أقارنك بالجميع فترجح كفتك ❤

هابي نيو يورك

-تقريبا اللي هتكلم عنه ده صميم صميم مشاعري ف الي مش حابب يدخل في تفصيلة من الممكن تكون حزينة يمشي، لما  حد بيكون في تجربة فقد "فراق" وانا بتكلم هنا عن الحب بكل انواعه للأهل او لغيرهم_والفراق هنا بالرحيل او الانفصال_بيبقى عنده ازمة كبيرة في الصور والذكريات، يمكن انا من المحظوظين اللي بيكوّنوا ذكريات عن عمد بالفعل مش بالميموري الرقمية بقصد استبدال الشيئ بالآخر وحفظ الذكريات بالعيون اكتر، وبرغم اني بصور كتير الا اني ما بصورش انسان الا في اضيق الحدود، فتلاقي  دايما تصويري جماد او مكان او طبيعة لكن ناس بحبهم لتوثيق ذكرى ما بيننا لأ، وعمري ما بطلب من حد اني اتصور معاه، مش لأنني بخاف نتفارق لكن عشان ببقى اسعد وانا الميموري بتاعتي جوايا ، لما بيحصل وما ببقاش مع الناس دول ويقدر لي اني باقى معايا صورهم ف الموضوع بيكون يا اما ما بفتحش الصور خالص يا اما بخاف اعدي على الصور أصلا، والخوف ده بيبقى خوف مبكي شبه خوف الفوبيا ومش خايفة من حاجة تقلل من مشاعري قد ما خايفة اشتاق بطريقة موجعة ليا.. يمكن في علاقتي بالجميل بابايا الصور البسيطة اللي انا مصوراها له ماكانتش من باب حفظ الذكرى انما من باب اني عايزة ابسطه هو باني بصوره، فبشوف الصور اطول من ما بشوفها عادي من باب ان ملامحه ماشاء الله جميلة وبتقول انه راجل طيب سبحان الله، لكن باتخيل ان الصور دي لو كانت فيديوهات كانت قطعت قلبي وكنت بقيت فتافيت وما كنتش استحملت، انا اصلا خايفة افتح اي فويس نوت لينا ، وباستبدل الحاجات اللي بيغني لي فيها باني بحفظ الأغنيات دي وبمرن صوتي عشان بقى حلو زيه ف اغنيها زيه ل اللي بحبهم،  ويمكن وبما ان الفراق من سننن الحياة ف صعبان عليا اولاد اليوتيوبر اللي هيفترقوا عنهم بعد أعمار طويلة فعلا هيحسوا ايه، وهم بيشوفوا ذكريات حلوة مع حد بيحبوه اوي ومش طايلينه ولا طايلاه ايديهم، فلو التصوير حرام رحمة من ربنا بالقلوب ف انا بقيت أشد ايمانا بحرمانيته، وسبحان الله غالبا كل شيئ حرام فقهيا بيكون مؤذي أذى مادي أو كمان معنوي وفي حالات الحلال دايما شروط وكأن هدف ربنا في تحليل الأشياء حتى  حفظ الحقوق الانسانية بالكامل
وربنا يثبتني على حب اللي يحبه ربنا وكره اللي ينهى عنه      
_وأخيرا انا بحاول اقرأ واعمل ريفيو نقدي على الكتب للمرة الأولى ف دعواتكم بقى اتشطر هذا العام في الموضوع ده

 -اما عن العنوان ف انا كل يوم باعتبره بداية عام جديد أوله اللحظة دي وآخره اللحظة دي العام المقبل ف ماعنديش نيو يير لكن وعلى صعيد تاني بحب اول يناير بسبب  انا مش عارفاه

لذيذة من لذائذ الحياة ㅍ

حاجات مسكرة
هبدأ بالمشروبات 
دومتي كيوي ليمون بالنعناع 
اول ما جربته من سنة وبعد ما عجبني قررت استكشف المذاقات ، كل مرة كان بيبهرني ترتيب العصاير 
يعني في الاول بتدوق حاجة بتكون طاغية وبعدين التانية وبعدين التالتة
كل مرة الترتيب بتغير بطريقة ظريفة، ما بتحسشش ان فيه حاجة طاغية على التانية 
فجأة وفي ظرف شهرين اختفى، وفي وقت فارق بالنسبة لحد بيحب حاجة زي رمضان وابتديت اعمل زي المدمنين وانا بلف عليه في كل المحلات 

