مخلفات

 مش عارفة ليه بيطلقوا اسم  مخلفات على القمامة !

👀

مش منطقي والله، فجاة تلاقيك حاسس ان كل ما يخلفه الانسان وراءه يتحول تدريجيا لقمامة، يعني طب الذكريات، الخطط القديمة، محل سكنه القديم، أفكاره، أحلامه ال ما اتحققتش، والناس ال سابهم او سابوه وهنا بس كان معاه حق شكري السيد لما قال لاحمد حلمي "يازبالة بذكرياتك الزبالة" ويرن صدى صوته في دماغي الفاضية من أي مخلفات

واحاول اقلب في دهاليز اثار الذكريات وافتكر: 

هنا كده مكان الحلم اياه العبيط اوي ال كنت باتخيله بحذافيره، انا واقفة قدام ارض زراعية وف ضهري بيت من دورين باملكه وعندي ناس بيساعدوني ف الزراعة وبيعيشوا معايا وبس، حياتي بسيطة زي نسمة باردة ف ربيع دافي، حاجة تسعد القلب وخلاص، عمر قصير ما اوصلش ل 30 عشان امشي خفيفة زي ما وصلت، وورايا الخضار مكمل... 

وهناك مكان حلم السفر وانا اصلا بخاف من المواصلات في بلدنا، وبيفضل قلبي مقبوض طول ما انا بره البيت وافضل اعد المحطت لو راكبة المترو واحسب الساعات لحد اما اروح، وممكن افضل بالسنين في البيت بلا شكوى واحدة وكل ما الاقي فرصة خروج يا اتحجج يا اما اوجد لنفسي سبب حقيقي يخليني أبقى، أنا صحيح مازلت باوجد لنفسي طرق تخليني اتطمن زي مثلا موضوع الخرايط ال ما بفوتش فرصة لاستكشاف الاماكن بيها قبل ما اتحرك الا وباعتمدها وده بيطمنني جدا وبيخليني احس اني عارفة المكان شوارعه ومحطاته واتجاهاته ف احس نفسي ف وطني ايا كان المكان ال انا فيه، يمكن ده تقريبا السبب ال معاه فهمت الحكمة من ان  يلزم للمرأة في السفر "مِحرم"، وأحب أضيف ومش البنت بس اي حد يلزم له رفيق في سفره يطمنه ويطوي معاه بعد الطريق ويفكروا سوا في حل ألغاز الأراضي  وفك شفراتها.

وفي الركن ده مكان حلم اني اقرأ كل الكتب ال شايلاها من أيام الجامعة، وارجع لذكرياتي القديمة وافتش فيها ف الاقي أحلام تانية مكتوبة على جوانب وهوامش الكتب ف الموضوع يتحول لفيلم انسيبشن احلام بتدخلك جوه احلام جوه احلام لحد ما تكتشف انك عايش جوه حلم حقيقي، وافضل اجمع خيوط الحروف والكلمات وماافتكرش كل الأحلام ومهما كان ضياع شئ بيشتتني ف انا خلاص اكتشفت اوضة الذكريات الممسوحة ال حافرة آثارها حتى ولو هي لسه وهتفضل فاضية.

هذه القصيدة لي

عوائق خفية في سبيل الانسانية

 الامومة واحدة من المشاعر الانسانية ال مش مشروطة بمواثيق الدم زي ما بيتهيألنا ف أغلب الأوقات، عاطفة قريبة جدا وعلى طرف القلب ، مش محتاجة وساطة ولا توصيات وبتنقح عليك ف اي لحظة ف مالهاش مواعيد، البنت التايهة ال وقفت جنبها وانا ف الجامعة وال ماسيبتهاش لما ظهر لها حد بيقول عن نفسه قريبها لحد ما جه ابوها وخدها، بكايا جنبها عشان مش عايزة اضطر امشي وانا مش ممكن ما اتطمنش انها بقت ف أءمن مكان، أنا وهي كنا محظوظين رغم خوفنا انا كنت محظوظة عشان كنت ف الشارع ف الوقت الصح ف رجلي هتاخدني لمكان ماهتمشي همشي وراها حافظة لها مسافة بيني وبينها ما تخلينيش عبء مخيف جنب الضلمة والتوهة عليها ودي فرصة عال جدا عشان اجدد احساسي واتعرف على جوانب حقيقية فيا وهي محظوظة عشان ربنا رزقها بيا واحدة عندها كل الشعور ده وخايفة عليها من كل قلبها وهتعمل اي حاجة وماتسيبهاش في ايد حد ممكن يتشغل عنها ف نص الطريق، الحمد لله ال ردها لأمها 

