في مسلسل ورد على فل و ياسمين
انا ماشوقتش الحلقة الأخيرة عشان قالوا انها نكد و عياط وانا اكثر حساسية من اني استحمل، لكن قرأت إن الناس اخذوا على المسلسل ان البطل بعد وفاة البطلة ناقش الدكتوراة و سافر البعثة ورجع فتح المعمل الخاص بيه واتجوز البنت اللي بتحبه و خلف طفل كتكوت وكل ده و بطرمان العسل اللي اهدته له لسه موجود كتفصيلة مش منطقية بالنسبة لهم يعني!
والحقيقة ان بابا وهو راجع من السفر في يوليو ٢٠٢١ كان جايب معاه حاجات منها كيس فيه لبن بودرة كبير شوية يعني قبل الوفاة ب شهر مثلا ، ومن ساعتها لحد النهارده في يونيو ٢٠٢٦ وانا مازلت محتفظة بكيس اللبن زي ماهو
اه صحيح قلبي بيوجعني لما ببص له ولما بلمسه لكن مش متخيلة ان ممكن افرط فيه ابدا
ف دي لفتة حنونة ما بتقولش غير انهم مش عايزين ينسوا البطلة ولو كل اللي هيفضل لهم منها نص بطرمان عسل ينفع يعيش معاهم للأبد
- عموما بعد بكرة عيد الأب و ربنا يرحم بابا و يغفر له و يسكنه فسيح جناته و يصبرني على فراقه♥️
ليست هناك تعليقات:
إرسال تعليق