ اشخاص حكوا النهارده انهم جالهم ورد بالصدفة، مرة من طفلة ماشية ف الشارع، وواحدة من عجوز و التالتة لقت وردة ف الطريق

الناس ال قدموا ورد للناس دول مايعرفوهمش، قابلوهم صدفة، انا عايزة صدفة من دول.. وبغض النظر تماما عن كوني مش باقتنع "حاليا" بفكرة التعبير عن الحب بالورد زيي زي ابراهيم جوز يسرية بالظبط بل أبشع وخصوصا اني وانا صغيرة كنت بآكل سندويتشات الجبنة الرومي بالفُلْ وبحب شربات الورد لكن بردو ورداية صدفة، كده احسها رسالة ربانية تنعش انسانيتي فلحظة اشتياق للعلامات هتنفع 
فرشت رمل البحر ونامت واتغطت بالشمس
وصارت مثل النار اعصابي امتى الحلوة تحس
النهارده سمعت لحن غنوة لفريق واما كنت بحبها زمان اسمها "ده كلام"، واتبسطت عشان عجبتني تاني، وعجبني ذوقي زمان، اه بالحق انا حاليا ببص التفاصيل من فوق ومعايا غربال "منخُل" ببص بيه على تصرفاتي، واختياراتي، وتفاصيلي و بشوف ايه فيها لازمني وايه لأ 
المهم اغنية كاظم الساهر دي من ضمن تلك الحاجات ال كنت بحبها مع تشديد الباء الثانية مش اللحن بقى، الكلمات 
كنت بحسها حلم حلو سهل يتعاش ❤
*اه بالحق حلمت اني معايا طفل باحرسه وبأكله شيكولاتة بشفايفي زي العصفورة ما بتأكل بنتها 
ومش فاهمة حاجة بس مبسوطة باحساس الأم العصفورة ده احساس يعوض الحضن ال مستنياه 

...

آه بالحق الكلام ال فات ده كاتباه واحدة مطبقة "مانامتش" يومين ورا بعض ف أي كلام عجيب برجاء تطنيشه 

اقول لكوا!

افصلوا 😃

اسمع _ sound cloud

لذيذة من لذائذ الحياة

"هم النم يا روحي ياللا جايبة لك مم"

_جبت تلبينة "تنطيط ورقص للصبح" آخر علبة عند آخر عطار وصلت له بعد تدوير أكتر من شهر، ياااه الحمد لله، مش هشرح كنت طايرة من السعادة ازاي وانا مروحة بيها ولولا ان الرقص بجناحين مش راكب على علبة واحدة بس! وانا مايكفينيش منها المصنع كله لاكنت طيرت ورفرفت في الفضا تيرا 🎵🎼 

_ملوخية  ناشفة، خلينا نتفق انها مش احلى ملوخية ناشفة أكلتها، بس كون فيه ملوخية ناشفة في بيتي ده مطلق الأمان حاجة كدة الواحد بيحضن لها نفسه يتطمن ويطمن شعوب الكون المنتظرة تتطمن عليا كمركز عجيب للكون

_كورن فليكس صديقي الصدوق، فارسي المغوار ده النوع الوحيد ال بحبه

_تودو

جالي هدية تودو الجديد "مدور كده مش فاكرة اسمه ايه حلو وفكرته حلوة خالص وخصوصا انه فكرني بكب كيك كانت منزلاه هوستس واا صغيرة كان شكاه مقارب ليه كده و شكل البتاع ده هينافس التودو بالموز  بالاضافة إلى إن اتس هدية يعني ❤ ف الله بقى

ربنا يخلي لنا ال هدايا و ال بيجيبوها لنا 😍

ده شكله 

⬇⬇⬇⬇⬇⬇⬇⬇⬇⬇⬇⬇⬇⬇⬇⬇⬇⬇⬇⬇⬇⬇⬇⬇

_الشئ ال في الصورة ده  وملمسه فوق لساني⬇

مش هتكلم أكتر من كده

_الكيكة دي كوميديانة اصلا، شكلها وهي مبططة كده تعرفك قيمة الجنيه المصري كده وما آل اليه حال الجنيه 😂

