الكنز الفريد

شهيــــــــــــــق & زفيـــــــــــــــــــــــر

        كل الأحلام التي تفوتني تباعا، تصنع حملا فوق صدري، كسلسلة من قطارات صغار، تتشابك لتتسلل إلى قلبي معلنة انتصار ما في ارغامي على تَقبل الهزيمة لكنني أتنفس ، أزفرهم   ف ألفظهم جميعا

        كل يوم أفكر في الاستسلام، البكاء جانبا ، وضع شارة الفاشلين فوق كتفي، أفكر في أن أتكور جانبا بجوار كرسي كبير لأبدو بجانبه أكثر صغرا، ف أربك تجاسري وأفوت عليّ كل الحيل فأقيده بوثاق من اليأس لكنني اتنفس، أزفرهم ف الفظهم جميعا

        كل صباح أفكر في أن العالم لو انتهى هذه اللحظة فلن يحزنني فوات حلم ولا تبدد أمل وستتساوى في عيني النجاحات والفشل  ويصبح الخراب بجانب العمار لاسور بينهم لكنني اتنفس، ازفرهم ف الفظهم جميعا

      وأعين قلبي على ما فيه وأتنفس اشراقة جديدة أزيل بها كل هم فأزهر ربيعا ييفترش قلبي ليستريح ممددا قدميه في وجه كل عجز ويبقى  راضيا منتصر

الرسمة دي رسمتي

للاستماع للنص: https://soundcloud.com/fatma-ragab/zyjrxxn2dknw

شيكولاتة بيضا

شيكولاتة بيضا
انا متضايقة وعايزة شيكولاتة، لازم دلوقتي شيكولاتة بس شيكولاتة بيضا ، كام جرام 200 حلوين ، حلوين اوي 
 الشيكولاتة بعد ماجبتها طلع طعمها وحش 
ليه مافيش حاجة سهلة ؟
كل حاجة فيها حاجة طالعة جواها وكل اجابة سؤال جواها سؤال تاني
وكل حل مشكلة جواها مشكلة
ولاد الأرانب
مش عارفة مالي انا دماغي دايما شاطحة في حتت غريبة وبربط حاجات مالهاش علاقة ببعض وحاجات مالهاش علاقة ببعض بتفكرني ببعض
المشكلة ان عقلي لو حطيت فيه منظم ادراج هيبقى فاضي 
البطلة في الفيلم نزلت من العربية من غير ما تستنى البطل يفتح لها الباب، قعدت افكر ليه مافتحلهاش يمكن عشان ماكانوش لسه اخترعوا الموضوع ده ، بس البطل ف الفيلم عايش اوي دور ال بيفتح الباب موضوع فتح الباب ده فكرني بولاد الارانب البياعين ال مش بيحبوا يطلعوا اكياس لما اكون هشتري حاجة هو انا لازم افتح الباب بتاع مخكوا بنفسي واقول عايزة كيس بلاستيك لازم طلب ده منطقي ماعنديش عشر كفوف يشيلوا الحاجات ، ماتفتح لها الباب دي ماجدة انت عبيط هي من امتى ماجدة بتفتح باب العربية بنفسها
عمر كمال
حوار :
_مش فيه اغنية حلوة عاملها حسن شاكوش ومعاه واحد صوته حلو اوي اسمه عمركمال
 😮🙊😡
عمر كمال مين ال يغني مع حسن شاكوش لا مش معقول واثارصدمة على وشي، بهدا شوية واتخانق معاهم وانا متخيلاه وهو بيغني انتوا مجانين
 "معرفش مين حسن شاكوش بس سمعت اسمه قبل كده"
_انت تعرفيه؟ ده صوته حلو اوي
ايوه يا جماعة انتوا كمان تعرفوه وقبل مااجيب لهم أغانيه ال سمعتها له 
بيطلعوا لس صورته وصوته، الحقيقة انه مش عمر كمال ال اعرفه بس عمر ده صوته بردو حلو وواضح ان الاسم لايق عليه الغنا ، على كل حال وبغض النظر عن اني مش مستظرفة اوي الغنوة ومش حاسة يعني انها واو ومستاهلة الضجة الا اني متمنية لعمر كمال القديم والجديد انهم يفضلوا نفسهم ومايغيرهمش الجو ال حواليهم 
كمان عمر الجديد سمعت صوت واحد شبهه قبل كده كنت بشوفه بيغني ف المترو من سنين كتير واتمنى من كل قلبي لو كان هو ده لانه كده هيبقى لقى سكة وصول نجح خلالها واتعرف اسمه بس ياريت لو يرجع للونه الأصلي ويسيبه من اللون ال مش شبهه ده
الشاب ال كان في محطات المترو بيغني كان بيغني محمد فؤاد حلو جدا

