عيد ميلاد بابا
من شوية شوفت فيديو لمصطفى حسني كان بيقول فيه قصة " بابي أنت وأمي يا رسول الله" اللي عمري ما ملكت من أمري أي زمام قوة يخليني أقولها وكنت بحس بالتقصير في حب سيدنا النبي عشان ما بقدرش اقولها لاني ما كنتش اعرف حب أكبر من حب اهلي لحد ما حصل اللي حصل ف بقيت بعرف اقولها
لما سمعت الفيديو القصير ده عيوني اتملت دموع وحسيت انها جاية لي في تاريخ زي ده عشان افتكرها واحسها واتوجهها كمان
ياللا ومن قبل ما نعيط في تاريخ مهم زي ده هحكي،
اول مرة قررت اخد خطوة الاهتمام بعيد ميلاد بابا كان في اعدادي
صحيت من النوم كان يوم اجازة من المدرسة وكان عيد الحب على الابواب يعني فرصة اني خلاقي هدايا مالهاش اول من ىخر
اخدت فلوس كنت محوشاها
ومفتاح البيت ونزلت المكتبة اللي في صف المدرسة بتاعتنا اي بعيدة شوية حلوين اويي
بدون استئذان وذلك حتى تصبح المفاجاة مفاجاة
واشتريت لبابا هدية اول حرف من اسمه خزف كان لطيف اوي
غالبا اتكسر قبل عيد الميلاد التاني
روحت طلعت خيط عشان اربط البلالين ف شكيت صوباعي بالابرة لحد ما صباعي العزيز دوحس وكانت حادثة 😅
المهم انا باحكي ده ليه
عشان النهارده عيد ميلاد الجميل بابا يا
ومش هبعت له رسالة حتى اقول له من خلالها كل عام وانت بخيرعشان ماصعبش عليا
مع ان كل عام وكل دقيقة وكل حنتوفة وهو بالصحة والسلامة والرضا والخير والسعادة والجمال واللطف
جدير بالذكر انه واحد اساسي في قائمة السيرش على فيس بوك عندي وكل ما يتراجع باتلهف عشان يتصدر في القائمة وكأني باتطمن
او بقول لنفسي عادي مافيش حاجة حصلت
من حوالي شهر او اقل يمكن 3 اسابيع فتحت الموبايل بتاعه
الصندوق الاسود بالنسبة لي
مازلت خايفة اقلب فيه او افتحه
كل يوم بجرأ نفسي حتة صغيرة، بشوف صورة زيادة، مش هفتح اي رسايل عشان مااعيطش
مكتفية بالصور، يوم الخميس لقيت فيديوز كمان
وامبارح شوفت صور لينا مع بعض
وصور من عيد ميلادي 2019 حقيقي متلخبطة
الاسبوع اللي فات فتحت الابليكيشنز بتاعة القرآن وعملت اسكرين من آخر حاجات قرأها واتفاجئت من الآيات
مش عايزة اقول ايه هي ...
انا فعلا متلخبطة
ومش عارفة المفروض اعمل ايه
بابا لما سافر 2020 سافر قبل عيد ميلاده بكام يوم ماكانش معرفني قبلها بكتير عشان انا كنت رافضة وخاربة الدنيا عشان مايسافرش ف على آخر يوم حطيت له في الشنطة هدية بسيطة لعيد ميلاده جواب ورسومات
جابها معاه وهو جاي مازلت محتفظة بيها في أبعد مكان عن عيني عشان مااعيطش
باتعامل مع الموبايل على انه ثروتي، او كنزي الوحيد، بخاف حد غريب يلمسه
عشان تفضل لمساته تقابلها لمساتي عليه
خير خير لعله كله خير
اهي الصباحات دي كانت كل يوم أحلى من اللي قبله
وكل يوم وهو بكل خير
ملاحظة
اللي عايز يشوف الفيديو بتاع مصطفى حسني يفتح البوم "عام أغاث فيه" على فيس بوك هيلاقيه بتاريخ النهارده 2-12
ليست هناك تعليقات:
إرسال تعليق