مش هنزل صورتها من جوة و هسيبكوا للتجربة 😄

_ الشيكولاتة دي، انا ما بحبش الشيكولاتةأصلا، لكن دي روحي روحي روحي عشان بس الشيكوبون والمفاجآت اللطيفة ال جواها

_ شيتوس بالشطة: رفيق الدرب وصديق الدقي حبيبي وابنه حبيبي "ميني شيتوس" ❤

وهران وهران

وهران وهران رحتي خسارة

هجروا منك ناس شطارى 

.

كيف للا أحد ان يجيد غنائها، لست جزائرية ولكني أملك تلك الروح القادرة على الانتقاء، الانتماء أستمع اليوم إلى معظم من غنوها_لن أقول كل  على أمل ان يصبح الافضل موجود لكنه غائب_لأنتقي نسخة يمكنني أن أجد فيها الحالة التي أستشعرها حين أستمع إلى ذلك اللحن تحديدا فأستمع لها دائما، يدهشني موقفي  من كل من غنينها من المطربات خامة الأغنية فضفاضة على صوت نسائي، الشاب خالد ينقصه شئ وصاحب النسخة الأصلية ينقصه الآلات ليجيد اللحن، و اللحن يأسرني

وانا احاول اختصار الأمر في ماينقص كل مطرب ليعوضه الآخر فألجأ إلى استماعها متتالية من أفضل من غنوها لعتبرها وجبة دسمة تغنيني عن اضطراري للانتظار إلى أن يحين ويغنيها من يحسن أدائها كما أنتظر.

..

من التجربة الصغنطوطة دي لقيت نفسي بسألني هو ينفع حد يتشرّط على حاجة و يقول مش عاجباني بمجرد الاحساس من غير ما يكون فاهم ولا شايف ولا قادر يعبر عن ال عايزه حتى بجمل ليها لزمة ؟

فلقيتني بسألني عايزة الحق ولا ابن عمه!

_الحق طبعا 

طيب ده كلام مش منطقي ابدا لكن سيبك من الموسيقى لأن الموضوع له علاقة بالأذواق بشكل عام لكن في المطلق كله او ف الحياة تحديدا ازاي احكم على حاجة بإنها مش الافضل وانا ماجربتش الأفضل ولا سمعت عنه 

اه ممكن أكون في حاجة لتطوير النسخة القديمة لمواكبة متطلباتي لكن ماذا لو كنت ماشوفتش اي نسخ قديمة من أصله؟ 

ساعتها ده يبقى ابتكار جديد لكن اني ارفض شئ لأني بدور على الأحسن من غير ما ابقى محددة سبب لرفض ال قدامي ده منتهى الجور 

انا كده بجور على نفسي قبل الشئ موضع الخلاف لاني حرمتني اولا من متعة تجريبه حتى لو كانت تجربة صعبة و حرمت الشئ من فرصة حصوله على حقه ال اتوصف ليه ..ده غير ان في كل تجربة ممكن تطلع بحاجة جديدة و تطلَّع منه حاجة مختلفة تفيدك او  تفيد الآخر سواء كان انسان او مادة.

اغنية وهران طلعت منها بقراءت تجربة انسانية لسة مالهاش نتايج كاملة 

لكن ممتنة ل ال بيحصل.

الفيلم الذي أحبه ❤

خمس خطوات احفظهم وانساهم

حيرت قلبي معاك وانا بداري واخبي تيراريرا ريررا 🎶🎵🎼
بقى لي اكتر من ساعةبرددها وانا فاكراها بتقول ضيعت قلبي مش حيرت
ومندهشة اصلا لإيه ال جاب ام كلثوم جوة دماغي عشان تتنطط لي كده من أصله، ما علينا انا مش هبرر غير بإن في عيد حب مصري بيضيع و الناس متنكد عليها من امبارح و انا تقريبا بردو عمالة بصبر الكون و اقول بيت الفلانتاين لايمكن يتقفل طول ماانا عايشة ولا حياة لمن تنادي من اصله

 طيب !

