الشيطان ابن الهبلة

_عمال بيفرجني على المقص كل ما قلبي بيوجعني 
_عمال بيقنعني بإن  فيه طرق هايلة مؤلمة صحيح بس بتخلص من كل الالام
_عمال بيلفت نظري لأزايز الدوا الموجودة في بيتنا بوفرة 
ما يعرفنيش والله 
ما يعرفش ان يقيني بالله يقيني 
ما يعرفش ان الانتحار ضد مبدأي المتمثل في العند في اليأس 
ما يعرفش اني يوم ما هفكر اعمل حاجة ف نفسي هتبقى اني اشرب لتر حاجة ساقعة او قفص فاكهة ولا طبق خوص مليان بلح اسود 
ما يعرفش ان قلبي بيخف لما بضحك وما بيضحكنيش الا تصرفاتي 
ما يعرفش ان الحياة ممتعة ومتعتها في احتمالها  وسكون الأمل جوايا قادر يشغل فتيل الاستمتاع بضحض الاضداد 
ما يعرفش اني قد كل مرحلة وكل هوجة وكل ضعف وقدود 
على رأي سيد حجاب: واهي ماشية وبتعدي "صدمة ف لطمة ف قطمة"