في عام 2012 بابا حج بيت الله ، ومن هنا اصبح له الحق في انه يتقال له يا حاج، في 2013 مرض مرض شديد لحقه تعب تاني بنفس الشدة في 2014 كانوا السبب في انه يقضي فترات طوال في المستشفى، وف يوم وانا مرعوبة عليه قررت اني مش هروح وهتطمن عليه من البيت عشان كنت بجرب كل الطرق في تطمين نفسي، اجرب يمكن لما ماروحش يبقى احسن!
كان عندي امل كبير اوي ان هيطلع وشي يبقى وحش عليه فلما ما اروحش هيخف ويبقى أحسن، اهو اي امل باتشعلق فيه وفي الف داهية احساسي باي حاجة حلوة ف نفسي قصاد اني اشوفه حلو قدامي.. بس اعرف منين انه بقى احسن؟
هكتب له جواب واتحجج اسأله في التليفون قراه ولا لأ واسأله عن اي حاجة في الجواب وان جاوب وصوته بقى حلو هيبقى بقى كويس الحمد لله
وعملت كده وبعتت له جواب مفتتحه حاج رجب الحليوه .. صحيح ماطلعش وشي له علاقه بانه احسن ولا لأ واخد وقت طويل وكبير اوي في انه يسترد جزء من صحته بس كفاية عليا انه رجع لي الحمد لله
حاج رجب الحليوة هي مفتتح الحكاية ما بيننا، من يومها وهو ده اسمه وبناء عليه بقى اسمي حاجة فاطمة الحليوة
حاج رجب الحليوة بتعطيش الجيم و ضم الحاء وفتح اللام وتسكين الياء وفتح الواو ، لما بابا سافر بعدين بقى عندي فقرات ثابتة يوميا بنتصل ببعض ونفتتح كلامنا بحاج رجب الحليوة وحاجة فاطمة الحليوة ثم اي حاجة بعد كده، اول سنتين يمكن كنت بقعد اعيط طول الليل لو رنيت عليه واتأخر في الرد، وافضل صاحية لو بالليل لحد ما يفتح النت او يرد على التليفون واول حاجة اعملها اتحايل عليه مايسيبش موبايله فاصل ابدا
ويرد عليا حتى لو فين
زمان وانا صغيرة بابا تعب في البلد، كنت صغيرة اوي يمكن اقل من 5 سنين كانت حاجة شبه التسمم الغذائي، كنت بفضل مكلبشة فيه عشان ماسيبهوش وامشي من كتر خوفي عليه احسن بعد الشر ما اشوفهوش تاني، كنت خايفة من اني افقده في سن مايدركش المعاني دي، كانوا الستات بيتصعبوا على ان ياعيني خايفة على ابوها وكان الخوف ابشع من كل خوف عليه، كان خوف جنائزي مظلم، كنت تايهة جدا وما بيطمننيش غير اني افضل في حضنه هو وبس
النهارده عيد ميلاد بابا 12/2/2022 كل عام وهو بخير
ليست هناك تعليقات:
إرسال تعليق