 كيف تضيع قلبك في ٥ خطوات

١_تدَّعي
الفضل، الرحمة، الخير، الحب، الجمال، الحرية، السحر، ...... إلخ
ممكن يكون عندك من كل الحاجات الجميلة نسب بسيطة تحسهم قليلين لكنهم مظبوطين عليك بالشعرة ان حاولت تزود حاجة فيهم هتخل بنظام مالكش سلطة عليه هتطلع منه خسران كتر من مستفيد ..انت مش ملاك فسيب نفسك وارضى ده مش معناه انك تصر على انك تفضل شرير وتظهر ده، لأ ..لكن ماتمثلش يعني شوف ناقصك ايه وحاول تملاه بالشكل ال يعيشك عمرك كله مع حد او لوحدك مرتاح وراضي وفخور بنفسك لكن ما تكملش بقناع هييجي يوم وتزهق وتقلعه

٢_تتسامح عمال على بطال
القاعدة بتقول : زرجنة +اسلوب وحش =جحيم

ولكن مش في كل المواقف مطلوب منك فيها  ترضى، الرضا شئ كويس وياسلام لو انت هين لين لكن ساعات بتتضغط لما بتفضل توافق وتقبل حاجات ضد راحتك، سلامك النفسي، أو  فوق مستوى احتمالك وتبقى مطالب في المقابل ماتنفجرش لأنك وافقت باختيارك،  طيب تعمل ايه!
في حاجة اسمها صنعة لطافة 😉
صنعة اللطافة دي تقدر تقول بيها للشخص ال قدامك لأ  لأنك متضرر من طلبه ومايكرهكش و لا يعتبرك بتعانده ده مش في الطلبات المادية "الملموسة" لأنك طبيعي مش هيتطلب منك حاجة مادية تضغطك من أساسه او بمعنى ان ماحدش هيطلب منك حاجةمادية إلا لأنه بيقدرك ولك منزلة معينة عنده ياريتك بس تفضل شاغلها   حتى لو كان الطلب المادي ده طلب  ظاهره سيئ زي نزل الزبالة  مثلا فإن اتطلب منك ده بيكون لأنك/لأنِك ابني الراجل، بنتي الجدعة "فمانراوغش يعني ونسوق فيها 😂"، لكن  بيكون دايما في المعنوي ف الموضوع صعب احتماله لو ضغطت نفسك و ف نفس الوقت الهروب بصنعة لطافة بسيط جدا المهم تكون فعلا صادق .
٣_تقلل من نفسك
في فروق كبيرة مابين انك تبقى متواضع ومابتزكيش نفسك و انك تقل من نفسك، ادي للي قدامك قيمته ولكن في الحدود ال ماتاخدش من قيمتك انت
في حد من فترة قال قدامي ان كل ال بنعمله كويس في حياتنا بنعمله عشان في المقابل نسمع كلمة تقدير، في حاجتين لازم ما تفوتهمش
اولهم ان الشخص ال قدامك يبقى فاهم وعارف ومقدر قيمة ال عملتهوله مهما كان حجمه ويسمعك او يحسسك بتقديره ده بحد اقصى ف اول مقابلة هتشوفه فيها سواء كانت بعد سنة او تاني يوم  مش هنقول في ساعتها وخصوصا ان مش كل الناس بتكون سريعة في رد فعلها "فروق فردية تُحترم" زي ما انت فاهم و عارف ومقدر قيمة ال عملهولك مهما كان حجمه وتسمعه وتحسسه بتقديرك ده تماما
والتانية تتكلم عن نفسك كويس وانت بتدي له قيمته سواء كان احترام او تقدير او ذكر محاسن بالقدر ال يخلي ال قدامك لا يستصغرك ولا يتنطط عليك
انا مش همشي اقول للناس انا جدعة لكن مش هقول لحد انت اجدع مني، احنا مش بنقارن احنا بنود بعض..فممكن نستبدلها بجملة
" انت عطوف جدا، صدق ال قال الطيور على أشكالها تقع انا كمان عملت كذا وكذا وكذا ..."
فكرة انك تدخل لعقل حد انك تحمل صفاته الكويسة ده هيخليه يسعى انه يبقى كويس لأ كمان أحسن معاك ..يعني كأنها منافسة طيبة هتبدأ بينكوا الناتج عنها كله خير.

