يوم الأب

 بكرة يوم مهم من أيام ربنا، يوم اسمه يوم الأب (21/6)

يمكن ماحدش بيفتكره او بيذكره إلا الأبناء اللي بيحبوا آبائهم اوي ونفسهم يجبروا بخواطرهم ويردوا لهم حاجة بسيطة من الفرحة اللي ياما غمروهم بيها

يمكن عمر ما كان فيه يوم اسمه "يوم الابن" لان الطبيعي ان كل يوم هو يوم للإبن!

الأب والأم بيبذلوا جهد مالهوش أول من آخر عشان ينجوا ابنهم من كل حزن، من كل وجع، ومن كل احتياج

في زمننا ده الأب و الأم مش بس ملزمين يأكلوا أولادهم ويحموهم من الناس بس

في زمننا ده انك تربي طفل رحيم، واثق في نفسه، سليم نفسيا   بقوا ركائز أساسية بتصب في حقيقة انك هتكون سبب في  انه يبقى (انسان سوي) للأبد

وبالتالي أب لأطفال أسوياء 

  لازم الأب والأم يبذلوا كل ما في وسعهم عشان يحققوا ده مهما كانت المعادلة صعبة جدا!

التربية أصلا حاجة صعبة وكل مرحلة ليها مشقتها بس ربنا بيهونها؛ بضحكة حلوة ولا حضن حنين ولا نظرة امتنان من ابنك

بيهونها لما يجري عليك اول واحد، ولما ما يتخيلش حياته من غيرك، ولما يشوفك قوي او كامل أو جميل، ربنا بيهونها لما تشوف الحب مطبوع على قلبه و الرحمة في كلامه ساعتها كل شيء بيهون و ربنا بيقوي

يمكن انا ممتنة لبابا و بقى لي ايام مش عارفة ما افكرش في اني في يوم زي ده ماكنتش بفوت فرصة اني اقول له كل عام وانت بكل خير لكن مضطرة اقولها بصيغة تانية

الله يرحم بابا و يغفر له و يسكنه فسيح جناته وتعيش له كل الأوقات الحلوة في قلبي وعقلي و يرزقنا بكل الفرص اللي أوزع بيها من رحمته عليا رحمات على كل الصغيرين اللي في الدنيا