الكارتون لا يزال في قلبي

ادخل مسرعة نحو غرفتي لالتقط هاتفي لأصور لقطة من فيلم corpse pride
لأدعو الجميع لمشاهدته قبل نهايته، ثم استوقفني لأسألني:
كارتون ايه اللي لسة اصحابك بيتفرجوا عليه ده!
أحب طفولتي جدا، حتى انني لازلت أتذكر نصوص دروس اللغة العربية كاملة في الصفين الأول والثاني الابتدائي، أحب أساتذتي، ذكريات طفولتي و أفكاري، كلماتي وحتى مخاوفي..حتى ان اطعمتي حين كنت طفلة هي المفضلة لدي حتى الآن
إن طبقًا من "كورن فليكس" في الافطار أفضل عندي من ستيك من ما أعد  ، يكفي رائحته التي تأخذني لعالمي الخاص..لازلت أبلل البسكويت بالماء قبل التهامه
لا آكل الزبادي نهارًا إلا ممزوجا ببسكويت الشاي ، االآن مثلا أفتقد بشدة  ملاعق" السيريلاك"
أما الكارتون فمتعتي الأقرب، منذ أعوام و انا أ حلم بأن يصبح لي حبيبا أشاركه الذهاب للسينيما لمشاهدة أفلام الكارتون ..الآن و انا بلغ من العمر ٢٥عامًا يرقص قلبي كلما أعادتها صديقتي الودودة على مسامعي " انت شبه چين" ❤
*
جين: حبيبة طرزان
لذلك ليس لأحد ان يندهش من تكراري مشاهدة أفلام الكارتون، او الحديث عنه بشغف سياسي يناقش ملابسات حزن محمود عباس و سامح شكري على شيمون بريز..لأن الكارتون لايزال في قلبي

                                               احم احم 😊 عيب

عزيزي ليو

عزيزي ليو لايكة،
تحية طيبة وبعد 
أولا احب أهنيك برأس السنة الهجرية ال هتكون يوم الحد ال جاي، في الرسالة الجاية عايزاك تقول لي هتقضيه ازاي..هكون ممتنة لو شاركتني خططك.

النهارده فكرت فيك كتير، مرة الصبح وانا رايحة شغلي..ومرة وانا بقرأ الرواية الجديدة و مرة وانا ف الطريق رايحة اشتري حاجات من حلوان، ومرتين تلاتة وانا مروحة و مرات كتيرة وانا ف البيت.

عزيزي ليو، في رسالتك الأخيرة قلت لي اني أنانية لأنك بتشاركني كل أفكاري و ما بشاركاكش أي تفاصيل  و ده ضايقني رغم ان عندك حق.

انا في البداية كنت بسأل نفسي هتستفيد ايه لما تعرف شكل البيانو ال باقعد عليه انا و برنهارد في عطلات الاسبوع لكن انا كمان هستفيد ايه لما اعرف هتعمل ايه في رأس السنة الهجرية مثلا!!

معاك حق البنات في مصر راسهم مشوشة زي ما بتقول .. ده مش من قليل والله 

على كل حال هحكي لك عملت ايه النهاردة ..و تقدر تبقى تسأل على تفاصيل لو حبيت في المراسلات الجاية 

النهارده يا سيدي مثلا، مشيت افكر لحد الشغل وهناك شلت اوراقي ال بالمناسبة خلصت كل شغلها امبارح لحد ما فعليا دماغي فصلت وجسمي اترعش ودي حاجة حلوة مش وحشة.. النهارده بقى قررت أستثمر النجاح ده واحتفل بآخر يوم ف الشغل وانا فاضية، بكمل الرواية 

و ف نص الرواية قررت اكتب لك، فطلعت النوت ال فيها تفاصيلي وكتبت حاجات عنك.. لحد دلوقتي مش هقدر اقول لك هي ايه

بعد الشغل ركبت مواصلة كنت مهبطة فيها ولما نزلت تهت شوية على ما ركزت هروح ازاي للنمرسي، تخيل كنت فاكرة ان اسمه فينوس وكنت عايلة هم اني اشتري من حد مش حابة اسمه .. تلاقيك مستغرب او بتخبط كف بكف وتقول البنات 

و أخيرا اول طارة تطريز تاتاتاتاه تش🎆 

ما تعرفش فرحانة بيها ازاي..عمالة بقى لي ييجي شهر باتفرج على مقاطع فيديو فيها شروح تطريز..اما روحت قعدت احاول أجرب التجربة الأولى على كيس مخدة قديم ..مش هوصف لك ماما اتبهرت ازاي و قررت تستعمله و تديني نصايح للمرات التانية و ال بهرها كمان اني طلعت ٦ألوان مختلفين من بكرتين خيط بس وده انجاز يعني ف المرة الاولى