٤_تلغي عقلك
البعض فاكر انك عشان بتحب انك ما بتفكرش او ما بتعقلش او ما بتقدرش، في فرق ما بين واحد غبي وواحد طيب ..ماتخليش حد يضحك عليك ويقنعك انك هتبقى حنين من غير ما تفكر بالعكس تفكيرك هو ال هيخليك تكون أحن ..زي مثلا ازاي من غير ما تضيع قلبك، او وقتك او طاقتك تعمل اقل الخطوات ال توصلك لأفضل النتايج ..ازاي تثبت لحد انك بتحبه بأكتر تصرفات هو محتاجها مش هقول ان للعقل الغلبة لكن تشغيله و اللجوء إليه هيساعد في تعزيز علاقتك بقلبك ولكن بردو ماتسيبلهوش مقاليد الأمور لأنه لوحده عمره ما هيوزنها يعني تقدر تمشيها ب ٢٩٪عقل وهتدور معاك زي الفل


٥_تزق لوحدك اليوم

في فيلم يوم مالوش لازمة، كان ال طالع على البطل جملة زق معايا اليوم ال بيقولها في كل خطوة ومهما زق اليوم هو وكل اللي حواليه ماكانش بينفع بردو
انا ما بقولش تستسلم ولا تخذل ال قدامك ولا تسيبه وتمشي من اول خبطة لكن في علامات كتيرة ممكن توجهك للصح من الغلط توجهك للي هيكمل من ال هيقف توجهك للي هيكمل مرتاح ولا هيكمل بالتعب والغلب
اصلها لو يوم واحد بس ال هتزقه تمام لكن المشروع كله انت بس ال بتزقه !
ده بقى يبقى اسمه ايه!!
وده يرجعنا لل٢٩٪ عقل ال بيخلونا ونعرف هنتصرف ازاي هنقف ولا هنغير الخطة ونكمل بطريقة تانية
في واحد  من ٣ سنين تقريبا في لقاء في التليفزيون كان بيقول انه هو وخطيبته بعد ما اتخطبوا بفترة مروا بمرحلة فتور  خلتهم هم الاتنين مستتقلين يردوا على بعض حتى فكان في حل من الاتنين يا بيكملوا زهقانين يا مايكملوش كنتيجة متوقعة سواء استعجلوا بقى ولا طنشوا وهنا طلب يقابلها وقال لها بصراحة انا حاسس بكذا كذا،  عايزة تكملي قالت له عايزة طبعا ياباشا فكتبوا ف ورقة خطة جديدة  واتكلموا ف كل التفاصيل وبكده نقول انهم زقوا مع بعض كام يوم الفتور من غير ما يضيعوا قلوبهم

تدوينات مش هتلقي ال يقرأها "٢"

•  الصدق

من صغري وانا مفتونة بالصدق،مش علشان الكذاب بيروح النار او خوف اصلا من شئ، الفكرة كلها كانت في درس عربي او دين مش فاكرة  خدناه ف ابتدائي بينصح بالصدق و بيستدل بحديث عن الرسول صلى الله عليه وسلم بيقول :
 ” آية المنافق ثلاث إذا حدّث كذب وإذا وعد أخلف و إذا ائتُمن خان" 