افتكرتها لما من شوية لقيت بنت تانية تحت البيت بتعيط كانت ياعيني راجعة بيتها لقت الباب مقفول من جوة وبتخبط وماحدش لاسامعها ولا حاسس بيها ف قعدت ف الشارع الساعة دي بتتعكز على الرصيف، رجليها واجعاها ف بتزك عليها وهي بتقاوم لعل حد من بيتها يكون حس من الخبط وقام يفتح لها، أنين الألم وبكى الوحدة والخذلان كانوا رفاق ليلها، حاولت انزل اقعد معاها لكن ابوها كان واقف قريب حكمة ربنا يباتوا ليلتهم دي كما المطاريد ف نص الطريق الله اعلم بحكمته قدره ومكتوبه

يمكن المرة دي البنت ورغم ظروفها اكثر حظا لان ابوها معاها والليل والالم على حجمهم مقارنة بقوتها أكثر رأفة بيها من التوهة والضياع والوحدة وأفضل مني حظا لاني لولا وجود ابوها كنت نزلت قعدت معاها وماكتفتش بمراقبتها من فوق عشان اخد بس موقف لو اتعرضت لاقدر الله لحيوان او خوف

ال عايزة اقوله ان مهما كنت ناوي تعمل حاجات وعندك القدرة عليها ساعات بتكتشف او بتستشعر عوائق في غاية الأهمية تضطرك تقف عاجز مقيد قدام رغبتك في المساعدة ومهما كنت قوي وكنت رؤوف ما ينفعش تتجاوزها ولازم تاخدها بعين الاعتبار لانها أحيانا ممكن تمس كرامتك او اخلاقك او حدودك ودي جزء لا يتجزأ من انسانيتك ... الأمثلة كتيرة واحساس الواحد بالتعاطف مع نفسه شئ جميل بس بردو ما يكونش متخاذل والشاطر هو ال بيعرف يفرق ما بين الممكن والصعب والمستحيل

كنت هبقى مين

 سمكة

لو عايزة أكون حاجة أحب اكون سمكة ملونة وحاطة برفيوم زي ال انا حاطاه دلوقتي بتتمشى في البحر مش في حوض سمك وعلى كتفها شنطة مش شايلة فيها مكياج اولا عشان مش بتحبه وثانيا عشان هي في المياه ولازم الحاجات دي تكون ووتر بروف عشان ما تتمسحش وده يتنافى مع صحية المنتجات بس هشيل فيها ورق وقلم كالعادة وهكتب  ورا الصخور او هخلي في ضهري الشعاب المرجانية واكتب أو

زرافة

رقبتي طويـــــــلة باكل تفاح مغسول بمية الندى وبشرب لما اطلع لساني ف المطر و السحاب بيضللني وبجري بخفة ورشاقة وبعرف أختار الأماكن ال ادوس فيها صح أو

حصان

شعري ناعم اوي وهبقى بطلة  كليبات التسعينات وهفضل حاسة اني من زمن أقدم وساكن جوايا شعوري باني أعتق من كل ال حواليا، وكل ما هجري العالم هيتحول ل سلو موشن مش هيقف بس هياخد وقته في التغيير والدنيا هتاخد وتدي مع نفسها لحد ماخد وقتي ف انجاز كل الأحلام  الجميلة أو

بجعة

بيضا بفرد جناحي يغطي الكون ف الدنيا تدفى في حضني واصطاد وأءكل كل الناس والحيوانات والحشرات ، ماحدش هيجوع طول ماانا لسه بعرف اتحرك كله متطمن شبعان ومتدفي  أو

بامبو

عود  رايق واقف في زهرية ازاز بيحمد ربنا طول الوقت انه نبات أخضر وبيشرب مياه كتير ف سمباتيك على الأخر وجسمه نضيف وباصص دايما من الشباك ، شايف ال بيحصل برا وحاسس  دايما بكل ال جوة

         "السؤال ده عمري ما كنت اتخيل ان له اجابة عندي بس واضح انه ينفع اسأله لنفسي عادي "

فلفول صديق صديقي محمد     💗ــــــــــــــــــــــــــــــــــــــــــــㄑ

شـــا مـــبــــــو

 في الفترة ال فاتت او تحديدا آخر سنتين سمعنا عن فاعلية زيت الأرجان للشعر وفعلا شركات كتيرة ابتدت تنتج منتجات داخلها الارجان أو تنزل الارجان نفسه مستقل وابتدينا نشوف جملة "الارجان الأصلي " وبصراحة انا لما بشوف كلمة الاصلي دي في اي شئ برتاب من كل شئ ف بقاطع تماما 