لقيته بعد رمضان بكتير ✅
العصير ده عسول بشكل لازم تجربوه

انا مش من الناس اللي بيميلوا لنسكافيه 
مش بحبه ومش باستلطفه وعلي كافيه كان بديل ممتاز ليه عشان احس بطعم القهوة، بالمناسبة كوفي ميكس حاجة تانية ف يطلع من القهوة سريعة الذوبان يروح لحتة انا معرفهاش 
لكن نسكافيه فيه مرارة القهوة المعروفة بس بطريقة لابسة بدلة ومتأيفة ع الآخر بين قوسين بطريقة شيك
ممكن نعتبر كوفي ميكس مشروب شعبي تالت بطعم البطاطا المشوية 

لحد ما جربت نيسكافيه ميلكي ده 
طعمه غني شوية، كانك زودت شوية لبن بودرة على النسكافيه 3 في 1 العادي ف عمل الخلطة اللي بلجأ اليها لما يكون عندي صداع وعايزة نسكافيه بس مش طايقة طعمه
نسكافيه ميلكي كان البديل  اللطيف  ✅

ستروب وافل 
الكتكوت ده قاعد كده لوحده بيتفرج على الناس اللي رايحة تجيب كيت كات و كادبوري وجلاكسي 
ويضرب كف بكف ويقول 
هم الناس ليه ما بيحبوش يجربوا 
عموما براحتهم
 انا جربت اللي ب ال كراميل 
ومن كتر مانا حسيته مش شبه حد فكرت اعمل له مقام جنب بيتنا 
سؤال 
لما بتجرب حاجة وتحس انها مالهاش شبه بتعمل ايه؟
على كل حل قبل ما تجربوا شيكولاتة جربوا الاول اللي بالكراميل 
عشان تقولوا العهدة على الراوي ✅

كوكيز العبد 
حلمت من كام يوم اني في مخبز كوكيز فقمت مشعشع في دماغي الموضوع 
انا عايزة اعمل كوكيز 
حتى هذه اللحظة انا ماجرتش كوكيز حلو 
اكتر من ده ✅

تومورو بسكوت بالكاكاو والعجوة 
هو اللي عاجبني فيه انه عامل زي البراونيز طيب ما اجيب براونيز، بس البراونيز اللذيذ 
مابيبقاش فيه عجوة وانا بحب البلح 
حاجة غريبة
صح ؟
بس انا اصلا ايه بعمله مش غريب

ف تومورو عامل حاجة ما يفهمهاش حد غيري ✅

بالمناسبة لسبب ما اجهله بقيت بحب الشيبسي بالخل 

وتنويه تاني 
هاتو فريسكا ستكس اللي اتكلمت عنه من كام يوم لأنه ايه  قمر قمر قمر على طريقة بنت السباعي 

ترتيبات

 وكأنما أصدر حكم الاعدام، ولا  وقت قبل التنفيذ، أحد منفذي الحكم يجررني ليلا  في الطرقات المجهولة نحو سوداوية استمرار الألم للأبد، يسبح الزمان حولي بطيئًا، موسيقى حزن تلفني من كل جانب، لو أنني وحدي الآن لما سرت نحو هذا الحزن بتلك السرعة، لو أنني وحدي لملكت من زمام الأمر قدرتي على البكاء أرضًا، لو أنني وحدي لما صرخت ولا هتفت، لو أنني وحدي لضعت في صمت يشفع لي ببعض الهزيمة بين الخطوة والخطوة، لو انني وحدي لضعت لمرات أكثر ولحملتني على كتفي ولسندتني على عكاز من كاهلي، لو انني وحدي لثبتَّني في الطريق كلافتة وكتبت فوقي انتظرت القطار فسار على قلبي، لو أنني وحدي لما هذيت، لو أنني وحدي لبكيت، لو أنني وحدي لما عدت أبدا.. ربما لو.. لو أن شيئا آخر لا أعرفه حدث لشيئا آخر غيره حدث، لكني أحب ترتيبات الله أكثر

كَم تَشتَكي!

 أدين بالامتنان لإليا أبو ماضي الذي تتلمذنا ولا نذكر له من الشعر سوى بضع أبيات وأهمهم عندي على الاطلاق هذا البيت الذي صار مثلا أضرب شطره كلما مررت بعذب أرضى فؤادي، مخيبة بهذا الشطر كل يأس، أو شكوى، أو ملل

كَم تَشتَكي وَتَقولُ إِنَّكَ مُعدِمُ

وَالأَرضُ مِلكُكَ وَالسَما وَالأَنجُمُ

أردد شطر البيت وأنا أمتن للبرودة حين تمس أصابعي، واللغة العربية حين تكفيني كي أعبر، والطريق حين يمهد لقدمي، وقدمي حين تعتدل مشيا وأنا على وشك الوقوع، أمتن لصوت النقود حين تسقط فأسمع وألملمها، للقطن الذي صنع منه جلبابي المفضل، للقرآن حين يربت على قلبي، وللدعوات التي تخطر لي فأرددها، للفاكهة حين تجذبني روائحها، أمتن للماء حين ينساب على شعري، وللهواء حين يخلو من العوادم، أمتن للناس حين يمتنوا للبسيط