كان عندي حاجة أكبر من المخاوف من اني ابقى منافقة، وبعدين أعجبت أكتر بفكرة  اني اقول الحق حتى لو صعب جدا وهيوقعني في مشاكل فبقيت أصرح جدا 

في يوم في الشغل جالي تحقيق  والمفروض في صيغة معينة اقولها بس مش الحقيقة وان قلت الحقيقة هتسبب لنفسي ف مشكلة فقلت الحقيقة بردو  

الكذب ممكن ينجي لكن مش هيعالج لي وجع ضميري لما يفكرني بإني كذبت 

ووجع الضمير ده هو السبب في إني فاكرة مثلا كذبت كام مرة ف حياتي منهم مرة اتراجعت عنها بهد يومين تلاتة مثلا ولسة ضميري بيفكرني بيها

أيًا كان الضرر ال هيلحق بيا لو قلت الصدق هقوله بمنتهى القوة والتحدي ..في شغلي بيستغربوا جدا اني مش معقداها و ف نفس الوقت ممشية حياتي صح 

في البيت بيعتبروني صفحة بيضا 
الصدق ممتع لذلك الحد ال مخليني بحس كاني راكبة لعبة بتخوِّف ف الملاهي ..  خايفة وبضحك ف نفس الوقت واثقة ومش هقع 

تدوينات مش هتلاقي ال يقرأها "١"

• المساواة

ال اعرفه عن العدالة والمساواة ماكانش معلومات في صورة نصايح او محاولات تربوية ولكن كانت حكاية عن جدي بتقول:
جدو كان ناظر مدرسة في المنيا و كان حازم جدا، له هيبته وقواعده وقوانينه ال لازم المدرسة من اولها لآخر حد فيهايلتزموا بيها و  ماما في يوم بتتأخر عن المدرسة  فبيعاقبها ويضربها عصاية زي ما عاقب باقي زمايلها المتأخرين بالظبط
جدو ما ضربش ماما عمره في البيت، لكن لما جه وقت العدل نفذ حكم العدالة وساوى بينها وبين باقي الناس
ماما حكت لي الموقف بتفاصيله كلها من اول السبب لحد تقل العصاية على كفها
فلقيت نفسي كده باسعى للمساواة، اللي مشي على غيري لازم يمشي عليا
خطأي مش أصغر من أخطاء الآخرين فليه ابقى قرع عسل ف وسط الكوسة
"على أساس ان قرع العسل أحلى وكده"❤

