أقيموا الافراح احتفالا بأبو صلاح
السنة اللي فاتت وعلى مدار الشتوية و انا لسبب ما كنت كل اسبوع مرتين على الأقل بانزل من بيتنا امشي مشوار طويل في البرد، دون أن أعبأ بليل ولا ببرد..ويمكن ماكنتش حاسة بأي نوع من انواع الاندهاش مني وانا شخص بيتوتي ممكن يعمل بيات شتوي وصيفي وربيعي ومش هقول خريفي عشان بحب الخريف
و قلت بقى مش مضطرة أخرج وهرجع لنفسي الساكنة الحلوة دي من تاني السنة دي لحد ما صحيت اول امبارح لقيتهم ناويين يخرجوا، يا جدعان يهديكوا، يرضيكوا تسيبوني..لأ وبدأت التحليفات ال كنت بصدها بالحجج و الضغط كان كتير وانا بطولي مافيش حواليا عزوة من المأنتخين فرضخت للأمر الواقع وروحت معاهم
حد يخرج يروح الطل!
اخر مواصلة بتنزلك على بعد كيلو متر من المكان، في الهِو بتلاقي نفسك ماشي، جبال من جنبك، فوق راسك السما، قدامك طريق مش فاهم له آخر و جنبك تريلات بتييجي منين الله أعلم وانت مكمل في طريقك
الله
كمية هوا حلوين بياخدوا هدومك لورا، بواقي الشمس رسمينني بالضل على يميني طويلة وفي رغبة ملحة اني اجري بس عشان سواقين العربيات هيشوفوني مشيت لوحدي زي زمان صحيح هم ماشيين معايا، بس انا كنت متأخرة عن جماعة ومقدمة عن جماعة تانية ف الخلاصة لوحدي
"إيديا في جيوبي وقلبي طرب، حاسس بغربة بس مش مغترب"
لحد ما روحنا وجينا راجعين كانوا صلوا المغرب والدنيا عتمت خالص، فقعدت صورت بواقي الغروب، واتمشيت
الله
مش هحكي تفاصيل اكتر من كدة، لرغبة في نفسي
لكن نصيحة، اخرجوا وخرجوا أهلكوا غصب عنهم حتى لو هتتمشوا .. المشي بيفك الرجلين وبيساعد في شفاها ودي عن تجربة مش كلام
الحاجة التانية ما تخنقوهمش لولقيتوهم بيجروا اجروا معاهم، لو بيتنططوا شاركوهم الله اعلم المشاركة دي هتعليكوا ف نظرهم قد ايه او على الاقل سيبوهم يحسوا بفرحة الخروج معاكوا بطريقتهم لو مش هتشاركوهم اللعب، سيبوهم يلعبوا لوحدهم .
"الرسول كان بيسابق السيدة عائشة "
اوووووووووه ❤
😂
ليست هناك تعليقات:
إرسال تعليق