"رَبِّ ابْنِ لِي عِندَكَ بَيْتًا فِي الْجَنَّةِ"

السلام عليكم ورحمة الله وبركاته

ندخل في الموضوع

حياة الانسان ما هي الا ساعة رملية مقلوبة من لحظة ميلاده وحبات رملها مش قد بعض ف ماهياش قياس على ساعة حد ف ساعة الصفر بتقرب من اول صافرة البداية، يمكن احنا جيل محظوظ بشوية الأحداث ال بتحصل حوالينا الفترة دي من السنة ال فاتت مثلا ومن سنين ياما باحساس المراقب اللي عمال يقول الوقت بيقل ، الوقت قرب يخلص، الوقت بيضيق ف نبدأ بالمراجعة وحل الباقي من الاسئلة والمؤجل 

والاستغفار والتوبة ومراجعة النفس هم السبيل الوحيد للنجاة من الفشل ، من حسرة الخروج من الامتحان حاسين بالضياع ، حاسين بالفشل أو حاسين ان درجاتنا على الحركرك، او حاسين بان خلاص مافيش حتى مجال لملحق لاعادة 

انا هنا مش باتكلم خالص في الخروج من رمضان والمسارعة بتحري ليلة القدر ف العبادات والخروج منها مقبولين باذن الله ، لا ربنا يبلغنا الطمأنينة دي انما باتكلم عن اللحظة كل لحظة في حياتنا يوميا بداية من كل لحظة ومع كل حبة رمل بتقع لازم تتلحق وتتغلف بذكر واستغفار وتوبة وعمل يشهد علينا باننا بنحاول ومش بنضيع الوقت

يمكن عمري ما في سنة قلت اني هتوب قبل النهاية بس كنت دايما راضية واحدة واحدة عن الأعمال البسيطة وببني البيت على المهل ومش فارق معايا اوي ان يكون لي قصر وراضية باني بس يبقى لي بيت ومش مهم الحجم المهم المكان "الجنة " بس حقيقي اللحظة اللي انا فيها دي فعلا والله مش ضامنة أصلا اذا ليا بيت أو لأ ولو هيبقى لي ف بنسبة  مليار في المية مش هيكون اتبنى أبدا  بكسر الطوب اللي مليت بيه في حياتي أبدا وانما برضا ربنا ومراضيته ليا وبس كده اللي هو لما يكون الطفل مش عارف يكتب ف تمسك ايده فتساعده و تسعده وتحسسه  ان هو اللي كتب وبس ! 

انا بقول ده عشان يمكن من اللحظة دي حد فينا يستحضر نية توبة او نية عمل صالح تستحق قصور مش بيت حتى لو مالحقش يسعى ينفذ شيئ من ال فكر في تنفيذه .. وربنا مهما كان عارف يفرق بين النوايا وعارف الفرق بين فرعون اللي قال

"قَالَ آمَنتُ أَنَّهُ لَا إِلَٰهَ إِلَّا الَّذِي آمَنَتْ بِهِ بَنُو إِسْرَائِيلَ وَأَنَا مِنَ الْمُسْلِمِينَ "

 وبين اللي صادق مع نفسه ! 

المشكلة ان لو الشمس ظهرت من المغرب خلاص كده كل واحد هيعرف ان اقلامه هتتسحب وانا اتمنى يارب لو تتسحب ورقتي وانا مراضية نفسي بيها لحظة بلحظة ومايتسحبش قلمي واعيش عندي ورقة محتاجة تتملي وعارفة مواضع نقصها وأماكن فضاها وعارفة جدا جدا جدا الاجابات الصحيحة في اكتر امتحان اوبن بوك في العالم جاي من المنهج بلا أي اسئلة ذكاء  ومش معايا ولا مع حد قلم نملأ بيه أوراقنا 
انا عارفة ان اللي بقوله مرعب بس على الأقل مش هيحصل النهارده لان الشمس ظهرت من المشرق خلاص ف نلحق النهارده .. النهارده وبس وصدقا انا ماعدتش باحسبها بالوقت التسويفي خالص  وده مش تأثير كرونا انا خدت منها بس معنى وربنا ينجينا جميعا ويرزقنا سعة في الوقت وبراح للنية الصالحة والعمل ويرزقنا الاخلاص والقبول 

لينا دور كلنا مهما كنا كلنا ضئال عملا وعبادة في نظر أنفسنا 

لينا دور وربنا بعت لنا اشارة عنه لما قال  الرجل ال ربنا ماقالناس اسمه 

وَجَاءَ مِنْ أَقْصَى الْمَدِينَةِ رَجُلٌ يَسْعَىٰ قَالَ يَا قَوْمِ اتَّبِعُوا الْمُرْسَلِينَ (20)

                        ف ربنا أحصى عمله وكرمه وذكره في القرآن ف اذا أعمانا مذكورة عنده تعجبه وترضيه

ف مانستصغرش من العمل شيئ 

لعلنا صادفنا عمل واحد يذكره لينا ربنا برضا