شعري مش أزمة كبيرة بالنسبة لي يعني أعرف ناس ممكن توقف حياتها على نوع الشامبو ال هيستخموه، انا عادي جدا لو أزمت هاخد صابونة واغسل بيها شعري ، وده مش اهمال بقدر الاستعجال  يعني انا مش بحب اصطناع الأزمات اوي فأي نوع شامبو بيبسطني "ماعدا جونسون" جربت مؤخرا كل الأنواع وكلهم حبيتهم يمكن مالقيتش فيهم كلهم نوع مميز أكتر من ناحية انه متوفر فيه كل الحاجات مع بعض ال بدور عليها الراحة، النعومة، اللمعان، الطراوة، النضافة وأخيرا القوة ال مفروض تبقى رقم واحد 

وكانوا بالترتيب حسب ما تكيفت 

تريسيمي ، بانتين، سباركيل، الفيف، صنسيلك، هيد اند شولدرز، جليس

وبقيت عشان احقق المعادلة باستخدم بلسم عشان اطلع وعندي معظم الحاجات ال بدور عليها لكن من عيوب البلسم انه بيوقع الشعر ومهما كنت حريص ما يوصلش لفروة الراس بيقع شعرك مع كل استخدام

وكان افضل انواع البلسم TRESemmé  يمكن لانه أغلاهم نوعا ما والحاجات الغالية تمنها فيها وده كان ظني في كتير من الحاجات ال بتتشرى لكن بعدين جربت بلسم بانتين  واتفجئت انه جميل فارجعت ده للفكرة الاولى وهي الجهل ال بيخليني بالتجربة اي حاجة بتعجبني " ماعدا جونسون "

 لحد ما لقيت أفضل شامبو فعلا " بندولين " وهنا بقى نقف شوية ونركز بندولين شامبو بيدي تاثير البلسم من الطراوة والنعومة وبيفك التشابك للشعر وهو بيتغسل وده هيحسه جدا الناس ال بيحبوا البلسم او بيميلوا ليه 

من مكونات الشامبو زيت الارجان و زيت الجوجوبا ويمكن ده ال بيدي ملمس الطراوة في الشعر

خلو الشامبو من السلفات  من الحاجات المميزة، يمكن من الحاجات المزعجة شوية ليا اني باضطر اغسله أكتر عشان اتأكد ان الشامبو راح من شعري لان مافيش رغوة 

من الحاجات المطمئنة ان الشامبو مناسب للأطفال من عمر يوم وبالتالي ف مافيش ضرر هيسببه للشعر "ماعدا جونسون" 

* انا ليه مش طايقة جونسون ؟

لانه بينشف الشعر جدا جدا جدا وده من لحظة الغسيل مع ان ريحته حلوة جدا ودي الحاجة الوحيدة الحلوة فيه عشان بتشم ريحة البيبيهات 

ملاحظة عجيبة : تقريبا "صنسيلك" على ما أتذكرعاملين شامبو لون عبوته سودا ومكتوب عليها للشعر الاسود والشامبو لونه بنفسجي غامق كده كنت حاباه اوي عشان لونه القمر ولون رغوته القمرين ده غير ان شعري في الفترة دي كنت ببقى متطمنه انه نضف تماما اول ما لون مياة الشطف ترجع مافيهاش تنتوفة بنفسجي تجربة عسولة استمتعت بيها وحدي رغم انها مش صحية ابدا يعني 

تقريبا فيه نوعين ده ال جربته

كنت عايزة اتكلم عن السعر ف لقيته على موقع سوق دوت كوم أرخص كمان 10 جنيه من ما باشتريه ف ممكن لو حد حابب يجربه يجيبه منهم وان كنت ببقى مياله للصيدليات أكتر لاني ماليش تجربة في الشرا اون لاين  فلو الموضوع ثقة ف كمان شهر هيبقى فيه عروض "الجمعة البيضا" زي ما بنسميها هنا ف مصر المواقع بتعمل تخفيضات ملحوظة يعني والصيدليات بردو 

                                       😀

من قبل ومن بعد

 

