يا طير 🕊

 صباح الفل 

امبارح ماكانش فيه أي حيوانات خالص الصبح في الطريق،  كلاب ولا قطط ولا حتى عصافير أو حمام، ماعرفش ده مرتبط بدرجة Hلحرارة وهم بيفهموا عننا ولا لأ
يعني أذكى مننا ومش من المنطقي حد ينزل أصلا في الجو ده ولا ايه، لكن على كل حال حصل طيب، وليا شغل معاهم أما اعرف لغة الطير، لما بقرأ عن سيدنا سليمان باتمنى أني أتعلم لغة الطيور والحيوانات وكمان والجمادات والنباتات وكل شيء بيسبح بحمد ربنا على الأرض
كنت بشوف على مدونتي ولقيتني من سنين كتير أوي كنت قايلة هنا اني بفرح لما الطيور ما بتتحركش ولا تطير لما بعدّي من جنبهم ، وده اللي افتكرته لما قعدت أهلل في العربية واحنا مروحين  من كام يوم لما حمام كتير نزل على الأسفلت قصادنا وماخافش وده مش منطقي أصلا في طريق سريع زي ده، وفي وقت حر أوي زي ده بردو ف حسيت بالأمل فيا والله 
أنا لسه زي ما انا بس ما بقابلش طيور كتير
بقابل عصافير وحمام بس في الحبة الصغيرين اللي باتمشاهم الصبح ، وبقعد أمتن امتنان ابن لذين لكل طائر ما هججتهوش بمشيي من جنبهم
وبيدوني ثقة في اني مسالمة وده مش لأي سبب غير ان العصافير كائنات مرووشة أصلا واي ولا حاجة بتخوفهم ويطيروا
أقول قولي هذا وأتمنى لي ولكم "أفئدة كأفئدة الطير"🤍

                                                                                                                                                                

ممم

ملاحظة لطيفة 

سمعت كروان من كام يوم  وكنت بقالي كتير ما سمعتهوش

مانشيت

 أول بطة تقتل عنكبوتا عملاقا من كتر الضحك

لسبب ما مجهول بخاف من العنكبوت خوف اقرب ما يكون للفوبيا، فلبي بيفضل يخبط ومابقدرش ابص له ونفسي بيروح في حتت عجيبة كده، اول ما شوفت العنكبوت بيقرب عيا رحت حطيت كل خوفي في قوة جبارة "احم احم" يعني وقعدت بالخدادية "سلاح الجريمة" الأقرب وقعدت أضربه بيها وانا بقول  

"انت عنكبوت انت عنكبوت انت عنكبوت مهبب"
مشهد درامي ماعملهوش طارق الدسوقي في أي مسلسل سهرة درامية تسعيناتي، مهما بلغت قسوته في الانتصار للحق، وماتعملهوش فنانة الفيناتي بتقاتل حبيبها بالمخدات الريش نعام
بصراحة انا متفاجئة بيا ومستغرباني آخرحاجة وتلاتين حاجة بس مش بتنح كتير عشان انا اصلا واحدة من عجائب الدنيا المليار ولسه ما اكتشفونيش لحد دلوقتي لان الدنيا اصلا مافيهاش الا عجايب 

ما علينا 

في المواصلات دايما بتحصل معايا خركة بايخة جدا وهي ان هدومي بتللف على رجلي واتشنكل فيها، الوسع والطول بيعملوا كده، اه صحيح مش هستبدل ده بحاجة أقصر أ أقل اتساعا  بس باتلبخ او بقيت أتلبخ أكتر ماعرفش ليه مع اني ماكنتش باتلبخ كده من لما كنت في الجامعة بس واضح ان الواحد بيرجع لأصله 
ممم لأ انا كنت باتلبخ في الجامعة بردو بس غالبا كنت متأخرة على المحاضرة ف مش وقته

21‏/9‏/2022 11:44 م

كلمة لأ

 الكلمة الصغيرة اللي تشبه راس الدوامة دي قادرة تسحبك للأبد لمكان مجهول او ترميك في مكان بعيد عيان ومش قادر ومافيكش حتة صغيرة  سليمة

