سلام عليكم
علاقاتنا بالكبار بلا مزايدة، علاقات عاطفية جميلة..بنعيش على ذكراها سنين طويلة، لكن سؤال هو انتوا عشان كبار وبنحبكوا و بتحبونا وهنحبكوا سنين أكتر تعملوا فينا كده!"ننة نام ننة نام وادبح لك جوزين حمام تاكل حتة وتنام"
سؤال ماعلش
جوزين حمام ايه وانا طفلة رضيعة، ولا بحبي و يادوبك بسنن اللي عايزين تقنعوني بيهم كمشهيات رهيبة لازم انام عشان أتكافئ بيهم، و بعدين انام و اسيبهم ليه يعني طب ما افرضوا اتاكلوا وانا نايمة، ولا عايزينني انام مفتحة عين ومغمضة عين..ثم ازاي يكون الغايب مالوش نايب وانتوا بنفسكوا بتهدهدوني وبتبعتوني لغياهب الغياب باديكوا وعايزينني أنام واصدقكوا!
"ست الناس يا ست الناس بربورك فضة ونحاس، ست الكل يا ست الكل بربورك يغفل ويطل"..ست أو سيد على حسب نوع النونو
سؤال ماعلش
مين الشاعر اللطيف اللي ساب الطفل الجميل بريحته الحلوة، وبشرته الناعمة، وعيونه اللامعة، وتقاطيعه المنمنمة و مسك و تبِّت في البربور"افرازات الأنف" عشان يفكر و يكتب و يقفِّي لا وتتوارثها الاجيال لحد ما تغنوها لي وانا طفلة كتعبير عن امتنانكوا التام بينا بكل تفاصيلنا الوحش منهم زي الحلو
عزيزي الشاعر، سلامتك و ياخوفي لاتكون جاي لي انا بقى
قعدوا الصبايا جنب رعريعة، لا فات عليهم شروة ولا بيعة
سؤال ماعلش
مين رعريعة اللي قعدنا جنبه ده عشان تذلونا على قعدتنا جنبه واللي خلفت كساد تجاري فظيع..ولا هو مش عيب تعايرونا بفشلنا في مجال التجارة..عادي يعني السوق مكسب وخسارة، ثم مثلا هذا الرعريعة ده يعني بني آدم ولا مبنى ولا زلعة ولا اي وصف ليه بس يطمني ان الدنيا لسة بخير مش كده خالص لكن ليه الذل ده الذل حرام و عيب نجيب في سيرة رعريعة وهو ماعملناش حاجة يا جدعان
كفاية دول النهارده، سلام
ليست هناك تعليقات:
إرسال تعليق