في محاولة مني اني أتجاوز الفترة دي "الحجر الصحي" كمصابة ... تن تن تن تن تن تش💥
،قررت أخطط لمستقبلي اللي ب ايد ربنا يعني .. 😀
1_شريك حياتي
_لازم يكون اتصاب كرونا انا مش هرضى بأقل من مصاب ماعلش، لازم يكون متوافق معايا كشخصية كونت خبرة بالفيروسات وعارفة وفاهمة الحيل كلها وعارفة الدوا بيتاخد امتى وبنشرب له ايه والمضادات الحيوية واثارها الجانبية ولو مش مصاب يبقى مهتم بالطب "اوي اوي اوي"
2_محل سكني
_بما اني مش شامة حاجة وبالنسبة لي كل حاجة بريحة المناديل الورق ف عمالة اقنع نفسي بان انفي اتحولت لفلتر وده الهوا النضيف ال بيقولوا عليه وبما اني كده كده مقررة من البوست ال فات اني هعيش في النرويج ف انا قررت أفصح عن المكان التاني ال مش هرضى بأقل منه "ازربيجان" لنفس الطبيعة القمر ولسبب هييجي النقطة الجاية
3_غذائي
من المشروبات مثلا انا مبحبش اليانسون والناس كلها بتقول عنه انه عظيم من شوية عملت لنفسي يانسون وطلع بطعم المية السخنة المسكرة ف انا كمان فقدت حاسة التذوق دلوقتي .. مبرووك
وبما اني مش دايقة ف ممكن اتكلم عن الست المبهرة دي وبيت الست دي وحياة الست دي وبساطة الست دي ومش هرضى بأقل من حياة الست دي
4_سلامي
من ساعة ما بدأت اتعب وانا بغني خدناها خدناها، خدناها بالسيف الماضي وابوها ماكانش راضي خدناها خدناها بس عضمي مفشفش لا يصح معه رقصة المسّاحات أبدا
5_ردائي
بردان يا عم الحاج، حران يا عم الحاج ده حرفيا ال بيحصل معايا ببرد وانا متغطية بكل الأغطية الممكنة ولابسة كل الجواكت ال عندي وفجأة حرانة جدا
6_نشاطي
بفكر اتشطر واتعلم اطلع سلالم كهربا لاني عضمي عايز يقعدن على الطريق ويشتكي من كتر الفرهدة ال هو فيها هو وعضلاتي
7_وقتي
طويل اوي اول مرة احس ان الشتا طويل وخصوصا في النهارالوقت ساعات بيقف وانا بتقلِّب ، ف بفكر أستغل الوقت ده كله في اكتشاف وحدة قياس زمنية جديدة اسمها "التقليبة" ودي هتفيد العالم عموما والسلاحف على الأخص والحياة هتحلو من بعدها
براضي نفسي بان حلو ان ده بيحصل في الشتا مش الصيف عشان يكون الجو خفيف على قلبي وبقنعني باني كالعادة هحب ايام عيايا وبقاوم بده العياط من الالم
وكل كل كل ال فات ده محاولة عشان اقاوم العياط، فيه ايام بتسجنني غصب، الوقت ال نفسي يفوت طويل جدا والنوم فيه صعب وعضمي كله مدغدغ وروحي خايفة من الفشل ومافيش استمتاع بفصلان دماغي
ولو على العياط من الالم ف ده هيكون اريح
ملاحظة جانبية : من 4:14 فجرا ل 4:54 بتألم من الآثار الجانبية للمضاد الحيوي "زيسروسين" مع ألم هيستيري قاومته وانا بحاول انام وصحيت منه من ربع ساعة بصريخ .. اعتقد انه من النبل اني اقول ان ده حصل حتى ولو كنت بحاول أخبي عشان شخص واحد بس لو ما سبقلهوش واتصاب انه ما يخافش .. بس لو ياخد حذره يكون أحسن ولو ماياخدش الزيسروسين يكون احسن واحسن واحسن واتمنى للجميع الصحة والسلامة
3/6/ 2021
ليست هناك تعليقات:
إرسال تعليق