اللي بيحصل في المسجد الأقصى دلوقتي ظالم بكل ما تعنيه الكلمة قوات الاحتلال كل يوم بتهاجم المصلين والشباب ال خارجين من المسجد بعد محاولاتهم اغلاق بابين من أبواب المسجد هم باب الساهرة وباب العامود ف الشباب بيروحوا عشان يفسدوا عليهم خططهم في تنفيذ قراراتهم اما عن المستوطنين فهم كمان بيتكلموا عن انهم هيروحوا ويسكنوا الشوارع المحيطة للمسجد الأقصى ف الشباب بيملوا الشوارع أزيد عشان يمنعوهم من احتلال الأماكن دي القوات في محاولات القمع بيلجأوا لأقذر الطرق زي مثلا الخيل ف جايبين خيول انجليزية أضخم واقوى من الخيول العربية بيهاجموا بيها الشباب لتفريقهم ناهيك عن السلاح والرصاص المطاطي والحي ضيف على ده مشاهد يومية لضرب الشباب الأعزل جموع مقابل شاب في كل فرصة من 3 ايام رشوا الشوارع المحيطة بمياه عادمة " مياه سيئة الرائحة" رشاحات ضخمة فيها مياه قذرة وبيرشوها على الشباب لتفريقهم ، الشباب صامدين لما بتابع محاولات التفريق باتبهر بهدوء المصلين بيخرجوا ويمروا والسلام في قلبهم بيستنوا لحظات يفضى المكان ويعدوا رجال نساء وأطفال بلا نظرة خوف ولا جري برعب ولا حتى قلق
البنات البنات
ولا ألطف الكائنات ولا نيلة
فيه شاب فلسطيني مذيع في قناة هناك وبيعمل فيديوهات من المسجد الأقصى المهم كنت ب احضر فيديو لايف لحد تاني عن اأحداث في محيط المسجد الأقصى بعد التراويح وظهر من ضمن المصورين ال بيغطوا الأحداث الشاب ده وهنا انهالت تعليقات البنات هاتوا الاكونت بتاعه وال تعمل له قلوب وال وتكتب اسمه قعدوا ييجي 5 دقايق او اكتر من فيديو بيهتفوا باسمه فرحة بانهم شافوه بس مش عشان هو بيقول حاجة، بلا اي مراعاة لانهم بيتابعوا اعتقالات وضرب وهجوم وتدنيس للأماكن وزقوا القضية ال بيتابعوها على جنب وركزوا معاه .. ولما يا عيني تعب من كتر الجري و قعد وشافوه قاعد فتحوها مندبة عشانه خلوا صاحب الللايف يطمنهم عليه من كتر التعليقات احسن لاقدر الله يكون فيه معاه مشكلة وكملوا بقى وفين الاكونت بتاعه فين ماعرفش ايه وهكذا اشفقت للحظة على صاحب اللايف ال ماحدش معبره بسؤال رغم انه اتعرض لمضايقات قوات الاحتلال خلال اللايف اكتر من مرة
يمكن الحاجات دي مابحبش اعرفها، بحس انه يبقى افضل لو تكون أسرارهم جوه نفوسهم في الحتة الصغيورة ال شباكها موارب جواهم ومافيش داعي للتهليل فَ الناس تشوف، يمكن لما بتكون اسرارهم بتتحول لقضاياهم هم ال صبرهم ووقوفهم في ضهرها بيكون في قيمة النضال عندهم وف وسط ذكرياتهم هم على غير ال بيشيع ويتكشف ويتحول لحدوتة وحكاية وسهراية بيضِل ويفقد قيمته .. انا عارفة اني قديمة شوية بس هيك بحب
ليست هناك تعليقات:
إرسال تعليق