اه بالحق مرفق بالسالة صورة للمحاولة الأولى و ال كانت عبارة عن ٣ وردات يسعدني اهديك واحدة منهم، انا خمنت اي واحدة هتختار فياريت تبقى تقول لي خليني اشوف تخميني صح ولا لأ

ف آخر ليوم غنيت لاصحابي سطرين تركي 😂 

فمبسوطة اني اتجرأت و عملت كده 

غنيت تركي آه بس راجل اوي احسن صورتي الذهنية عندك تتحول من فاطمة ل ميمي ابن طنط فكيهة تبقى مصيبة 

طولت عليك النهارده بس  عايزة اقول لك لعبت مع نونو سنتين ونص و ده مفرحني جدا وخصوصا انه انسجم معايا جدا جدا ..الواحد عايز يزود علاقته بالاطفال في ال cv بتاعه 

أخيرا بقى وليس آخرا  هسألك سؤال، هل و انت صغير كان عندك حاجات مش تقليدية ممكن تربطهم ببعض ؟

زي مثلا رقم تحس ليه علاقة بشكل او حرف اولون ولا لأ ..لأني وانا صغيرة كنت باعمل كده 

فكان رقم ٣=الازرق=المثلث

رقم ٥=الاحمر=الدايرة

و هكذا 

لكن الجديد بقى خامات صوت الناس و الالوان 

عندك مثلا محمد الشرنوبي صوته عامل زي الآلات الوترية مش عارفة جيتار ولا عود يمكن عود او جيتار على شدة وتر راخي. شوية  و زي وشوشة الودع لكن الجديد ان صوته عامل زي الشاي بلبن لما يبتدي يبرد يبتدي مش يتلج و بمناسبة الشاي بلبن انا من زمان وانا مسمية درجة لون معين باسم "شاي بلبني" 

و آخرا يا ليو علامات التنصيص ال سألت عنها في رسالتك الأخيرة استفزتني فياريت ماتعملش كده تاني 

طابت ليلتك 

المخلصة

إيمي"فاطمة مؤقتًا"

...
ملاحظة مهمة: لفهم الرسالة كليا برجاء الاطلاع على رواية نسيم الصبا
وبالمناسبة كل ما يخص ليو مستقى من الرواية فقط، ولا وجود له على ارض الواقع.
و لفهم ملابسات كتابتها برجاء قراءة أول تعليق

قصاقيص ٤

"١"
أخيرًا أقرأ المقال_تسرد فيه الصديقة تلك الواقعة التي تعرضت لها من هجوم البعض وكيف خففت كلماتي عنها متخذة جملة من حديثي معها كعنوان جانبي شارحة كيف كان وقع كلماتي عليها وعلى قلبها  بينما هاجمها الجميع_فتدمع عيناي سعادة  وحماسًا  لأستمر

"٢"

"عليا النعمة اللي وصل لك الكلام ده عايز يشتمك و بيجيبها لك بطريقة غير مباشرة"

 أقولها بانفعال لتلك الزميلة التي تلهث وراء شكوكها في كل من لا تحب،  أقولها متخطية كل حواجز الحوار التي وضعتها لنفسي

لا إراديا أنا أكره الغيبة .. يتغير لوني، ربما أتوتر وقد تصبح فوبيا عندي وحدي في كل هذا العالم ..في المقابل أحاول بكل ما أوتيت من قوة أن أصرف الحديث نحو مجرً آخر فتارة أنجح وأخرى أُفْضَح ، فأصبح أصرح كتلك المرة رغم محاولاتي عدم النظر نحوها ولكن المدهش انها تراجعت محاولة شرح وجهة نظر أخرى تدفع عنها فعل الغيبة ف أفهم ان لوني قد تغير حقا فصرفها عن ذلك الخطأ

فتدمع عيناي سعادة وحماسا لأستمر

"٣"

نبع  الفرح فاض من عنيه، لما النبي طبطب عليه و برحمته وحنيته صفين ملايكة بين ايديه

