بسم الله الرحمن الرحيم
خلينا نتفق الاول على فكرة اني شايفة ان ask ده هو الاشتغالة ليه؟
لانك ببساطة بيجيلك سؤال من مجهول فتبتدي تسرح مع احلامك وآمالك المتوحدة في شخص او اتنين و تعيش الامنيات اليقظوية بإن ال بالي بالك عبرك وانت أصلا لو مش سائل نفسك بنفسك هتطلع اختك هي اللي سألاك "عشان بردوا تشتغلك"
…
اما بالنسبة للي جاي ده فسؤال من ضمن الاشتغالات ال الله اعلم مين ال باعته، وعشان مااتقيدش بفكرة ان فلان، او فلانة هم ال سائلين السؤال ف أرد وانا متقيدة بااحتمال او اكتر، قررت ما اردش هناك واارد هنا، نظرية ودنك منين يا جحاالمهم قررت اقسمهم على دفعات لسبب وحيد فريد هو ان فيهم عدد من الاسئلة مشترك في كام حاجة"
١_قواسم العاطفة المشتركة
”س": عندك فتى أحلام؟"ج": 😂
يعني ايه فتى أحلام يا عمو محمد، لا بجد يعني، يعني ايه!!
يعني ايه يعني صورة الانسان القياسي ال هحبه مثلا مش فاهماها دي مش يقولوا ساعة القدر يعمى البصر 😏 ..اهو على قد ما المثل ما بيضايقني على قد ما معناه مظبوط
فعلا فلحظة ممكن انسان في وسط لخبطة الدنيا كلها اشوفه كامل كمال الكامل الناس بتكمل رغم نفسنا كلنا لما ربنا بيأذن لقلوب ناس تانية انها تدق لها ومش كل القلوب اللي بتدق بتشوف الكمال ولا كل اللي كملوا حافظوا على كمالهم
يعني ف الأول وفالآخر هي مسألة أرزاق ومتقسمة
اما بقى عن اجابة السؤال اللي ما اتسألش صح ف زمان كان في ممثل بحبه اسمه أحم. مراد
ودايما كان بيطلع ف المسلسلات غلبان وطيب ويتحب فكنت معجبه بيه وباستناه يهل و المسلسل ما يخلصش
ومش عارفة هو بطل تمثيل بقى ولا ايه، وبالمناسبة حب افلاطوني زي حب الناس زمان لحسين صدقي كده
لكن لو السؤال ده مقصود بالمعنى ده، ف لأه انا ماعنديش فارس احلام، ولا كان فيه قبل كده ووالله انا مش ترزي على فكرة ولا ليا ف المقاسات ولا بعرف افاصل في الناس
"س": بتحبي في قصة حب؟
"ج": شو ها الفظاظة هي
كان نفسي اعرف اردح لك/لِك بالشامي
احمد حلمي لطيف وبيقول حاجات حلوة، بس مش كل البنات نور، فبرجاء لم الأنفس قبل الانطلاق
"س": مين حبيب بابا
"ج": يزيد
"س": ما الشروط الواجب توافرها في ابن الحلال
"ج" :
١_الظاهرية غير ملموسة المبنى
يبقى دمه خفيف وبس خفيف مش بيستخف دمه، عشان باتغاظ بجد من ال بيستخفوه، انا شخص يقدر الضحكة الحلوة .. وبالمناسبة بحب اكتشف ده بالصدفة وغالبا ال بينجحوا في تضحيكي دول بيبقوا ناس هادية، حالمة وما بتتكلمش كتير و اما بتتكلم ماتنطق إلا عدلا
٢_الباطنية ملموسة المعنى
اخلاقي، انساني "بمعاني فوق المتعارف عليها، معاني خاصة بيا"، واضح، عنده ضمير موازي لتحرره ... الخلاصة مُسلم
البنت ال اسمها فاطمة رجب، وال بالصدفة انا، ربنا يحرسني كانت بتقول:
انا مهرة هختار الحصان الأسمراني بنظرتي
يمكن عشان غيره خشب
مش فقر حظي ومش هقول ده ال انكتب
لذلك عزيزي السائل ما تقلقش
"س": قدمي نصيحة لحد بيحبك
"ج":
_ لو انت بنت ما تتعشميش فيا، لأني ببساطة ياما اتعشمت وف المقابل ذهب العشم مع ذكرى مش لطيفة، مش لأن الناس وحشين وانا الوحيدة الحلوة ولا انا الانسانة الكعبة، ابدا لأني ببساطة مش عايشة ف دماغ حد ولا ف ظروفه ولا ف افكاره ولا في ظنونه ولا في صلاته ولا مصاحبة شياطينه، وانت كذلك ..هو انا صحيح ما خذلتش حد اتعشم فيا "حسبما اعتقد" واتمنى مااكونش فعلا بس خدي بنصيحتي وماتتعشمييييييييش بتاتًا البتَّة
_اما بقى لو ولد فَ لف وارجع تاني نصيحة يعني.
ليست هناك تعليقات:
إرسال تعليق