عموما لا يسعني في عيد الحب المبارك الا ان اشرب شاي بلبن

واقول اني بحب فلفول الى أقصى درجة

  وخلي ال يقول يقول
وعلى الدنيا السلانكاتيه

to do list

الكي بورد كان عربي وانا بكتب العنوان ف كان الناتج كلمة "فخ" وبصراحة يا محاسن الصدف، هي فعلا فخ بس فخ لذيذ كده انت ال بتعمله بنفسك او لنفسك على حسب ، ف لو الأنتخة رقم واحد بالنسبة لك ف الناتج ان الفخ ده بيكون معمول ليك اما لو كانت الأهداف ليها الأولوية ف الفخ للعراقيل واللعبكة والصخور ال ف الطريق
وبصراحة ودون أي شعور بالذنب أنا ميالة للأنتخة ف الفخ دايما وقعته شديدة
التودو ليست او اصلا اي شئ ليه علاقة بالتنظيم والخطط ما بيفرقش معايا شكله قد ما مهم ويفرق لي أكتر انه يكون مريح ليا "حبيته" وخلاص، يعني اي مفكرة بيسك كده دي عندي أقرب من الحاجات الحلوة المنظمة ال كلها ألوان وبتقول لي اكتب ايه فين وكأني لو خالفت وكتبت ف مكان تاني هاخد غلط ف كراسة الواجب، الجداول والألوان اللي بتنصب الاجندة ولي عليا بتضايقني وتحسسني اني مضطرة اعمل الحاجة ، انا بحب افكر واحس واشوف انا محتاجة اكتب ايه بحب اخطط بنفسي واحس ايه ال ناقصني بنفسي وادبر بنفسي مكان يساعني ولما اتوه ادور بنفسي واحاكي بايدي وعقلي لكن حد يقول لي او يفكرني او يقحم نفسه وينظم لي بنفسه يومي ويعرفني المفروض اعمل ايه ده بيحسسني اني مضطرة ابقى نموذج "صورة مش أصل"

لذلك عمري ما اجبرت نفسي على مفكرة، لدرجة ان مؤخرا كان عندي كراسة انجليزي من بتوع الاطفال ال فيها خطين فوق بعض عشان الطفل يرسم الحرف جواهم بسهولة  دي 

دي كانت احب المحببين الى قلبي لدرجة جلدة الكراسة اتقطعت وانا مصممة اخدها ف كل مكان، حتى مقدمات اوراقها اتطبقت

حب غير منطقي زاد ف قلبي لما ابتديت املاها من الكنز الفريد يوم بعد التاني، ف الغلاوة زادت بمراحل

جوجل كمان خدمت الموضوع ده بفكرة :Google Keep

ال عن طريقها تقدروا تعملوا خطط يومية واسبوعية وسنوية كمان 

والابليكيشن سهل جدا وشارح نفسه ولو حابب ترفق مع النوتس صور او فايلات او رسومات كمان الموضوع سهل جدا لذلك ب انصح جدا بيه 