م الحب ليه تستغربوا، و م الحقيقية بتهربوا سيدنا النبي في بيت الصبي وكل ليلة بيلعبوا
أعوام مرت على أول مرة سمعت فيها تلك الاغنية ف اهتز جسدي اختلاجًا وادمعت عيناي تأثرا ..فأحمد الله على كونه مازل شعوري حاضرا فتدمع عيناي سعادة  وحماسا لأستمر
"٤"
ينسجم الطفل معي مخبرًا امه فيم بعد انني لو أصبحت معلمته سوف يصبح أنجح .. اعرف بشأن نجاحي معه حين أهم بالانصراف فيستبقيني عارضا علي امكانيات زيارته منزليا
يتحدث معي حول كل الامور، أسراره و ملامحه و صفاته و كذلك تلك الأمور التي تضايقه فأواسيه، أنبهر، وأنصحه
أصنع معه مراكب ورقية  ونتحدث معا حول الفضاء و الجاذبية فينصرف متشوقًا لاستكمال الكثير
 اعتدت الجلوس مع الأطفال والهروب من  كيانات وهموم الكبار إلى عوالمهم  الأرحب .. اداعبهم فيضحكون لكن هذا الطفل "اكبرهم عمرا" لذلك تحديدا كان من الصعب ان أتخيل اندماجه معي بتلك السهولة ،فتدمع عيناي سعادة  وحماسًا  لأستمر

قصاقيص٣

السنة ال فاتت و تحديدا ليلة عيد الاضحى  روحت لفحص طبي مبشر نتيجته  كلام فاضي اللي عندك وهتبقي زي الفل وحتى لو ما بقيتش ف انت كده تمام و عيشي وتعايشي وحلو وعال وعادي وبتاع
يعني هعيش يادكتور؟
اومااال  😀
ف الطريق وانا مروحة مزقططة  وقدام بياع فاكهة مشهور تقوم عربية بنت حلال ماشية عليا و خابطاني ف ضهري تاتاتاتاه تش

...
انا فاطمة
بعرف قيمة النعمة اللي عندي وبقدرها جدا .. بعرف كمان استمتع بالحاجات ال عندي ..زمان وانا صغيرة كنت دايما ببص للي أقل واحمد ربنا ع ال عندنا كنت بحمد ربنا  على كوننا في أرض متبلطة تحت رجليا ودور رافعني عن الأرض وحيطان وبيبان وفرش وسكن والله ده انا محظوظة على كده و كبرت.
 كبرت على نفس الهيئة لسة بشوف بيتنا من بعيد اقع ف غرامه، لسة بحمد ربنا على طلوعي ع السلالم براحتي من غير ماابقى خايفة اشوف حد أوحد يشوفني باستمتع بالسكينة و السلام الداخلي، ماعنديش ازمات في اي حاجة و باتمنى للجيران السعادة و الراحة زي ما بتمناها لنفسي
...
خبطة العربية ما وقعتنيش ع الأرض لكن زقتني كام خطوة لقدام صحيح كانت مؤلمة لكن اكيد كان لها مغذى ..يمكن كنت عايزة تقول لي في خطوتين قدامك ما ينفعش تخطيهم ..نطيهم عديهم ..ماتضيعيش وقتك فيهم .. حتى لو حلوين وتحمدي ربناعليهم حتى لو هتخطيهم احسن من أي حد..مالهوش لزمة ف حياتك..
 الشعراوي في مقطع الفيديو ال نشرته النهارده على جروب الاستغفار، كان بيحكي عن  مشهد لساحر هندي وده بالنسبة لأي حد شئ عابر جدا لكن فضل وراه وطلع منه بتفسير آية من سورةالجن بالعقل والتجربة وتربيط الخيوط مع بعضها  ..وهنا سألت نفسي انا كام فرصة فهم ضيعتها ..وليه باستنى يفوت م الزمن عشان اخد بالي وافهم وليه باخد انطباعات و استكفى وكأنها لا يمكن تبقى اشارات بتوجهني ناحية شيئ له أهمية
...
انا فاطمة
انا بعرف كويس أوي اسيب كام صفحة من الكتاب و افهم من بعدها لكن آفة من آفاتي اني ببقى عايزة ارجع اعيد كله من الاول تاني و باتفاجئ باللي تخطيته و ممكن يصدمني رغم انه فعليا مش هيفرق كتير ومأثرش على سياق النص بالعكس تجاهل اللي فوّٓته هيوفر لي وقت و روقان دماغ ده غير ان الكتاب من غيره شيق أكتر لكن نقول ايه بقى غاوية اتعب نفسي
...
ال كام خطوة اللي طلعتهم بسبب دفعة العربية ما فكرتش لثانية واحدة ارجع أخطيهم تاني لأنه مش طبيعي اعمل كده بل بالعكس ده نوع من انواع الهيافة اني اعمل كده فليه نضيع وقتنا في محاولة استرجاع شئ مش من حقنا ..شئ زيادته هتنقصنا جهد ووقت وراحة و كرامة وشرف
فإذا كان الوطن هينقصنا جهد ووقت وراحة و كرامة وشرف ف بلاها تدوير عليه لكن لو مادورناش و اتفاجئنا بنقص الخمس فوايد دول ساعتها هيبقى اي محاولة تراجع هتبقى سبب نزيف الخمس فوايد للأبد و اللي هي  تحصيل حاصل فنركز بقى في العلامات ونحاول نفهمها ونميزها واحدة واحدة عشان خلاص احنا كبرنا
عزيزي مالك عدلي،  يسلم رجوعك الخطوتين من أولها