قبل أسابيع تمنيت اغماءة  تفيقني من آلامي

قبل ساعات تمنيت أن لا أسقط في الاغماءة لخشية ان افيق منها والألم في جسدي

قبل اسابيع بكيت وأنا في عمق الألم 

قبل ساعات خشيت البكاء لانعدام طاقتي فلا مساحة مقدرة على شئ 

قبل أسابيع كان الألم يعطيني استراحة قصيرة أذهب فيها لجلب مسكن للآلام

قبل ساعات لم اجد ثانية أتنفس فيها 

قبل أسابيع عانقت كفًا أحبه

قبل ساعات لم أجد القدرة على ضم كفي لأ مسك مكان الألم وأكرهه

قبل أسابيع وقبل أيام وقبل ساعات والألم لا ينفك عن مباغتتي كلما حان له القرار 

قبل كل شئ أفكر في أن الأمر لو أفلت من يدي وانتهى عمري الآن هل ستغفر آثامي كاملة، هل سأنال الغفران بالألم، أشعر هذه اللحظة تماما أنني بخير وان حياتي طيبة كرحيلي تماما ، أشعر ان عمري لو انتهى الآن لن يحزنني شئ وأنني لن أتمنى حياة أفضل ولن أسعى خلف اضافة لحياتي ولا انجاز وستوضع النقطة في المكان المناسب للغاية وأي نقطة ايقاف سأقف فيها مطمئنة مادام الله يرضى ..فكرت للحظة لماذا لم أكتب وصية ؟

واكتشفت بعد قليل انني لا أملك شيئا، وشعرت حينها انني حقا بخير فلا شئ سأمضي وغصته باقية في حلقي، وانني خفيفة لكن الألم خلف الامًا أخرى أثقلتني أكثر ومهما شرحت مداها سأظلمني، لا أحب لأحد أن يجربها فلا داع لوصفها ، لكنها ثقيلة كخروج الروح ، كثيرا ما أفكر في تلك اللحظة، أتمنى لو كانت لي كرامات فتخرج روحي دون ألم، محبط جدا أن تفوتني آخر الأمنيات 

لكنني أقاوم، أحوقل بكل ما اوتيت من مقدرة فينازع الألم حتى يخر أرضا، حربا داخلية لا أراها عيانا لكنني أشعر بكل ضربة سيف فيها 

ربما خلفت الحرب خرابا كبيرا داخلي حتى أن حمى أصابتني لكنني بخير يكفي أن الألم أعطاني هدنة لأكتب عن هزائمي وانتصاراتي

فلله الأمر

هذه الرسمة لي

من ما يثير التعجب !

نجحت في اتقان دور من تحسن الشجار، كانت مشاجرتي الاولى في العمل ناجحة إلى حد ما ، حتى انني ورغم حدة المشاجرة لم أتخل عن صمتي ف آثرت أن تكون كتابية، ربما لأنني لم أخطط لها وتورطت بها دون أدنى رغبة، و ربما لأنني حين أحادث الناس وجها إلى وجه أحبهم ، ف أحسن اليهم وأدعو لهم، لكنني نجحت في ايصال غضبي وهذا انجاز عظيم، في رسالتي الأولى كنت ورغم ضيقي من أساليبهم في العمل أحدثهم بلطف بالغ لكنك حين تقصر وتشعر أن أصابع الاتهام موجهة بين عينيك فإما أن تصمت أو تعلن ثورتك 

كانت الخصم في شجاري من ذلك النوع الذي "يأخذهم بالصوت" فقررت اعلان صافرة الحرب ولم تعطني الفرصة لأن أتأهب ف "ضربتني وبكت"، الفتايات هن الفتايات كنت في هذا الوقت أفكر في أن أكتب ردا معجزا للغاية ولا أرسله كعادتي في اراحة رأسي ف أنا حين أوضع في مناقشة كتابية أحسم الجدل برد يفحم الجميع وتكتب بعده نقطة النهاية، يكون ردي دائما بليغا بكل قدر حتى انني اسمع صفيق الجماهير التي ستقرأ من على بعد سنوات ارضية لكنني أؤثر حكمتي في كل حال ف أترك التعليق دائما هاكذا دون enter 

في هذا الشجار تركت تعليقي دون ارسال لبضع دقائق حتى وجدتها قد أكملت المثل بحذافيره و "سبقتني واشتكت" وحينها لم أتردد للحظة في ارسال الرد الذي أحسبه قد كومها أرضا من ضربة واحدة واخترت كلمة نهاية ملقاة في المعجم على "قفا مين يشيل" ووضعتها ربما لكوني نفسي قصير للغاية في العراك وربما لكوني فعلا قد اكتفيت 

ربما لا أبدو ناجحة بالشكل الذي يرضي أرباب السوابق عني لكنني راضية عن هذا المستوى ف العمل أصبح مزعجا بكل قدر وأنا لا أحب الازعاج بأي قدر 

ملاحظة : حين ركزت في اسمها بعد كثير اكتشفت انها تلك الفتاة الأنانية التي سبق واحتملتها قبل شهرين في العمل ،  فمن الواضح أن الله رد لي حقي كاملا بما يليق بي وكان ذلك دون سعي 

ملاحظة ثانية : صديقك الحقيقي الوحيد دون غيره تظهره المواقف الحقيقية الوحيدة دون غيرها

ملاحظة أخيرة : "حبيبك يبلع لك الزلط وعدوك يقف لك ع الغلط"

احنا بنتخانق؟