درويش من سوء الحظ ماعرفهاش، كان زمانه له ديوان عن الناس ال ما بتتنسيش، الناس ال كل اللي شافها بيحلف بحياتها بمنتهى الحب لحد دلوقتي
النهارده حلمت بستو ام نور،
"حلم مفاده انها قاعدة في حوض والحوض ده مكانها واللي هي الوحيدة ال هتقعد فيه واني انا كمان بجرب اقعد فيه مرة لوحدي ومرة معاها " يمكن الحلم غريب و ليه معنى انا ماعرفهوش لكن النهارده انا محتاجة اتكلم عنها اوي
ستو ماكانتش مجرد واحدة وخلاص، انا طفولتي لو كانت سوية إلى حد كبير ده يعود ليها
انا فاكرة مرة زمان شبطت ازور قرايبنا بعد الساعة ١٢ كنا مروحين البيت و عدينا من قدام بيتهم طلبت نروح لهم ولأن الوقت متأخر ماكانش ينفع
بس على مين زربنت و راسي وألف جزمة ل لازم نروح لهم خدت بعضي وجري على عندهم طبعا الناس استغربت من التوقيت و ضحكوا لما عرفوا السبب واني وانا عندي٥ سنين وحشوني وجيت أزورهم و روحت أجر أذيال الهبل و محملة بالوعيد لحد ما روَّحت و اما حان وقت العقاب اتفاجئت بيها حايشاني ورا ضهرها وبتقول لهم "حدَّ الله عليكوا ما تضربوها "
انا بسبب الجملة دي ال عمري ما هنساها ما اتضربتش يومها لأنهم كانوا بيحبوها ويحسوا كلمتها ويقدروها
ستو مرة زمان اتظلمت قدامها واما ماقدرتش تاخد حقي قعدت تعيط جنبي وانا اكتر واحدة ف الدنيا بتجيب حق العيال بالعياط جنبهم اما ما باعرفش اساعدهم "هبقى احكي ف ده بعدين"
ستو ماكانتش ييجي لها نوم الا اما تطمن على كل حبايبها ،انا طلعت لها في الحكاية دي، روحها ف اروحهم زي حالاتي
ستو كمان كانت بتفوِّت بس مش عشان المركب تمشي لكن عشان هي طيبة وبمجرد كلمة حلوة ولا سلام بتنزل على مافيش وانا طلعت لها ف ده مهما افضل زعلانة كلمة بتغيرني بس انا مش طيبة زيها
انا أصلا مقتنعة ان انا شريرة وبتغاظ لما ناس كتيرة تقول لي ان انا طيبة بضحك واقول عليهم قلبهم ابيض
يمكن الكام سنة من يوم ما ما شوفتهاش لحد النهارده عملوا فجوة عجيبة بيننا يمكن لو كنت كبرت وهي معانا كنت هعرف ابقى صاحبتها مش بالاجتهاد لكن عشان فيا منها كتير لكن لو قابلتها دلوقتي وبرغم ال ف قلبي ناحيتها الا اني هاخد وقت على ما آخد عليها مش بس أكلمها زي ما بكلم الأغراب
ساعات بفكر أصور صورتها وانشرها واقول للناس شايفين جمال جدتي ال عمركوا ما تحلموا بيه لكن باستخسر، أصل مش أي حد يطول يشوفها
ستو هي الكنز ال ف اوضتي، و الهدية ال ف قلبي مش بِحُبها بس لكن بحبة أحاسيس خدتها منها
على الهامش:
من سنتين قلبت في حاجاتها ال عندنا لقيت شعراية
من شعرها فلفيتها ف منديل و احتفظت بيها ، ستو الهينة اللينة أعتقد بتزورني ف المنام أكتر من كل الناس اللي عرفوها لأنها عارفة اني بحبها ويمكن بتحبني ويمكن قريب أزورها
ليست هناك تعليقات:
إرسال تعليق