في المجهول هتفضل غريب حتى لو  وحداني حتى لو هتبقى مفتتح الجزيرة المهجورة او نقطة بداية الكون الجديد فتتحول لأة لمفتاح  لبوابة جنة اللأات وانت بقى وصبرك و مقدرتك على تحمل كم اللاات اللي هتواجهها عشان تتربى اولا وتتعلم وانت في منطقة ما بين الجنة والنار جسمك في الجنة وروحك في النار عقلك بيقول لك طول الوقت ما تصدقش روحك الجنة اهيه احنا فيها لامسينها وحاسينها وقلبك بيضخك ضحكة بطعم البكاء بتقول لك اوعى تصدق انت بتتكوي وبس الجنة بره في الصورة مش جواك

الدوامة بتاعة لا مش دايما رحيمة ومش دايما قاسية ساعات بترميك في المكان البعيد خلصان بس فيك النفس, فيك الروح مهما كنت بتتوجع  فممكن يكون لازم لك وقت تستشفى بيه تلاقي بيه بواقي نفسك القديمة، نفسك البعيدة اوي اللي ضاعت منك او ظنيت بضياعها في الطريق هتتعب و دي مش سنة الحياة دي سنة التجميع سنة التركيب سنة لملمة شمل الفرد بنفسه فيتلملم ع المهل بس بيرجع ويحس الجنة اللي جوة ف يا بخت اللي يلاقي الحلو اللي جواه ويعرف يميز ما اذا كان الحلو كان حلو فعلا ولا "لأ"

النتيجة بوستيف

انك تكون متميز دي حاجة محتاجة شوية تفكير كده شوية، أنا باعمل ده ليه ، عشان انا عايز ده ولا عشان العالم بيدفعني نحو اني احس ان ده ناقصني، لاني شاف المتميزين كتير حواليا، وعاديتي أو طبيعتي أصبحت نقص وأصبح حتى  تميزي، لا يٌرى بأي عين وأصبحت أنا مجرد ترس صغير في آلة جوه مصنع آلات عملاق حاسس انه بلا قيمة، وبالتالي وقصاد العالم اللي بيلهث نحو المعجزات، انا بضطر أكون شغوف بحاجات ممكن ماتكونش بالأهمية، اللي هتتحقق عن طريقي، زمان وانا صغيرة ماكانش حد بيسألني عن هواياتي وانا كنت باستغرب من جملة ان كل انسان ليه هواية، وانه لازم يدور عليها جواه، لحد ما لقيت لنفسي هوايات كتير، الرسم واحدة، الكتابة وحاجات تانية صغيرة 
التحديات اللي كانت بتتحط علينا كانت عملاقة، انت مطالب من وانت صغير تختار وظيفة وتبدأ تحلم بيها من غير ما تكون شايف كل الوظايف عيانا، ف لو قلت انك عايز تبقى بياع عرق سوس يستغربوا انك مش عايز تبقى طيار طيب انت هتشوف الطيار فين يوميا عشان تبقى شغوف تكون زيه، لكن في الشارع سهل جدا تقابل بياع العرق سوس وتعجب بالصاجات اللي بيمسكها ومهاراته فيي الصب، وعذوبة وبرودة وروعة منتجه في عز الحر ده 
يبقى مين اللي هتدور تكون زيه، مين اللي هتحبه، وتحلم تتشبه بيه، ثم يتدخل الكبار، وهم بيحققوا احلامهم فيك ان الطيار بيلف العالم ده غير انه مقرش ومبسوط ف آه بقى فتلاقي نفسك بتلاحق سراب كل مدى بيبعد عنك وكل مدى الموضوع يوسع والتحديات توسع وتختار اختيارات تانية لأنك تايه او بمعنى أصح مش موجه في اتجاه انك تحس بنفسك وتسمع لها وتراضيها، تديها فرصة انها تتحكم وتعقل و تواكب للي تختاره يمكن تكتشف انها اعقل من كل الل بيحركوك أو يمكن عندها خطة جديدة خطة مميزة تحل كل الأزمات من غير ما تحتاج لمعجزة
جرب

حِيْنَ أَرَاْك

 لَا زِلْتُ أَرَاك

 وَرَغْمَ كُلِّ كُلِّ شَيْءٍ لَا زِلْتُ أَنْدَهِشُ ، حِينُ أَرَاك أَصْحُو مُفْتَقَدَة نِعْمَة أَنْ نُصْبِحَ مَعًا ، وَلَا أَفْهَمُ لِمَ رَأَيْتُك ؟ هَلْ لِأَتَذَوَّق اَلْقُرْبَ ، أَوْ لِأَخْشَى اَلْفِرَاقَ !

