النهارده نفسي كان متضايق شوية وانا بره، يمكن بفضل الصيف، او القولون او ماعرفش ايه
المهم كنت عمالة اتنفس بصعوبة ومتضايقة وعمالة خلاص هعيط و انا بحاول بردو ما اضايقش نفسي ولا اللي حواليا عشان ماحدش ليه ذنب وحاجة في منتهى الحالة طوارئ جيم
المهم ماضحكتش غير على نفسي لما بجملة بقى لقيت عيل صغير كبير اللي هو في السن الرخم ده بيشتم الكلب و بيحدف عليه طوبة وبيقول له امشي من هنا يا ابن الكلب وراح شاتمه شتيمة مابيتشتمش بيها الا رجالة
ف الكلب زعل وزام وراح جاري وراه ولقيت نفسي بكلم الكلب بصوت يسمع و بحمسه وهو بيجري في اتجاه الواد وبقول للكلب خد حقك ما تسيبهوش وبرافو عليك وبتاع ثم ادركت ان ده حصل في وسط الناس في الشارع وفطست من الضحك على نفسي لحد ما نَفَسي رجع ارتاح تاني الحمد لله
حاجة كده من منطلق ال "خد حقك يا كلب انت وهو" 🐈🐕🐕🦺🦮🐈⬛🐩
صحيح (ولاد الانسان ماخلوش لولاد الكلب أي حاجة)
ليست هناك تعليقات:
إرسال تعليق