ليلة عيد الحب المبارك

سلام عليكم 

بكرة الفلانتاين 😂

فلاش باك ٤\١١\٢٠١٢ نهار او ليل _مش فارقة_داخلي
تصوير من بعيد وزوم على وش بنت بتلقط صورة بموبايلها النوكيا التعبان لحاجة مش مفهومة.
 في اليوم ده صحيت الصبح جهزت للشغل واما نزلت الشارع ومع اول خطوة رفعت راسي للسما شوفته، القمر واقف في السما الساعة سبعة وربع الصبح  وكأنه سهران ومطبق ومستنيني، ماخدتش وقت على ما فهمت انه عايز يهنيني بعيدنا سوا
 لما وصلت واتكلمنا انا وزميلتي، طلعت حبة ورد مجفف على بلاستيك على مش عارف ايه ولعب كتير وفجأة برتبهم بشكل معين في الوراقة واقرر اهاديني بيهم كهدية عيد الحب ال عمر ما حد هاداني فيه و بعدين بطلع الموبايل وتراااك📱📷📹 بصورهم
الأصل ف الحواديت
مش فاكرة امتى اول يوم سمعت فيه عن عيد الحب ده ..اعتقد من شريف مدكور لما كان بيطلع على قناة النيل للأسرة والطفل كان جايب يومها دبدوب كبيييير اوي كهدية ينفع حبيب يهادي حبيبته بيه ف يوم زي ده
الدبدوب كان اطول من التلاجة ال ١٤قدم بتاعتنا ..للحظة ما قلت هيييح
ماهو بردو الدبدوب التختوخ ده لو الواحد فرده ونام عليه هيبقى اريح من المرتبة القطن بتاعة سريري ..طب ايه الحل احب مين دلوقتي !
وفاتت السنين وانا بدور على حد ينفع يتحب مابلاقيش كليًا تماما خالص مالص  بل بالعكس كنت باقرف لو مجرد تخيلت الحالة نفسها، في المقابل بقى كنت مبسوطة كمان اوي ان مافيش " غريب مش كده!"
*اه بالمناسبة !
كان من ضمن الهدايا ال عليها طلب حمار لونه رصاصي كده وكان شاغلني اوي مين ده ال ممكن يهادي حد بيحبه بحمار ..او "جحش" على اساس انه صغنن وكده وخصوصا ان الهدية بتعبر عن صاحبها
في الجامعة
فضلت الرغبة الملحة في هدية عيد الحب ملازماني، مين  هيجيب لي هدية عيد الحب وهكتشف فجأة انه بيحبني وجايب لي وردة من على سلم الجامعة! مين ها مين
 لايمكن حد كان يتجرأ يعملها ولا عمره كان هيحصل  لاني ببساطة ماكنتش بدي لحد فرصة يقول لي سلام عليكم و كنت بزعل جدا من اي صديقة بترد السلام على اي زميل، بل كنت باحزن حزن دفين عليها كأي بنت اتربت في مدرسة اسلامية عريقة
فطبيعي جدا عشت باتفرج وبس وبحلم بان حد هيديني وردة فهفرح بيها للأبد بس نوع الحد ايه ماعرفش بس مؤكد كان لايمكن يبقى ولد 😂
(بصراحة ، ولجل ما اكون صادقة الكلمتين الجايين هم دول ال عايزة اقولهم في الوقت ده "النهارده يعني تحديدا" و المواقف ال فاتت ماكانت الا مقدمة مفتعلة وان كانت حقيقية  عشان اعرض الصورة دي  ال لازم انشرها كل سنة في نفس اليوم دي" فركزوا بقى ف الكلمتين ال فارسينني وانا شايفة معظم صاحباتي المرتبطين المتمرمطين بتنهار احلامهم ف لحظة لمجرد ان " إنا لله وإنا إليه راجعون طلعنا من البلد ال لسانها سالك وجيبها معقود"

ليلة العيد
النهارده صحينا على خبر تعويم الجنية، واحنا على فيض الكريم كده كده يعني لكن بردو زعلنا لما عرفنا ان الوردة ال ماجاتش بقت اغلى الضعف و حبة الأمان هينزلوا النص والفرحة المنتظرة هتيجي بعد ضعف المسافة و ونص الكلام مابقاش يطمن
في ليلة عيد الحب بلدنا الموقرة باقتصادها ال يشرح القلب  قررت تنزل نسبة ال هيتوجوا حبهم ببيت وعيلة وفرحة  وعيال للنص
في ليلة عيد الحب، كل الاحلام بقت أغلى الضعف، وكل الوعود اتخسفت للنص، عش العصفورة بقى نص العش واللقمة الصغيورة بقت نص لقمةو الباقي خيالات حتى الحب هيبقى نص الحب 
وهيبقى عال اوي كده وبوسوا رجلكوا وش وضهر غيركوا مش لاقي
في ليلة عيد الحب، ال مالوهش كبير مش هيعرف يشتري واحد بنص السعر 

وال مالوهش ضهر هيفضل الحال كماهو عليه فمايحاولش الله يخليه

الخلاصة لهم ولنا ولكلنا الله 

ومنه لله ال كان السبب 

سلام عليكم 

💃