من حوالي سنة تقريبا فتحت أكونت بنت اعرفها لقيتها مشيرة بوست يوميا لصديقة ليها بتدعي فيه لصديقتها دي بالرحمة ف بالتالي كل كام يوم فيه حد من الاصدقاء بيفتكر ف يدعوا لها بالرحمات ، بصراحة من سنين وانا قافلة كل الاشارات اللي بتتبعت لي لنفسي بحيث اني اقرأها الأول واشوف مناسب اني أنزلها عندي ولا لأ
لحد ما شوفت كلام البنت دي وساعتها فكرت في نفسي، أولا لو توفاني الله النهاردة ماحدش غالبا هيعرف لاني قافلة الاكونت وبالتالي ماحدش من المعارف هيعرف ف يدعي لي حتى بالرحمة، وده شيء محزن للغاية ومخيب جدا
هوالانسان عموما اللي بيبقى له أبناء بيفتكره جيل واحد من الدنيا متمثل في أولاده وحبهم ليه فيفضلوا يبعتوا له الرحمات والمحبة
وحيث اني لسه ماعنديش محتاجة أعمل حاجة تخلي حد يفتكرني بالرحمة، حد واحد يترحم عليا باستمرار
ف ربنا يا رب يغفر لي ويرحمني ويرضى عني
من شوية كان فيه شاب بينعوه باعداد مهولة على فيس بوك وكانوا كلهم بيقولوا حاجات جميلة عملها معاهم، انا صراحة كانت صوره اللي مليانة طيبة ماحصلتش لافتة انتباهي أكتر، وقعدت اقول لنفسي يا ترى لو انا كنت من أهل قريته او بلده كنت هعرف انه طيب من اول نظرة كده، ولا بس لأن رحيله شاب وجه كل عواطفي في اتجاه ان قد ايه وشه كله طيبة وبالتالي فعلا ممكن يكون ادى رسالته الخيرة من الدنيا ف ربنا اصطفاه بجنة مبكرة .. اللهم ارزقنا الجنة
طب هو انا وشي طيب ؟
مش عارفة
كنت باحكي ل صديقتي ان صديقة ليا كتبت عني اني طيبة ف قالت لي صديقتي انها بتحس ان انا طيبة وجدا كمان
صراحة انا بخاف اصدق حاجة زي دي مش جلدا للذات انما تأدبا مع الله وتأديبا لنفسي كفاية عليا طول الوقت منعي لنفسي ان انا ابقى شريرة .. الحمد لله على ده جدا والله واللهم ديمها نعمة ويارب ما يزين لي الشيطان السوء أبدا
عشان الشيطان ممكن يلبس الشر لبس الخير ويسحر لك ف تشوف نفسك او غيرك أخير الأخيار وده مرعب جدا جدا
انا بحس الطيبة كسوة بيضا ناعمة تدفي وحنينة ف يا رب ارزقني بيها فعلا
ليست هناك تعليقات:
إرسال تعليق