وادين لله صاحب المنن والعطايا بكل الفضل لأن وهبني حاسة الامتنان لكل تلك الأشياء التي رزقنيها

لباب الكعبة مكانة خاصة عندي

ابن عم اليوستفندي

 انا باضحك على مشاعري، بقرطسها وباخدها في دوكة، بمنع الروايح انها تتسلل لأفكاري فتحركها على نار هادية فتتحمص وتتعتق وتطلع ريحتها، اللي غالبا هتبقى مركزة اكتر بكتير من الروايح اللي بره، ريحة  البرتقان بترميني في جناين عمو فرج حسن اللي عمري ما شوفتها بس شوفت طرحها بعيني ودوقت منه انواع واشكال، انا لو حبيت البرتقان لسبب هيبقى برتقان ارض عمو فرج، وعمو فرج صاحب بابا، ف كل حاجة بتوديني لجنينة ذكريات اقطف منها براحتي اللي يشبعني ويفيض، لكن انا اقنعت نفسي ان لأ
انا بحب البرتقان عشان هو حلو وعشان هو ريحته فعلا حلوة وهو جميل، افتكرت دلوقتي ان الذكرى اللي بغلوش بيها على مشاعري كانت مرتبطة بافتقادي الأول لبابايا مع أول سفر، لما ابتديت ادور على البرتقان في شهور مافيهاش برتقان اصلا، تدلت لي ذكرى مرة بابايا كان عازمنا فيها على عصير من العصارة من سنتين وطلبت برتقان ومن هنا بدا هوسي بالعصير الفريش في كل مكان، من يوم ما قررت اني هقاطع ماك وانا كل شوية باتخيل عصير البرتقان بتاعهم واللي لسه ماجربتهوش بس بيقولوا جميل، ماصمدتش قدام الروايح اللي هفهفت ولقيتني 
من شوية عيطت وفضيت دماغي في العياط من كل اللي يخصني وفكرت في كل الناس اللي في كروب وبقيت بدعي ليهم بالدموع تتحل مشاكلهم، ونفسي والله تتحل مشاكلهم ومشاكلي انا كمان، عشان حاسة ان ياه لو ربنا فرجها عليهم، ونفسي يبقى في ايدي حلولهم، ياه لو كانت لي فعلا لمسة سحرية، قلبي وروحي بيقولوا لي اني كنت همسح على القلوب تتداوى وعلى الجراح تطيب، وان كنت معايا مفتاح السكينة اللي عطتهولي ماما من وانا في اعدادي وبقيت بسلمه يدويا لكل حد بيتألم، فيفتح بوابة الهدوء والرضا والسكينة، والبكاء يتحول لضحك واليأس يتحول ليقين بالفرج 

 ملاحظة مفيدة لو بتحبوا عصير البرتقان اكتر ماتخلوش عمو اللي شغال في العصارة يحط لكم تلج عشان تاخدوا عصير برتقان فريش اكتر يم يم ، ماجربتش الفكرة دي عشان بعد عمو بتاع الذكرى ده ما خيرني واخترت  بقوا كل الناس مش بيسألوا اصلا وبيحطوا تلج 🍺

              جلسة بدفء البرتقال

🌼داليـــــــــا🌹

 انا حلمت ان انا اسمي داليا، ولابسة فستان "مناسبتي الخاصة" لونه برتقاني وعليه ورود متثبتة فوقه من نفس اللون ، لما دورت على زهرة الداليا اللي اعرفها وعمري ما شوفتها لقيت فيه منها  لونها برتقاني 

🏵 end of text🌼

OVER

=هشتغل ايه؟

-مراقبة عهد

="صرخة مدوية تشبه صرخات العظيمة نادية الجندي مع تلويح باليد اليسرى عشان انا بستخدم اليد اليسرى أسهل"

=لأه مراقبة عهد لأ 

_حنانة لأ "حنانة على وزن حضانة"، وحنانة لأ جملة لها مغزى في بيتنا 

=عهد لأ، انا مش هشتغل مراقبة عهد وافضل خايفة على العهد احسن تتسرق..تتسرق لأ، ويتعرض عليا رشوة..رشوة لأ،  وابلغ عنهم البوليس.. بوليس لأ ..شوفوا لي شغلانة تانية 

_يابنتي عهد ايه وارشيف ايه، انت هتشتغلي ف ادارة الصيدلة

=صيدلة لأ..

