استكمالا للتدوينة اللي فاتت وكنوع من الفضفضة بدال ما الانسان يطرشق هكمل هنا تاني
ال "Ai" بقى مشوه الدنيا باللي فيها ومخلي الجمال صناعي والحياة بلاستيك و الطبيعة بروميت
ياريت الموضوع على قد الفيلتر اللي بيبروز الحلاوة انما الناس بقت كلها شبه بعض، الاموات بيتكلموا والاحياء ساكتين
العالم بقى مقزز اكتر طالما فيه عالم وهمي بالوان فجة بيترسم بداله
"الاكل و الشرب" لاليهم لا طعم ولا ريحة ولا لون، شوية صوصات لزجة مسكرة مخلوطة بطعام رديء ما بيتاكلش بنفس، ما بيعملش ريحة ترد الروح للبيت، ما بيعملش ذكريات جميلة، مابيعملش حياة في البيت، ولا بيعمل طعم مميز تشتاق له ف تطلبه، القهوة بقت باردة و الشاي بقى كشري، و اللبن بقى عصير مكسرات.. الحاجات ما بقيتش هي الحاجات
"الوقت" مش بيكفي للحياة، مجرد لهاث لناس مستنية اليوم يخلص عشان السنة تخلص، ماحدش عايز يعيش يوم بيومه، ماحدش مستني البطيخة تسقع كهدف جميل في يومه و هو قاعد بيقرأ شيء بهدوء
البني ادم بيلعن كل شيء بيبطئ حركته، بيلعن الزحمة وغباء اللي حواليه، بيلعن حظه، بيلعن الهدوم اللي عليه.. الناس مش راضية عن حاجة
"الضحك" بقى ماسخ شبه ابتسامة التملق لا بتفرح ولا بتبسط، واقوى ضحكة تحس انك بعدها عايز تتوب، تغتسل من بقعة ما سابت على قلبك من ملل او ضيق
تحس لسان حالك بيقول لك "انت مصدق نفسك!"
لذلك محتاجة مااخدش اجازة من الدنيا دي، محتاجة ابني انا واللي طلعوا دقة قديمة معايا مدينة نكمل فيها زي ما احنا ونسيب بابها موارب اللي عايز يجرب يتفضل واللي عايز يمشي براحته
ف السؤال دلوقتي:
هو انا بقيت دقة قديمة و لا انتوا اللي ذوقكم يقرف!!
