عقبالك

                                                    

           

امبارح اتقال لي عقبالك_تلك الكلمة الحلوة اوي وال عمري ما اتضايقت منها ولا شوفتها سخيفة،  وعمرها ما كانت بتستوقفني عشان افند في معناها ، عادي يعني، على كل حال قد  يبدو الكلام ال جاي من باب تخليص الابريز لشخص بيستطعم كل حاجة وبيستسيغ كل موقف وبيدوق التصرفات و المواقف والتعبيرات وحاجة مافيش احلى من كده_الا اني ما اتبسطتش، وخصوصا ان لما كان الرد في حياتك سمعت برطمة بابتسامة سمجة تشعرك بتهكم كده
الموضوع فعلا صعب ويستحق التهكم، اصل مش ببساطة هحب حد والحد ده يحبني واحبب الدنا فيه ويحبب الدنيا فيا ونبقى مع بعض ونعزم الناس ونعيش مع بعض لمجرد ان انا ال عقبالي  هو صعب مش مستحيل بس محتاج خطوات كتيرة ما بتخلصش كلها كده غير بمنحة ربانية عظيمة، وانا ما بيدي اي معجزة لحد دلوقتي و الموضوع مش مشوار لمجمع التحرير افضل رايحة وجاية عليه ويدوخوني السبع دوخات عشان ختم اخده بطلوع الروح الموضوع عايز هدية من ربنا وبس، او توصية من عنده 
انا مش كارهة، انا حابة، وهي دي الفكرة "حابة" ومش ناوية اضيع عمري وعمر بني آدم في محاولات اني احبه واقدر او لأ ولو ماقدرتش هبقى بجهد عقلي ونفسيتي وروحي و السلام، الحب يعني اخلاص
انا نفسي يتقال لي عقبالك من شخص اخيرا ربنا نجاه ورزقه بالحب وفرحته، فرحة الاختيار الصح والنجاة بشخص واحد في الدنيا وكأنه الملاذ الآمن ال ربرب نجاه بيه اشوفها من حد عيونه بتلمع بدموع حمد ربنا وهو بيقولها لي، حد يكون فرحان ونفسه الدنيا كلها تكون فرحانه زيه ف احسه بيتمنى لي الخير بجد مش مجرد حد بيأدي واجبه، او حابب يفكرني اني لسه لوحدي ووجب الاستعداد
...
*عموما انا راضيتها وقلت لها : 
                        "خلاص، في حياتي أنا" 
                          ملاحظة :"الرسمة اللطيفة ال فوق دي بتاعتي"