غذاء الروح

_الموسيقى تاتاتاتاتاااااااه تش 🎶

النهاردة ماكانش عندي شغل و بمعنى أصح مخلصة شغلي من كام يوم بطريقة ما هبقى أحكي عنها فيم بعد.. و قاعدة فاضية وملل ومش هنام ولا ينفع روَّح طب اعمل ايه اعمل ايه 

أسمع مزيكا ..المهم طلعت بلاي ليست لطيفة عندي وابتديت أسمع كتير وحاجات متنوعة لحد ما قلت لنفسي طب ما اطلع ورقة وقلم و ارسم او أكتب اي حاجة أحسها من تأثير مقطوعات الموسيقى ال باسمعها وفعلا قعدت اكتب واما تخلص المقطوعة اعيدها لحد اكتمال النصوص ايًا كانت نثر..شعر ..اي شئ هيطلع 

وطلع حاجات بشعة ..انا حاجة من اتنين ياإما عندي عقد وكلاكيع يااما الموسيقى شيئ وحش بالنسبة لي
ثواني اجيب لكوا الأول نتاج الموسيقى

١_ موسيقى فيلم الوتر : ودي ال ابتديت بيها كمثير واستنت اشوف النتيجة على الورق وكانت النتيجة حبة صور تشبه الكوابيس ضلمة وليل وبحر عالي الامواج  وقوة مرعبة مااتمناش يبقى عندي نصها 

Listen to موسيقى فيلم الوتر by Emy Salama #np on #SoundCloud https://soundcloud.com/emy-salama/qfhbnzmzs5je
 و ده  جزء من النص اللي كتبته

*

وعلى الرغم من كوني كنت خايفة مني وانا باكتب الكلام ده إلا اني قلت يمكن لإن الموسيقى كانت موجهة نحو جو للقلق والخوف ده عشان تخدم سياق الفيلم ..وعشان ابقى حيادية أكتر قررت أدور على موسيقى مبهجة و كان المرعب ان مافيش حاجة تذكر تحت نفس العنوان، طب موسيقى مضحكة لأ بردو ..طب موسيقى بهجة فطلع لي عدد بسيط من الاقتراحات عبارة عن مقطعين موسيقيين فقط لا غير 

الأول ماحسسنيش لأي حاجة، والتاني كان قصير ف كررته عشان ال مرات عشان احس ناحيته بأي حاجة و النتيجة 

١_٢
موسيقى مصطفى الحلواني_بهجة
ودي اعتبرتها مثير و هينتج عنها نص مبهج
Listen to موسيقى مصطفى الحلوانى - بهجة by Ahmed Gado 5 #np on #SoundCloud https://soundcloud.com/ahmedado5/njkogztshrtf

فين النص!
الموسيقى قصيرة وماسحبتنيش برة كوني عايزة أضرب الدنيا بكعوب رجليا و خلاص طب خلاص كده... لأ
تاني يوم قررت اعيد التجربة يمكن ماكانليش نفس امبارح اكتب او ال مود كان وحش او ماعرفش ايه لكن بردو ما اتبسطتش من النتيجة اللي كانت  فيها نوع من انواع الادعاء و الابتذال  وكان النص ده
٢_٢

وخلاصة التجربة الموسيقى بتطلع اسوء ما فيا حتى لو سعيت لغير كده
ولسة متأكدة ان في ناس بتروق لما بتسمع موسيقى بس انا لأ بصراحة بالعكس يعني انا بهدا و بروق أكتر لما اقفلها .
لكن ده لا يتنافى مع كوني بحس بأحاسيس تانية لما باسمعها زي الحنين او ال دغدغة او ال اي حاجة لكن مش الراحة  .. ف الموسيقى مش بتغذي روحي