اولا مش هقدر اجيبه لأنه شوفته في فيديو في الامارات ومش عارفة اسمه وهو بوتاجاز زي ال عندنا كلنا بس ليه هو بوتجاز أحلامي ، عشان طريقة برايل ال محفور بيها قدام كل مؤشر لكل طارة ، باتخيل لو كانت لوحة المؤشرات أعرض شوية  ففرص حصول لسعات او حروق في القفل او الفتح تكون أقل شوية هيبقى أحلى واحلى 

هنا بقى بقول اني لو عندي مصنع بوتاجازات هعمل الفكرة دي في كل النسخ 

وبما اننا كده كده  جيبنا سيرة البوتجاز ف عايزة أتكلم عن اني بحب من الأكلات اوي معظم الحاجات ال الناس ما بتحبهاش

زي القلقاس ده غالي عندي خالص، السبانخ ، القرنبيط وهو مسلوق أكتر من وهو في الخلطة 

الملوخية الناشفة أكتر من الخضرا كمان 

البامية وان كنت بشككك أصلا في عقل ولسان ال ما بيحبهاش 

انا كمان عايزة 
اتكلم عن حاجة تاني تكاد تكون عجيبة نوعا ما 
انا بحب وصفات البيت أكتر، البيتزا مثلا البيتي أقرب لقلبي من البيتزا ال في أشهر محلات البيتزا اللي أكلت منها، فيه حاجة كده حلوة فيها، ليها ريحة مميزة، بساطة التوبينج او الاضافات فوقها، واحنا أصغر شويات مامتي وقبل غزو الجبن القابلة للمط والتسييح ف الاسواق كانت بتعمل لنا البيتزا بدون عجان " يعني بتعب الايدين والصبر على العجن" بيتزا وتعمل لنا صلصة طعمها أحلى من كل صلصة اتعملت او هتتعمل في اي مطعم عشان عاملاها من غير مرجعية 

حاجة كده اسبيشيال هي واي حاجة بعد كده تقليد من الناس حتى لو مش قايلة لحد عليها
الاضافات بسيطة بساطة رهيبة 

فلفل ، بصل، طماطم من غير بذور متدبلين " يعني السخونية بتشيل قساوتهم وتخليهم أطرى" غالبا دي الفقرة بتاعتي ف مؤخرا بقيت بحاول ادبلهم بشوية مياة بديل عن المواد الدهنية بهدف نبيل هو دوقان الأكل فلات بدون أطعمة طاغية مستفزة، أنا من أنصار الملح فقط 
التوابل بالنسبة لي أعداء لو احتجت لهم بيبقى اضطرار مش اكتر 

وهنا عايزة اتكلم عن التوابل المقبولة شوية كنوع من انواع الاستطراد ونرجع للبيتزا تاني 

انا باستلطف من التوابل الزعتر، الكسبرة، الفلفل الاسود، البابريكا

وكل ما هو دون ذلك مش بتاعي 

و بالنسبة ل السبع بهارات واللمة في الحارات ف هي اضافة واجبة  في وصفة واحدة وحيدة  من الوصفات الا ان للأسف غالبا بيكون فيها جوزة الطيب المحرمة شرعا ف الواحد مش عارف يتصرف كيف ويجيب 6 بهارات على طحنة العطار اللي هي دايما برفيكتو بدون زيادات ولا نواقص 
نرجع للبيتزا 

بتحط حاجة من البهارات اللي باستلطفها ف البيتزا ف بتروح في حتة من الحتت الحلوة 

وعلى الوش

رشة زيتون مخلي
انا بحب الاكلات البيتي لأنه حلو وطعمه حلو وجميل 

وبسيط وله طعمه المختلف المميز 

اللي تشتاق له وتشم ريحته وتحس ذكرياته لحظة بلحظة

اه معمول بحب

الكلمة دي حقيقية 

عشان متعب بس بياكلوه ناس بتحبهم 

وبتبقى مبسوط بانبساطهم بيه 

وكل واحدة بتقسموها سوا سخنة وتطبطب على روحك كده

انا لما بحب حد ببقى عايزة آكل معاه 

20:3:2021