1
هو انا ينفع اروح لواحد اقول له اني مشتاقة له؟
لأ، مين ده؟
عصير القصب
"نكسة"
🍀
2
اتنافس يوميًا مع العصافير، أي منا سيصمد بجوار الآخر أكثر
أقفز في انعكاسات قوس قزح على بقاع الماء بيننا ف تشيح الحمامات بوجهها لائمة حماقاتي الطفولية، تردد"مش هتعقلي بقى يا بنتي"، أرد في نفسي فأنا أكره تلك اللغة الحزينة،
"لأعوام مضت وانا أحلم بلمسة مشابهة تتذوق فيها أقدامي أطعمة الأرض المختلفة فتذوب فيم اشتهت".
تعيدني لوعيي لا لهلعي خيوط العنكبوت التي تشرد أصابعي لتداعبها بينما أقف مشدوهة أترقب روعة الغزل، وأهرب قبل أن يعرفني العنكبوت صاحب البيت، الحياة مغامرة طيبة، حتى ان مخاطرها لاتخيف لكن تدفع الانسانية للانفعال، وأنا أميل لانسانيتي أكثر
الحياة أجمل من أن أفوتها في الانهيار، الانتظار، والانتصار للذات ..سأصرف عقلي عن تلك الحماقات لألتفت للحياة "حياتي كما يجب أن تكون"
من الجيد أن أجد في ذكرياتي هذه الكلمات فاستعذبها وأحب نفسي حبا فيها
"نصر"
🍀
3
شغلي اتنقل لمكان تاني وحش خالص ومش بحبه ومفيهوش زرع
"نكسة"
🍀
4
عارفة
كل اما بستناكي بتخيل
النيل ده جمهوري
اسبوت نور الشمس فوق عيني فماشوفش حد ف اخاف
والعبَّارات بينظموا الزوار
والناس أُجَرية
بيأدوا واجب بس
بيصفروا وبيهتفوا باسمي
السما منتشية ع الآخر
وعند بيت عارفاه
تطالبني اني اعيد
والطير يغلوش يخطف السوكسيه
انا فاهمة كل الموجودين
لكن بلوذ بالصمت
"جزء من القصيدة"
ودي كمان من المرات القلائل ال بنشر فيهم شعر على المدونة
كتبت شعر
كنت خلاص زهدت واعتبرتني مش هكتب تاني وشلت من بالي موضوع الكتابة ده للأبد
لما كتبت اتطمنت شوية وحاسة اني اخف بكتير
"نصر"
🍀
5
آخر مرة كتبت فيها ف المدونة كانت الكنز الفريد ك أحلى حاجة ف حياتي المرة دي حابة اجيب سيرته بس من خلال الرسمة دي
الرسمة ف اكتوبر 2019
والنص ف يونيو 2019
ودي آخر واحدة وعندي أمل أكملها
ودي آخر واحدة وعندي أمل أكملها
وعدم اكمالي ليها لحد دلوقتي
"نكسة"
🍀
6
بطلت بيبسي ومشروبات غازية
"نصر"
🍀
7
شوفت من حد غالي عليا على مستوى الصداقة أقبح وجه عنده
"نكسة"
🍀
8
بتمرن صوت يوميا مع نفسي وراضية عن نفسي بنسبة 25%
وزيادة ف الزقططة سجلت حدوتة كنت كاتباها من كام سنة هنا
وزيادة ف الزقططة سجلت حدوتة كنت كاتباها من كام سنة هنا
"نصر"
ثلاث قبلات
"فرهود"
"شاورما"
"شهاب"
وألف وتسعمائة وواحدة وتسعون نجمة في سمائي
ليست هناك تعليقات:
إرسال تعليق