وعندك أفكار عبقرية هنا وصلحه

أعتقد ان ده وقت مناسب عشان أتكلم، من كام سنة وبدون مقدمات عرفت وبتجربة ضغيرة انك ممكن تساعد انسان ف انه يتحسن ف المعاملة والأخلاق والمبادئ بطريقة سهلة اوي وهي انك تحسسه ان دي أخلاقه فعلا وتمجدها عنده فلو مثلا عايزه دايما بيتكلم بصدق حسسه انه صادق واستحسن صدقه وعرفه ان دي من أجمل صفاته، وهكذا ف هو طول الوقت هيقول الصدق لان ده شئ مستحب منك لحد ما مع الوقت هتبقى دي عادته، ال مش ممكن تتغير، واثناء ما بحاول اتحسس الحاجات الحلوة ف الناس عشان أبروزها لقيت نفسي لا اراديا بفلتر منهم العيوب ومابشوفش غير محاسن وبتجاوز كل سوء ثم اصبحت عادة ف انا عامية عن كل المساوئ ال ف حدود معاملاتي
لحد هنا احنا ممكن نكون في المدينة الفاضلة فيه صفات حسن بتكبر وبتبلع جواها كل نقاط الضعف وللأسف كمان  بتبلعنا احنا شخصيا، ماهو انسان طول الوقت بتمجد في قدره هيتخيل ومع الوقت هيثبت جواه انه من فرط الحسن بقى ملائكي جدا ومايصحش يختلط بالعامة مين العامة بقى؟
_انا
بالظبط كده
ف احنا الاول ملايكة ف نعمل ايه للعامة ؟
نحاول ندلهم لسبل الرشاد، ازاي؟
ندور على نقاط الضعف فيهم ونكبرها ونبروزها ونحاول نعرفها لهم ونشخبط لهم بالقلم الاحمر عليها ونخنقهم بيها وطبعا مش كل العامة هيرتقوا لمرحلة الملائكية ف  ايه ؟ ها؟
لذلك أعتقد ان دي مثلا من أكتر 3 حاجات كبار كنت غبية فيهم
وغبية مش طيبة ، لان النية الاول كانت طيبة ووسعت مني وغرست وبقت عادة مش هدف وف النهاية كلنا مش ملايكة ، أقول قولي هذا واتمنى ان كل أصدقائي حبايبي وزمايلي في الانسانية ال بيسعوا ورا المدينة الفاضلة احسبوا لنفسكم حساب جنب كل شئ لانكم لما بتحاولوا تهمشوا نفسكم في سبيل قضيتكم بتتحولوا لمجرد هوامش.
 وشكرا 
تصفيق 

       نفس الشئ ولكنكم تحبون ناس مايعلم بيها الا ربنا

ده بيبقى شكلي وانا بتأمل عبقريتي

اللاشيء

الآن    

يمكن تطبيق الأمر على الأشياء واللاأشياء

     أكاد أجزم الآن أن قوة ما لن أسميها بأي اسم، تدفعني إلى هنا، لن أقول أنها قوة خارقة لأدعي البطولة ، فيمكن لأي شخص أن يطعن في هذه القوة او يجزم ببطلانها، لكنني لن أنكرها حتى وإن استهنت بها،  تلك القوة التي تصاحبني كثيرا والتي كنت بجهل ما سابق أسميها ب ال بلا ، أو أدعي أنها ال بلابلابلا ولكنني سأسميها بما يليق أن أسمي شيئا مثلها به، سأسميها بـ"الفَلَس"، أو تحديدا قوة الفلس، ذلك الشئ المُلح الذي يدفعك نحو دفاترك القديمة لتبحث عن قرشٍ هنا ومليمٍ هناك لتسد حاجة ملحة نحو المال دون تذكر ان العملات المفقودة لم تعد عملات يمكن تداولها أصلا وانما ذكريات،  أقول هذا وانا أمام هذه القوة الجامحة أنظر لها بكل تحد، لأخبر معلنة انها خائرة، متى تجاسرتُ في تجاهلها تبددت، فلا داع لأن تحاول من جديد، الأمر وكل أمر يدعوك للشك، هو قدر ليس إلا!.

