üsta

 أو أُسطى 

النهاردة ماما قالت لي اني كنت أسطى امبارح بعد ما عملت لهم مفاجأة وصنعت بسبوسة واللي يعرفنا_واللي هو ولا حد يعرف المعلومة دي_يعرف أننا مش بنعمل بسبوسة اخر 15 سنة  غير لما  بتطلع بالأزميل ف بطلناها، وهنا مش بفضح مامتي لكن الفرن بتاعنا بتاع البوتجاز مش بيوزع الحرارة كويس ف الحاجات بتنشف، ف إنجاز صناعة بسبوسة حلوة من حد ماشي بالبركة زيي إنجاز يستحق التقدير، نحب نزود اني عملت حلة رز بالشعرية ممتازة 

                  ف عاشüsta Fatma عاش

وكما قال عبد الرحمن ظاظا وهو فنان حلواني الأصل 

على مين على مين على مين يا اسطى

ده عشان تقابلني تجيب واسطة

ايش جابك للعتاولة يا شارع واحنا دولة

مش كنا عقلنا أولى!

Stop 🛑

 .

___________________________________

من أول السطر

ب إرادتي 

و أنا من أصحاب الإرادة 

٣ أيام في الجنة

 أمس خبأت الشمس وراء الحائط كي لا تصل إليها  أيدي العابثين، خبأتها بعدما هرب عنها لونها فصارت قمرا خافتا 

أمس الأول استبدل البحر مياهه، قلبها فصار العال دانيا وصار الداني اعلى، وصعدت الرمال لأعلى وحفنت من البحر ملحه المتبلور لأهدي زميلتي كما شاءت 

قبل يومين اقتسمنا مع الهدى قسما واسميناه المسلم الصغير، كان مسجدا مصغر يليق بأن يصبح مسجدا للأطفال 

وفي نهاية الوقت قال لي حبيبي أنني جميلة ووجهي لا مثيل له

            🌻 🌼 🌷 

للمرة المليار

 أقف خائفة  أمام سؤالي الوحيد الذي لم أكن أسأله إلا لنفسي، هل أنا ؟

                              هل ..وكيف..

 و قبل أن تسكُبني دمعة اليأس الجارفة.. أنتظر الإجابة.

طباخة مش شيف

 ده لو هوصف نفسي لما باطبخ حاجة، سبحانه لما يريد بالجمال،   أقدم مطعم بتاع شاورما في حلوان كنا فيه آخر مرة بقوا يقولوا لي أن اللي بأعمالها احلى ومظبوطة أكتر 

من سنتين كنت حاطة في التودو ليست بتاعتي إني اتعلم الطبخ المصري الأصيل من ايد ماما حيث الطعامة والنظافة مرة واحدة و ماما من اشطر الناس في المطبخ بشهادة قرايبنا كلهم وطبيخها بيتاكل ماشاء الله لآخر فتفوتة 

المهم اني كنت محظوظة في الاوائل في أن الاكل كان بيطلع حلو لوحده وصفتين تلاتة بعملهم بيطلعوا مظبوطين لحد ما اتحمست ومافيش حاجة إلا وبقيت اجربها وعشان الحمد لله محظوظة ف ربنا كان بيعدلها من عنده.. وهكذا دواليك سعادتك وبفكر افتح ميني مطعم اعمل فيه حبة الحاجات وانافس بيهم الشيف بوراك الله يسعده

حاجات من البسيطة

 جدتي كان اسمها بسيطة، وكانت أبسط من البساطة والحمد لله خدت منها الصفة دي وبقت الحاجات على بساطتها بتبسطني

يعني مثلا 

بفرح اوي لما اجيب حاجة جديدة زي الشبشب الزهري اللي عليه كريزات حُمر وحمرمر 

 بفرح اوي لما بشوف مشاهدات المدونة وخصوصا الردود

بفرح اوي لما اعرف احقق معادلة المقاطعة من غير حرمان وافضل محافظة على خطتي في المقاطعة بدون خستعة واحدة

بفرح اوي لما اجيب حاجة لحد جاب سيرتها قدامي

بفرح اوي  لما اعمل حاجة من الحاجات اللي بقرر اعملها فجأة

بفرح اوي لما افضل فاكرة حاجة لأن ذاكرتي في المريخ

بفرح اوي لما بحس اني محبوبة 

بفرح اوي لما حد يقول لي انه بيدعي لي

 وبفرح جدا لما حد يقول لي اني شبه بنات عيلته

آيات

 { وَنَادَىٰ نُوحٌ رَّبَّهُ فَقَالَ رَبِّ إِنَّ ابْنِي مِنْ أَهْلِي وَإِنَّ وَعْدَكَ الْحَقُّ وَأَنتَ أَحْكَمُ الْحَاكِمِينَ }

 { قَالَ يَا نُوحُ إِنَّهُ لَيْسَ مِنْ أَهْلِكَ ۖ إِنَّهُ عَمَلٌ غَيْرُ صَالِحٍ ۖ فَلَا تَسْأَلْنِ مَا لَيْسَ لَكَ بِهِ عِلْمٌ ۖ إِنِّي أَعِظُكَ أَن تَكُونَ مِنَ الْجَاهِلِينَ } 

{ قَالَ رَبِّ إِنِّي أَعُوذُ بِكَ أَنْ أَسْأَلَكَ مَا لَيْسَ لِي بِهِ عِلْمٌ ۖ وَإِلَّا تَغْفِرْ لِي وَتَرْحَمْنِي أَكُن مِّنَ الْخَاسِرِين  }

[ سورة هود : 45 إلى 47 ]

..ربنا سبحانه و تعالى بيوقف سيدنا نوح وهو أحد المرسلين المصطفين عن أنه يدعي لأقرب ما عنده لابنه وبيصرح له بحقيقته ف انت ياللي مش نبي ولا مرسل بتتعب نفسك ليه ما دورك انتهى عند النصح 

.

ممكن احط نقطة لنفسي هنا وانصحها بالالتفات لنفسها والله أعلم 

انا لاهصلح الكون ولا سفينتي هتعرف تاخد العالم كله