_.....

=صيدلة يعني ادوية وأدوية يعني ترامادول ومخدرات وبلطجية يحاولوا يسرقوها مني ومعاهم اسلحة بيضاء وزملاء متواطئين يخونوا ثقتي ، مش هينفع والله وفي عقلي خلفية لمسلسل عربي  ومشاهد ليا  بالبدلة البيضا بتاعة السجن

_جواب التعيين اهوه

=ماشي، هصلي ركعتين وربنا يقدرني على حمل الأمانة 😂

بتروح وماتلاقيش بربع جنيه اكشن في الموضوع

 

صورة للفنانة مع بعض العهد
ملاحظة 
مافيش ترامادول

طفو

 محبطة احباطي وانا  راجعة من حرب كان عندي فيها فرصة حلوة اوي اني استشهد وما استشهدتش!، بس انا مش حاسة لا بضيق ولا رخاء انا عايزة بس "اخرج من الدنيا كفافا لا علي ولا لي " واحساس اني امشي دلوقتي مريح لا انا مستنية حاجة ولا عشمانة في حاجة ولا عليا حاجة ولا ورايا حاجة، وبردو بدون اكتئاب يعني احساسي ان ده لمنطقي وده الوقت المناسب بدون زعل مخليني متمسكة اوي بإن ما ياللا بقى، ومش من باب الزعل ولا اليأس من باب بس الخواء! 
يعني هدوء شديد وبدون دراما كده حاجة حلوة  وبسيطة وهادية زي ان الواحد ياخد لنفسه وقت ويقعد في جنينة ويحط في بقه حتة شيكولاتة بحبها، هدوء وراحة ونعومة ومش عايزة اكترمن كده.
انا مصاحبة الذكر اوي دلوقتي مش عشان حاجة غير انه بيطمنني ف بحس ان ربنا معايا ، وانا مابقتش بحس الا بالوحشة، مع ان الجميل مؤخرا كنا هو في دولة وانا في دولة تاني ف شكلا متفرقين بس بردو ماكنتش بحس بالوحدة دي لكن دلوقتي بقيت حاسة احساس شبه احساس ولد  ماعندهوش بيت

كنت بفكر في الناس اللي بيقولوا لحماهم وحماتهم بابا و ماما ليه العريس والعروسة بيصمموا ان شركائهم يقولوا الكلمة دي لابوهم وامهم، يعني انا واحدة من الناس ماكنتش ببقى مبسوطة لو واحد او واحدة  قال لبابايا كلمة بابا هو بابايا لواحدي بس ما كنتش بقول.. وبردو ميالة لفكرة ان دول باباك انت ومامتك انت ربنا يخليهم لك انت، اما بالنسبة لي انا ف بحب كلمة عمو وطنط ومابانزلش حد منزلة العمو والطنط قولا الا وانا بحبهم، بحبهم جدا كمان، ده غير ان ليه الواحد ما ينزلش الانسان منزلة ال عمو حمايا والطنط حماتي او الخالتو حماتي وهو مبسوط وحابب القرابة الجديدة اللي اضيفت لحياته لما اتجوز ف بقى عنده الانجاز ده  ليستمتع بيه ف بقى انسان جميل وعنده بابا وماما وحماه وحماته مش انسان عجيب عنده اكتر من بابا واكتر من ماما وماعندهوش حما؟
ناهيك بقى عن اللهم احفظنا الناس عجيبة اللي مابيقولوش خالتو وخالو وعمتو دول وفايتهم طعامة نطق الكلمات اصلا ..اقول قولي هذا واتمنى لي ولكم حمايا وحماتو لطاف وطيبين زي بابانا ومامتنا,

ضحكت دلوقتي وقلت يعني الفقرة الاولى عايزة الحياة تنتهي والفقرة اللي وراها عايزة حمايا وحماتي لا ده الفقرة التالتة بقى قمر اكتر واكتر من الكل وهي اكتشاف طيب وامور وجميل يبسط على الآخر وهنصحكم بيه دلوقتي حالا قبل ما جودته يفتكوا بيها زي كل شيء في الكون بننبهر بيه وهوبا تقل جودته 
القمر دي عاملة زي جالاكسي فلوتس بس مش متغطية بالشيكولاتة، كل حاجة فيه امورة على حدة، والشيكولاتة بالبندق اللي جواه عسولة اوي اوي وانا مش من محبي المكسرات ولا طعمها اوي  بس دي مش بتضايق خالص 
جربوها على ضمانتي واللي ماتعجبهوش مايكملهاش عشان صحته 😄 ويجيبها لي انا 😚