يوما ما ماعرفهوش

مرة واحد نصحني مااكتبش أحلامي
وماقاليش أي أحلام دي ال يقصدها ، هل مثلا أمنياتي ماهو احنا بنقول عنها أحلام بس مش عارفة ليه هي عشان بننام فيها عن الواقع لكام ثانية نتخيل لما نفتكرها حاجة ما بتحصلش ف الحقيقة ولا عشان صعبة ولما بتحصل بتكون قدر
ولا يقصد الأحلام بتاعة النوم 
آه بالحق ساعتها كنت بحلم أحلم بمعنى "بتمنى أشوف منام معين" 
مرة زمان حلمت اني بقابل حد مااعرفهوش ف مفترق طرق أو ربما ملتقاه، كنا بنجري لحد ما اتقابلنا ، كان حلم حلو ، وانا الأحلام الحلوة دايما مخاصماني وبتبعت لي صحابها الفاشلين يزوروني بالليل وعشان كده توقع مني أتمنى تفصيلة حلم، ده من منطلق الجعان يحلم بسوق العيش ولكن الحلم المرة دي جاي بمعى التمني ، أوووف 
رجعت تاني لاشكالية التمني والمنام ، لا خلاص بقى والله ما انا مكملة ، انا زهقت
ما علينا ما علينا
إحدى أخطر أمنياتي القديمة الجديدة الحلوة القطقوطة البسكوتة :
وف يوم ما ماعرفهوش وبإذن الله تعالى هــــ
1_أرسم بالألوان ، مرة ف مسلسل كان فيه فنان خاين كده وكان بيعمل حاجات مش حلوة كتيرة_وانا بصراحة بركز ف حاجات تانية مهمة جدا وماتهمش حد الا انا فماكنتش مركزة أوي ف اني اكرهه_كان بيرسم بالألوان مش بالفرشاة وبيستخدم صوابعه للرسم يا خبر يا خبر انا كنت مبهورة واللوحات كانت كبيرة طوله واطول منه ف انا كنت باتمنى بس لو الاقي الفرصة ال اعمل فيها ده ياه ياه ياه
2_العب ف الطين، ياه من وانا صغيرة وانا نفسي  أعمل أواني فخار بالطين والطمي والحاجات الحلوة دي نفسي جدا ف الحكاية دي أعتقد اني ممكن آخد الطين ف حضني لو لقيت الفرصة 
3_أبطل اعمل فهلوية وانا بسمع حاجة انجليزي أو تركي واقنع نفسي اني فاهمة، معظم الكلام مش مفهوم وانا يا باخده بالشيه ، الفكرة ان بسمع كتير لغات وكتير غير مترجمة لكن ولا مرة استمريت ف حاجة بدون ملل او بحث عن ترجمة ، اعتقد ان لو معايا امتحان هحل فيه كويس او حتى لو راجعت كتاب التركي ال معايا هجيب ف اي امتحان ترجمة درجة حلوة جدا زي أيام الجامعة  لكن ممارسة زي الناس لأ  
4_أحاول أعمل رجيم  والمشكلة عندي ان اي نظام غذائي فيه طريقة اكل معينة أنا لو اتبعتها هتخن أكتر ، الكميات والأنواع  ال بيحطوها بتبقى أكبر من ال متعودة عليه  ف بالتالي مش مناسبة أبدا ليا ، ف يبقى الحل ليا رياضة وده غير متاح الفترة دي 
5_أبطل بيبسي ، آخر مرة بيبسي كانت من اسبوعين انا مبطلة شاي من حوالي 3 سنين وقهوة تقريبا طول حياتي ممكن مولودة مش بحبها، لكن ابن الكلب البيبسي ده مجرم بشكل ، طب ثانية كده انا ممكن اعمل كده دي سهلة على فكرة ، ممكن استبدل ال بيبسي بزبادي او لبن رايب ساقع لطيف 

ف حيث ان الشخص ال نصحني بالنصيحة الخطيرة دي ما فهمنيش هو ليه مش عايزني أفصح عن أحلامي ف انا أفصحت  وقلت وكتبتها ولو هو حكيم اوي اوي اوي يعني والاحلام دي مش هتتحقق ف اصلا عادي انا متقبلة نفسي زي ما انا ولقيت حل للبيبسي  الحمد لله ومش فارق معايا "وش مضيق عنيه" 

احم احم انا اكتشفت اللعبة دي السنة دي وده أعلى اسكور وصلت له