 لِأَتَخَيَّل اَلْحَيَاةَ، أُمٌّ لِأَنْ أَجِدَ قَبَسًا فِي ظُلْمَتِي يُطَمْئِنُنِي بِأَنَّ اَلْحَيَاةَ لَيْسَتْ كَمَا أَظُنُّ !

 أُمٌّ لِأُجَرِّب شَيْئًا بَعِيدًا كَكَفِيفٍ يَرَى اَلنُّور مَنَامًا فَيُبْصِرْ شَيْئًا آخَر قَادِرًا عَلَى أَنْ يَبْتَلِعَ اَلظَّلَامُ

شَجَرٌ أَخْضَرَ وَارِفٍ يُبَدِّدُ اَلْعَتَمَةَ فَيُحْيِي اَلْمَشْهَد ، أُفِيقُ مِنْ غَفْوَتِي أَتَحَسَّس كُسْوَة اَلْمَلَلِ اَلْمَحْشُوَّة دَاخِلَهَا فَأَجَدهَا قَدْ اِتَّسَعَتْ كَبِيجَامَةٍ قَدِيمَة أَرْتَاحَ لِذِكْرَاهَا فَأبْلَى نَفْسِي بِدَاخِلِهَا قَبْلَ أَنْ تَبْلَى، أَمْسَح عَنْ جَبْهَتَيْ بُرُودَة عرقِ اَلشَّمْسِ اَلَّتِي لَا تَسْطَعُ إِلَّا فِي ظُلُمَاتِ لَيَالِيَّ اَلَّتِي أَرَاك فِيهَا ، وَكَأنَ اَلنَّسَمَةَ اَلْبَارِدَةَ حَلَّتْ لِتَوِّهَا لِتَجْعَلَ اَلشَّمْسَ نُورًا حَارًّا لَا أَشْعُرُ مَعَهُ بِعَطَشٍ وَلَا ضَيِّق أُقَابِلُك مَنَامًا ف أَرَى اَلْمَنَام مَقْطَعًا كَفِيلْمٍ تَسْجِيلِيٍّ لِرِوَايَةٍ قَصِيرَةٍ جِدًّا مَفْتُوحَةً اَلنِّهَايَةِ ، أَضْيَقَ كُلَّمَا رَأَيْتُنَا فِي ذَلِكَ اَلظَّلَام حَيْثُ أَنْوَارٌ سَرْمَدِيَّةٌ خَافِتَةٌ تَظَلُّمَ اَلْعَالَمِ مِنْ حَوْلِنَا لِنرَانَا دُونًا عَنْ كُلِّ شَيْءٍ قَدْ يُزَاحِمُنَا فِي هَذَا الْمَشْهَد، أَغْضَبَ أَحْيَانًا لِحُلُولِ اَلصَّبَاحِ مُبَكِّرًا ، وَأَغْضَبَ أَكْثَرَ لِخفْوتِنَا أَبْكَر ، لَكِنَّنِي أَصْحُو وَمَذَاقُ مَنَامَاتِنَا ف فَمِي ، نَتَقَاسَم اَلطَّعَام كُلَّ مَسَاءٍ ، كُلُّ مَنَامٍ عَلَى وَجْهِ اَلتَّوْصِيفِ ، أَرَاك وَطَاوِلَةَ اَلطَّعَامِ مُمَدَّدَةً بَيْنَنَا ، تَخْتَلِف اَلْأَطْعِمَة وَالْمَذَاقَات ، وَنَجْتَمِعُ عَلَى حُبِّهَا ، أَطْعِمَةٌ بَسِيطَةٌ نتشَارِكُهَا وَنَتَكَلَّمُ عَنْهَا ، وَنَقْص عَلَى بَعْضِنَا حِكَايَاتنَا مَعَهَا، تَحَمَّسْت اَلْيَوْم وَوَعَدَتنِي بِشَيْءٍ مِمَّا اِقْتَطَفَتْهُ بِيَدِكَ مِمَّا زَرَعَتْهُ وَالِدَتُكَ، سَأَنْتَظِرُمَوْسِم تَحْقِيق اَلْوَعْدِ بِفَارِغِ صَبْرِيْ.

من ما أنرته بنفسي                                      

تفاصيل التفصيل 👗

 الحمد لله الذي كساني هذا ورزقنيه من غير حول مني ولا قوة

ده دعاء اللبس الجديد دايما نقوله حتى لو الجديد ده شراب ولا إيشارب
الفستان ده انا اللي مفصلاه من 2017
في أغسطس 2017 قررت أتعلم تفصيل وروحت كورس لذيذ عاملاه بنت أمورة و حضرت معاها كان المفروض 6 أو 8 أيام نتعلم فيهم المبادئ بتاعة التفصيل وأخد المقاسات والقص وطريقة القعاد على المكنة وتنفيذ مشروع واحد

واشتريت الأدوات وتشجعت خالص اني هبقى هاني البحيري القادم اللي هيفصل لنفسه كل اللي مابيلاقيهوش في المحلات وسميت البراند بتاعي في خيالي وقولت بقى لما أتطور هبقى أفصّل للأحباب وحاجة في غاية الاخلاص وكان بيبقى أيام العطلة آخر الاسبوع ف كنت شغوفة اوي وبقوم الصبح أروح وابات طول الليل أطبق الحاجات اللي بيطلبوها و آخر حماس

وعملت الفستان وهو يحمل كل عيوب الصناعة المصرية بين طياته وحاجة ما حصلتش وبعدين حسيت انه لأ انا مش راضية عن مشروع تخرجي ف روحت جبت قماش تاني وافي وطبعا الانسان ماشاء الله عليه بيطبش وخلاص جبت القماشة ليكرا من اللي بيتعمل منها البوليروهات دي عشان اعمل بيها فستان والحمد لله اتعرضت لصدمة وجدانية في الانسان عموما والليكرا على وجه الخصوص وحصلت لي ازمة ثقة من الانسان خصوصا و الليكرا على وجه العموم واعتزلت الغرام واعتزلت الناس واعتزلت الليكرا
وركنت الفستان القديم وخدت القماش الجديد ركنته معاه لحد ما أفوق من صدماتي ومازلت.. آه وربنا مازلت

من كام يوم قررنا نحول القماش "الليكرا" لكسوة للأنتريه وافية وشافية و دافية
واحول امبارح الفستان القديم لفستان ألبسه تحت فساتيني " كقطعة بيسك" بدل الجيبات اللي بحبها تحت الفساتين عشان الفساتين ما تلزقش عليا في الهوا ولا تشف في النور او الشمس
ف الحمد لله

جدير بالذكر اني حاولت بعدها باسبوعين أعيش واواصل وروحت السنتر ومعاية القماشة الجديدة وحطيت القماش الليكرا على الترابيزة عشان اقصه ف بقى يتزحلق ويقع واشيله افرده ف يقع فبقيت ألمه و أعيط من الانسان عموما ومن الدنيا على وجه الخصوص وقطعت خط الرجعة مع السنتر عموما ومع الليكرا والانسان والقماش على وجع الخصوص

👗

تخاريف سحورية

 من كام يوم كده كنت بعيط جامد جدا عشان عمر ما المسحراتي نادى على اسمي، المشكلة  اني بعيط العاط الأهبل ده دايما لأسباب تانية غير الحاجة اللي بعيط  عشانها عشان كده ما بقفش كتير قدام عياطي باستعجاب عشان من جوايا عارفة ان هناك سبب دفين وراءه
لكن المرة دي ما شاء الله مافيش حاجة مستخبية، انا كنت بعيط فعلا عشان عمو المسحراتي عدى وماقالش اسمي اولا، وثانا ما حدش قال له قول اصحي يا فاطمة مع اني أصلا صاحية وحتى لو  ما بيناديش على حد من بيتنا أصلا بس لأ ازاي اعيش طول حياتي محرومة من نعمة نداء المسحراتي عليا 
أعتقد ان الشيطان بعد رمضان هيكون فخور أوي أوي بيا 

أعوذ بالله من الشيطان الرجيم